ႁႅင်းၵၢၼ်မိူင်းႁူမ်ႈတုမ် လုၵ်ႉမိူင်းမၢဝ်း ပွၵ်ႈၶဝ်ႈမႃးၶိုၼ်း တၢင်းဝဵင်းမူႇၸေႊထႅင်ႈ ၼႂ်းဝၼ်းလဵဝ် ႁူဝ်ၵူၼ်း 300 ပၢႆ ။
မိူဝ်ႈဝႃး ဝၼ်းတီႈ 14/10/2021 ႁႅင်းၵၢၼ်မိူင်းႁူမ်ႈတုမ် ဢၼ်ၵႂႃႇႁဵတ်းၵၢၼ် တၢင်းၾင်ႇမိူင်းၶႄႇၼၼ်ႉ လုၵ်ႉမိူင်းမၢဝ်း၊ ၸေႊၵဝ်ႇသေ ပွၵ်ႈၶဝ်ႈ မႃးၶိုၼ်း တီႈၽၵ်းတူႁေႃၶမ်းလူင် (နန်းတော်ဂိတ်ပေါက်) ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ႁူဝ်ၵူၼ်းထႅင်ႈ 300 ပၢႆ ။
ၽူႈၸွႆႈထႅမ် ႁႅင်းၵၢၼ် ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈဝႃႈ – “မိူဝ်ႈဝႃးၼႆႉ ႁွတ်ႈၽႅဝ်မႃးထႅင်ႈ ႁႅင်းၵၢၼ် 300 ပၢႆ၊ မိူဝ်ႈသိုၼ်းၼၼ်ႉၵေႃႈ ပွၵ်ႈ ၶဝ်ႈမႃးၶႃႈ။ ႁႅင်းၵၢၼ် ဢၼ်ပွၵ်ႈၶဝ်ႈမႃးၼႆႉ ႁဝ်းၶႃႈ ၶပ်းၶိုင်သေ ႁၢင်ႈႁႅၼ်းၸတ်းသူင်ႇပွၵ်ႈၶိုၼ်းႁိူၼ်းယေးပၼ်ၶႃႈ။ မၢင်ၵေႃႈ ဢမ်ႇမီးငိုၼ်းၵႃႈတၢင်း တႃႇတေပွၵ်ႈႁိူၼ်းၼႆ ယင်းလႆႈၸွႆႈၵမ်ႉထႅမ်ပၼ်၊ သိုဝ်ႇသၢၼ်ပၼ်၊ ႁႅင်းၵၢၼ် ဢၼ်ပွၵ်ႈၶဝ်ႈမႃးၼႆႉ ၵမ်ႈၼမ် လုၵ်ႉၸေႊၵဝ်ႇ၊ မိူင်းမၢဝ်း ၸိူဝ်းၼႆႉမႃးၶႃႈ”- ဝႃႈၼႆ။
ႁႅင်းၵၢၼ်မိူင်းႁူမ်ႈတုမ် ဢၼ်ပွၵ်ႈၶဝ်ႈမႃးၼႆႉ ႁူဝ်ၵူၼ်း တင်းမူတ်း 312 ၵေႃႉ၊ ၽူႈၸၢႆး 173 ၵေႃႉ၊ ၽူႈယိင်း 139 ၵေႃႉ ၼႆယဝ်ႉ။
တႄႇဢဝ် ဝၼ်းတီႈ 26/7/2021 ၼၼ်ႉမႃး ႁႅင်းၵၢၼ်မိူင်းႁူမ်ႈတုမ် လုၵ်ႉတၢင်းၾင်ႇမိူင်းၶႄႇ ပွၵ်ႈၶဝ်ႈတီႈၽၵ်းတူႁေႃၶမ်းလူင် ၸႄႈဝဵင်းမူႇ ၸေႊ ၸိုင်ႈတႆးပွတ်းႁွင်ႇ ၶၢဝ်းတၢင်း 2 လိူၼ်ပၢႆၼႆႉ မီးၵႂႃႇႁူဝ်ၵူၼ်း 12,826 ၵေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ