သဵင်ၵွင်ႈတႅၵ်ႇ ႁိမ်းဝတ်ႉၵုင်းၸူင် ပၢင်သဝ်းၵူၼ်းပၢႆႈၽေးသိုၵ်း ၸၢၵ်ႇမၢၵ်ႇသဵၼ်တိူဝ်ႉသႂ်ႇ ၵႃးၵူၼ်းမိူင်းလင်းၼိုင်ႈလႄႈ ႁဵတ်းႁႂ်ႈ ၵူၼ်းပၢႆႈၽေး ဢွၼ်ၵၼ်တူၵ်းၸႂ် ဝႃႈၼႆ။
မိူဝ်ႈဝႃး ဝၼ်းတီႈ 17/10/2021 ယၢမ်းၵၢင်ၼႂ် 8:13 မူင်း – 10:15 မူင်းၵၢင်ၼႂ် သဵင်ၵွင်ႈတႅၵ်ႇ ၾၢႆႇႁွင်ႇဝတ်ႉၵုင်းၸူင် တီႈႁူၺ်းၼမ်ႉသိမ်ႇ ၼႂ်း ဢိူင်ႇႁမ်းငၢႆး ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၸၢၵ်ႇမၢၵ်ႇလူင် သဵၼ်တိူဝ်ႉသႂ်ႇၵႃးၵူၼ်းမိူင်းလမ်းၼိုင်ႈ ဢၼ်ၵိုတ်းဝႆႉ ၼႂ်းဝၢင်းဝတ်ႉၼၼ်ႉလႄႈ ယဝ်ႉၵေႃႈ ႁဵတ်းႁႂ်ႈၵူၼ်းပၢႆႈၽေးသိုၵ်း ဢွၼ်ၵၼ်တူၵ်းၸႂ် ၼႆယဝ်ႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ၼႂ်းဢိူင်ႇႁၢမ်းငၢႆး ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈဝႃႈ – “မိူဝ်ႈဝႃးၼႆႉ သဵင်ၵွင်ႈတႅၵ်ႇၶႃႈဢေႃႈ၊ တီႈၾၢႆႇႁွင်ႇ ဝတ်ႉၵုင်းၸူင် ၸၢၵ်ႇမၢၵ်ႇလူင် သဵၼ်တိူဝ်ႉသႂ်ႇၵႃး ဢၼ်ၵိုတ်းဝႆႉၼႂ်းဝၢင်းဝတ်ႉလမ်းၼိုင်ႈ ပဵၼ်ၵႃးပရူဝ်ႊပွၵ်ႊ ၵူၼ်းပၢႆႈၽေးသိုၵ်းတႄႉ ဢမ်ႇလႆႈ တိူဝ်ႉမၢတ်ႇ ၸွမ်းသင်ၶႃႈ။ ၵူၼ်းပၢႆႈၽေးသိုၵ်းႁဝ်းၶႃႈတႄႉ ဢွၼ်ၵၼ်တူၵ်းၸႂ်ၵၼ် ၵမ်ႉၼိုင်ႈၶႃႈဢေႃႈ၊ မိူဝ်ႈၼႆႉတႄႉ ယဵၼ်ဝႆႉၶႃႈ ပၢင်တိုၵ်းတႄႉ”- ဝႃႈၼႆ။
ယၢမ်းလဵဝ် ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈ ဝတ်ႉၵုင်းၸူင်ၼႆႉ တင်းမူတ်းႁူဝ်ၵူၼ်း တေမီး 400 ပၢႆ။ မိူဝ်းဝႃႈ ဝၼ်းတီႈ 17 ၼႆႉ ပၢႆႈ ႁွတ်ႈထိုင်မႃးထႅင်ႈ 10 ပၢႆ။ တီႈဝတ်ႉၵွင်းမူးသမ်ႉ မီးဝႆႉ ၵူၼ်းပၢႆႈၽေးသိုၵ်း မွၵ်ႈ 500 ပၢႆ ဝႃႈၼႆ။
“ပူၼ်ႉမႃး ၶၢဝ်းတၢင်း 4-5 ဝၼ်းၼႆႉ လွင်ႈၵိၼ်ယႅမ်ႉၽၵ်းၶဵဝ်လႄႈ ယႃႈယႃ ဢိတ်းဢွတ်းတႄႉ ၶၢတ်ႇၵႂႃႇၵမ်းၼိုင်ႈ တီႈၵူၼ်းပၢႆႈၽေးသိုၵ်းႁဝ်းၶႃႈ တီႈႁမ်းငၢႆးၼႆႉ။ မိူဝ်ႈဝႃးသမ်ႉ ယူႇတီႈၸုမ်းၵဝ်ႉငဝ်ႈပူၵ်းပွင်ၸိုင်ႈတႆးလႄႈ ၵူၼ်းၼုမ်ႇ မႃးၸွႆႈထႅမ်ထႅင်ႈၶႃႈ။ ယၢမ်းလဵဝ် ၵူၼ်းပၢႆႈၽေးသိုၵ်း တီႈ ႁမ်းငၢႆးႁဝ်းၶႃႈ ၸွမ်းၼင်ႇ လႆႈၵဵပ်းသဵၼ်ႈမၢႆဝႆႉ တေႃႇထိုင် မိူဝ်ႈဝႃး ဝၼ်းတီႈ 17 တႄႉ တီႈဝတ်ႉၵုင်းၸူင် 400 ပၢႆ၊ တီႈဝတ်ႉၵွင်းမူး 500 ပၢႆၶႃႈ ဢေႃႈ”- ၽူႈၸွႆႈထႅမ်ၵူၼ်းပၢႆႈၽေးသိုၵ်း တီႈဢိူင်ႇႁမ်းငၢႆး သိုပ်ႇလၢတ်ႈၼႄထႅင်ႈၼင်ႇၼႆ။
ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈဢိူင်ႇႁမ်းငၢႆးၼႆႉ ၶွပ်ႈတဵမ် 1 လိူၼ်မိူဝ်ႈၼႆႉ ဝၼ်းတီႈ 18 ၼႆယဝ်ႉ။
“သင်ဝႃႈ ပၢင်တိုၵ်းၼႆႉ တိုၵ်ႉသိုပ်ႇပဵၼ်ၶၢဝ်းႁိုင်ထႅင်ႈတႄႉ ၵူၼ်းပၢႆႈၽေးသိုၵ်း တေယၢပ်ႇၽိုတ်ႇတႄႉၶႃႈ။ မိူၼ်ၼင်ႇ ႁၢမ်းၵၢၼ်ငၢၼ်းၵၼ်၊ တုမ်း တိူဝ်ႉပၢႆးယူႇလီ၊ လွင်ႈၵိၼ်ယႅမ်ႉၵေႃႈ ပိူင်ၼိုင်ႈ သင်ဝႃႈ ဢမ်ႇမီးၽူႈၸွႆႈထႅမ်ၶဝ် ၸွႆႈၶဝ်ႈမႃးၼႆ တေယၢပ်ႇၽိုတ်ႇလိူဝ်ႁႅင်းၶႃႈဢေႃႈ။ ယဝ်ႉၵေႃႈ လၢႆ ၸိူဝ်ႉလၢႆလွင်ႈထႅင်ႈၶႃႈ။ ၵူၼ်းပၢႆႈၽေးတီႈႁၢမ်းငၢႆးၼႆႉ ပၢႆႈမႃးၶွပ်ႈတဵမ် ၼိုင်ႈလိူၼ်မိူဝ်ႈၼႆႉယဝ်ႉ။ ဢၼ်ပၢႆႈမႃးၼမ်တႄႉ တေပဵၼ် ၼႂ်းဝၼ်းတီႈ 24-25 မိူဝ်ႈလိူၼ်ပူၼ်ႉမႃးၼၼ်ႉၶႃႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄထႅင်ႈၼင်ႇၼႆ။
ၼွၵ်ႈလိူဝ်ၼၼ်ႉ ၵူၼ်းပၢႆႈၽေးသိုၵ်း တီႈဢိူင်ႇပၢင်ႇၵေႇတုၵေႃႈ ယၢမ်းလဵဝ် မီးဝႆႉၵူၼ်းပၢႆႈၽေးသိုၵ်း 2 သွင်ပၢႆ ပႆႇၸၢင်ႈပွၵ်ႈႁိူၼ်းယေးၵၼ်။ ယဝ်ႉၵေႃႈ ၸိူဝ်းပၢႆႈၶဝ်ႈၼႂ်းဝဵင်းမိူင်းၵိုင် ၸိူဝ်းၼႆႉၵေႃႈ မီးထႅင်ႈ ၼႆယဝ်ႉ။
တႄႇဢဝ်ဝၼ်းတီႈ 14/9/2021 ၼၼ်ႉမႃးသေ ယူႇတီႈသိုၵ်း RCSS တင်း SSPP ပဵၼ်ပၢင်တိုၵ်းၵၼ် မႃးႁၢဝ်ႈႁႅင်း ၼႂ်းဢိူင်ႇႁူဝ်ၶၢႆး ၸႄႈဝဵင်း မိူင်းၵိုင် ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ လႆႈပၢႆႈယၢၼ်ႁိူၼ်းယေး တီႈယူႇတၼ်းသဝ်းၵၼ် ၼပ်ႉႁဵင် ၼႆယဝ်ႉ။
