ဝၼ်းတီႈ 18/10/2021 မိူဝ်ႈၼႆႉ ပီႈၼွင်ႉဝၢၼ်ႈၼွင်ၶမ်း ဢိူင်ႇၼွင်ၶမ်း ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၵႂႃႇသၢၼ်ၶတ်း ၶႄႇ လွမ်ႉႁူဝ်ႉ ၶၢမ်းၶဝ်ႈမႃးၼႂ်းလိၼ်မိူင်းတႆး ၊ သွင်ၾၢႆႇလႆႈထဵင်မေႃးၵၼ်ၵမ်းၼိုင်ႈ ၼႆယဝ်ႉ။
ၵူၼ်း ဝၢၼ်ႈၼွင်ၶမ်း ၵေႃႉၼိုင်ႈ လၢတ်ႈ ၽူႈတွႆႇႁွၵ်ႈဝႃႈ -“တၢင်းၾင်ႇမိူင်းၶႄႇၶဝ် လွမ်ႉႁူဝ်ႉၶဝ်ႈမႃးၼႂ်းလိၼ်တူင်ႈၼႃး ပီႈၼွင်ႉၼွင် ၶမ်း ႁဝ်းၶႃႈဢေႃႈ၊ ၶဝ်ဢမ်ႇတူၺ်းတေႃႇၼႃႈႁဝ်း ႁဝ်းၶႃႈ ဢွၼ်ၵၼ်ၵႂႃႇသၢၼ်ၶတ်း ဢမ်ႇပၼ်ၶဝ်ႁဵတ်းၶႃႈ။ မိူဝ်ႈၵႆႈၼႆႉ လႆႈထဵင်မေႃးၵၼ် ၵမ်း ၼိုင်ႈၶႃႈ တင်းၶဝ်လႄႈ တင်းႁဝ်း”- ဝႃႈၼႆ။
ႁူဝ်ႉလဵၵ်း ဢၼ်ၶႄႇၶဝ် လွမ်ႉၶဝ်ႈမႃးတၢင်းၾင်ႇမိူင်းတႆး ၼႂ်းဢိူင်ႇၼွင်ၶမ်းၼႆႉ ၶဝ်လွမ်ႉမႃး တၢင်းဝၢၼ်ႈၵုၼ်တႃႉ- ဝၢၼ်ႈၼွင်မႃႉတႃ – ဝၢၼ်ႈ ၼွင်ၶမ်းလႄႈ ဝၢၼ်ႈၵုၼ်ႁႆး ၸိူဝ်းၼႆႉသေႁူဝ်ႉဢၼ်ၶဝ်လွမ်ႉထႅင်ႈၵမ်းၼႆႉ ပဵၼ်ႁူဝ်ႉ ၸၼ်ႉထီႉသၢမ်ယဝ်ႉ ၵူၼ်း ၼွင်ၶမ်း သိုပ်ႇလၢတ်ႈ ၼင်ႇၼႆ။
“ႁူဝ်ႉၶဝ်ၼႆႉ တႄႇႁဵတ်းမႃး တေမီးၶၢဝ်းတၢင်းဝူင်ႈၼိုင်ႈၼႆႉယဝ်ႉ။ ႁူဝ်ႉဢၼ်ၶဝ်လွမ်ႉထႅင်ႈၼႆႉ ပဵၼ်ၸၼ်ႉသၢမ်ယဝ်ႉ ။ လိၼ်ၶႅၼ်ႈမိူင်းၶႄႇ – မိူင်းတႆးၼႆႉ။ ၶဝ်ႈမႃးၼႂ်းလိၼ်မိူင်းတႆးၸဵမ်မိူဝ်ႈၸၼ်ႉသွင်ၼၼ်ႉယဝ်ႉ။ ”- ဝႃႈၼႆ။
ဢၼ်ၶႄႇၶဝ်လွမ်ႉႁူဝ်ႉၶၢမ်းၶဝ်ႈမႃးၼႂ်းလိၼ်မိူင်းတႆးၼႆႉ ၶဝ်ၼႄလွင်ႈတၢင်းဝႃႈ တႃႇ ႁႄႉၵင်ႈတၢင်းပဵၼ်ၶူဝ်ႊဝိတ်ႉ ဝႃႈၼႆ။
“ ၶဝ်ၵူဝ် ႁဝ်းလၵ်ႉၶဝ်ႈ မိူင်းၶဝ်ၶႃႈယူဝ်ႉ ထၢင်ႇ တႄႉ။ ႁူဝ်ႉၸၼ်ႉၼိုင်ႈလႄႈၸၼ်ႉသၢမ်ၼႆႉ သုင်မွၵ်ႈ 12 ထတ်း ပဵင်းၵၼ်။ ၸၼ်ႉၵၢင်ၼၼ်ႉတႄႉ သုင်မွၵ်ႈ 20 ထတ်းၼႆႉဢေႃႈ ”- ၵူၼ်းၼုမ်ႇ ဢိူင်ႇၼွင်ၶမ်း လၢတ်ႈၼႄၽူႈတွႆႇႁွၵ်ႈ ၼင်ႇၼႆ။
ၼႂ်းပီ 2021 ၼႆႉ ၾင်ႇမိူင်းၶႄႇ ဢဝ်တိုဝ်ႉတၢင်း တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်း ၼႂ်းမိူင်းတႆး ပွၵ်ႈၵမ်းသၢမ် ၽွင်းၵူၼ်းပိုၼ်ႉတီႈ ဢွၼ်ၵၼ်ၵၵ်းတူဝ်ယူႇၼႂ်းႁိူၼ်းယေးၽႂ်မၼ်းယူႇၼၼ်ႉ လွမ်ႉႁူဝ်ႉ ၶၢမ်းၶဝ်ႈမႃး ၼႂ်းလိၼ်မိူင်းတႆး တၢင်းၸႄႈဝဵင်းၼမ်ႉၶမ်း – မူႇၸေႊ ၸိူဝ်းၼႆႉ။ မိူဝ်ႈဝၼ်းတီႈ 12/9/2021 ၼၼ်ႉၵေႃႈ ပီႈၼွင်ႉၼႂ်းဢိူင်ႇဝၢၼ်ႈႁၢတ်ႇႁိၼ် ၸႄႈဝဵင်းၼမ်ႉၶမ်း ႁူဝ်ၵူၼ်း 100 ပၢႆ ဢွၼ်ၵၼ်ၵႂႃႇ သၢၼ်ၶတ်း လွင်ႈ ၶႄႇ ၶၢမ်းလွမ်ႉႁူဝ်ႉၶဝ်ႈမႃး ၵမ်းၼိုင်ႈယဝ်ႉ။
မိူဝ်ႈႁၢင်လိူၼ်ၵျုႊလၢႆႊ 2021 ၼၼ့်ၵေႃႈ တၢင်းၾင်ႇမိူင်းၶႄႇ ၶၢမ်းဢဝ်တီႈလိၼ်ၶွင်ၵူၼ်းမိူင်း ၵိင်ႇၽႄၸႄႈဝဵင်းမၢၼ်ႈႁဵဝ်း ၸႄႈဝဵင်း မူႇၸေႊ ၸိုင်ႈတႆးပွတ်းႁွင်ႇ ဢဝ်တီႈလိၼ်ၵူၼ်းမၢၼ်ႈႁဵဝ်း ၽွင်းၵူၼ်းမိူင်းၵၵ်းတူဝ် ယူႇႁိူၼ်းႁင်းၽႂ်မၼ်းၼၼ့်။ ၼၼ့်ၵေႃႈ ယူႇတီႈ ၵူၼ်းမိူင်းမၢၼ်ႈ ႁဵဝ်း ႁူမ်ႈၵၼ်ၵႂႃႇသၢၼ်ၶတ်း ယႃ့ႁူဝ့်ပႅတ်ႈ ၼႆယဝ့်။
