ၾၢႆႇပၢႆးယူႇလီ တေလူင်းပိုတ်ႉတီႈသေ ၵူတ်ႇထတ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 ပၼ် တီႈဝတ်ႉၵူႇတဝ်ႈ ဝဵင်းၵဵင်းမႆႇ၊ ၽႂ်ၵႂႃႇၵူတ်ႇထတ်းၵေႃႈလႆႈ ဢမ်ႇလႆႈသဵင်ႈငိုၼ်းသင် ဝႃႈၼႆ။

မိူဝ်ႈၽုၵ်ႈ ဝၼ်းတီႈ 15/10/2021 တႄႇဢဝ်ယၢမ်းၵၢင်ၼႂ် 8:30 မူင်း ထိုင် 15:30 မူင်းဝၢႆးဝၼ်း တီႈဝတ်ႉၵူႇတဝ်ႈ ဝဵင်းၵဵင်းမႆႇ ၼၼ်ႉ ၾၢႆႇပၢႆးယူႇလီ တေလူင်းပိုၼ်ႉတီႈ ၵူတ်ႇထတ်း ၸိူဝ်ႉ မႅင်းတၢင်းပဵၼ်ၶူဝ်ႊဝိတ်ႉ 19 ပၼ် တူင်ႇဝူင်းပီႈၼွင်ႉတႆး လႄႈ တၵ်ႉၵႃႇ သတ်ႉထႃး ၸိူဝ်းၶဝ်ႈဢွၵ်ႇ ဝတ်ႉ။

ၸၢႆးသႅင်ယ ႁူဝ်ပဝ်ႈ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းၵဵင်းမႆႇ လၢတ်ႈၼႄၽူႈတွႆႇႁွၵ်ႈဝႃႈ – “ၾၢႆႇပၢႆးယူႇလီ တေလူင်းထတ်းပၼ် တၢင်းပဵၼ်ၶူဝ်ႊဝိတ်ႉ 19 ၸဵမ် ၵူၼ်းမိူင်း/ၵူၼ်းယူၼ်း၊  ၵူၼ်းထႆးလႄႈ ႁႅင်းၵၢၼ်ယၢၼ်မိူင်း ၸိူဝ်းၼႆႉ တေၵူတ်ႇထတ်း ပၼ်လၢႆလၢႆ ဢမ်ႇလႆႈသဵင်ႈငိုၼ်းသင်သေဝၢတ်ႇ၊ သင်ဝႃႈ ၽူႈလႂ်ၽႂ် ၶႂ်ႈၵူတ်ႇထတ်းၼႆၸိုင် မိူဝ်ႈၽုၵ်ႈဢွၼ်ၵၼ်မႃးၶဝ်ႈထႅဝ် လူင်းၸိုဝ်ႈၵၼ် သေ ၵူတ်ႇထတ်းၵႂႃႇ”- ဝႃႈၼႆ။

တွၼ်ႈတႃႇ ပီႈၼွင်ႉႁႅင်းၵၢၼ်တႆး(ႁႅင်းၵၢၼ်ယၢၼ်မိူင်း) တႄႉ ႁႂ်ႈဢွၼ်ၵၼ်ဢဝ်ပႃးဝတ်းဝႂ် တူဝ်ၵဝ်ႇ မႃးၸွမ်း၊ မီးဝတ်းဝႂ်သင်ၵေႃႈ ႁႂ်ႈဢဝ်မႃးၸွမ်း ဝႃႈၼႆ။

“သင်ပဵၼ်လႆႈတႄႉ ၶႂ်ႈႁႂ်ႈပီႈၼွင်ႉႁႅင်းၵၢၼ်ႁဝ်း ဢွၼ်ၵၼ်မႃးၵူတ်ႇထတ်းၵၼ်ၼမ်ၼမ်ၶႃႈ။ သင်ဝႃႈ ႁဝ်းဢမ်ႇမႃး ၵူတ်ႇထတ်းၸိုင် ႁဝ်းၵေႃႈ တေဢမ်ႇႁူႉဝႃႈ ႁဝ်းတိတ်းၸပ်း ဢမ်ႇၸိတ်းၸပ်း ၸိူဝ်းမႅင်းဢၼ်ဝႃႈၼၼ်ႉ။ သင်ဝႃႈ ႁဝ်းတိတ်းၸပ်းသေ မူၵ်းယူႇဝႆႉၼႆၸိုင် တၢင်းပဵၼ်ႁဝ်းၼႆႉ တေၸၢင်ႈလၢမ်း တိတ်းၸပ်းၵၼ်ၼမ်လႄႈ ၵွပ်ႈၼႆ ႁႂ်ႈဢွၼ်ၵၼ်မႃးၵူတ်ႇထတ်းၵၼ်သေၵမ်းၶႃႈ”- ၸၢႆးသႅင်ယ သိုပ်ႇလၢတ်ႈၼႄၼင်ႇၼႆ။

တႄႇဢဝ် ဝၼ်းတီႈ 8/10/2021 ၼၼ်ႉမႃး ၼႂ်းၵၢတ်ႇလူင် မိူင်းမႂ်ႇ ဝဵင်းၵဵင်းမႆႇ ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၼမ်သေ ထိုင်တီႈပေႃးလႆႈသင်ႇပိၵ်ႉဢိုတ်းၵၢတ်ႇမႃး တႃႇၶၢဝ်းတၢင်း 14 ဝၼ်း။ ၵၢတ်ႇလူင်မိူင်းမႂ်ႇၼႆႉ ၵမ်ႈၼမ် ပဵၼ်ပီႈၼွင်ႉႁႅင်းၵၢၼ်တႆး / ႁႅင်းၵၢၼ်မိူင်းႁူမ်ႈတုမ် ႁဵတ်းၵၢၼ် ႁႃၵိၼ်လဵင်ႉတွင်ႉၼမ် ၼႆယဝ်ႉ။

တၢင်းပဵၼ်ၶူဝ်ႊဝိတ်ႉ ဢမ်ၶဝ်ႈမႃး မိူင်းထႆး ၵမ်းထူၼ်ႈ 3 ၼႆႉ ၵူၼ်းၵဵင်းမႂ်ႇ ၸပ်းတၢင်းပဵၼ် ၶူဝ်ႊဝိတ်ႉ 6000 ပၢႆ ။ လူႉတၢႆ 40 ပၢႆ။ ယၢမ်းလဵဝ်ၵေႃႈ ၵူၼ်းတိတ်းၸပ်းတၢင်းပဵၼ် ၼမ်ၶိုၼ်ႈ ဝႂ်းလႂ် ႁူဝ်ပၢၵ်ႇ ၵေႃႉ ၵူႈဝၼ်း။ မိူဝ်ႈၼႆႉ ဝၼ်းတီႈ 14/10/2021 ၵူၼ်းၸပ်းၶူဝ်ႊဝိတ်ႉ 19 မီး 233 ၵေႃႉ။