ၵူၼ်းၼႂ်းဢိူင်ႇပုင်ႇဝူဝ်း ၸႄႈဝဵင်းၵျွၵ်ႉမႄး ၵူတ်ႇထတ်းႁၼ်ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 တင်းမူတ်း 168 ၵေႃႉ ၼႂ်းၼၼ်ႉ ပႃး လုၵ်ႈဢွၼ်ႇဢႃယု 10 ၶူပ်ႇ လူင်းတႂ်ႈ ဝႃႈၼႆ။
တႄႇဢဝ် ၼႂ်းလိူၼ်သႅပ်ႊထႅမ်ႊထိူဝ်ႊ 2021 ၼၼ်ႉမႃး ၼႂ်းဢိူင်ႇပုင်ႇဝူဝ်း ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၵူတ်ႇထတ်းႁၼ် ၵူၼ်းၼႂ်းပိုၼ်ႉတီႈ ၸပ်း ၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 မီးထိုင် 168 ၵေႃႉ ၊ ၼႂ်းၼၼ်ႉ လုၵ်ႈဢွၼ်ႇဢႃယု 10 ၶူပ်ႇ လူင်းတႂ်ႈ 10 ၵေႃႉလႄႈ ၵူၼ်းထဝ်ႈ ဢႃယု 70 ပၢႆ 2 ၵေႃႉ ၼႆယဝ်ႉ။
မေႃလုမ်းလႃး ၵူၼ်းပဵၼ် တီႈၼႂ်းဢိူင်ႇပုင်ႇဝူဝ်း လၢတ်ႈၼႄၽူႈတွႆႇႁွၵ်ႈဝႃႈ – “တင်းမူတ်းမီး 168 ၵေႃႉ ယၢမ်းလဵဝ် တင်းမူတ်း ဢၼ်ယႃၶႅၼ်း ၵႂႃႇတႄႉ မီး 100 ပၢႆ ။ တိုၵ်ႉယူတ်းယႃဝႆႉ မီး 18 ၵေႃႉ။ ယွၼ်ႉဝႃႈ တီႈပုင်ႇဝူဝ်းၼႆႉ ဢွၵ်ႊသီႊၵျိၼ်ႊပႆႇတၼ်းထိုင်လႄႈ ၶဝ်ၵႂႃႇယူတ်းယႃတီႈၼွင်ပိင် ၼႂ်းဝဵင်းၵျွၵ်ႉမႄး ၸိူဝ်းၼႆႉ တေမီး 10 ၵေႃႉၼႆႉ”- ဝႃၼႆ။
ၼႂ်းၵူၼ်းပဵၼ် 168 ၵေႃႉၼၼ်ႉ ပႃးလုၵ်ႈဢွၼ်ႇ ဢႃယု 10 ၶူပ်ႇလူင်းတႂ်ႈ 10 ၵေႃႉ ၼၼ်ႉတႄႉ ႁၢႆမူတ်းယဝ်ႉ။ ၵူၺ်းၵႃႈ ၵူၼ်းထဝ်ႈ ဢႃယု 70 ပၢႆ 2 ၵေႃႉၼၼ်ႉ တိုၵ်ႉယူတ်းယႃ တူဝ်ဝႆႉတီႈ ဝတ်ႉပုင်ႇဝူဝ်း ၼႆယဝ်ႉ။
ၸဝ်ႈၶူးဝိလႃႇသ ၽူႈၵွၼ်းဝတ်ႉပုင်ႇဝူဝ်း လၢတ်ႈၼႄၽူႈတွႆႇႁွၵ်ႈဝႃႈ – “ယူႇတီႈႁဝ်းၸဝ်ႈသေ ၶႂ်ႈပၼ်ၾၢင်ႉထိုင်တႄႉ တၢင်းပဵၼ်ၼႆႉ ထၢင်ႇလဵၵ်ႉ ၵေႃႈဢမ်ႇလႆႈ ဝႆႉမဝ်မၢင်ၵေႃႈဢမ်ႇလႆႈ။ မိူဝ်ႈတႄႇမၼ်း ထၢင်ႇဝႃႈၼၢဝ်ဢိတ်းဢွတ်းၵူၺ်း။ ပေႃးဝႃႈၼၢဝ်ယဝ်ႉၵေႃႈ လူဝ်ႇလႆႈၸႅတ်ႈၵမ်းလဵဝ်။ ပေႃး ႁူႉဝႃႈ ၸပ်းယဝ်ႉၵေႃႈ ၶတ်းၸႂ်ယူႇၵေႃႉလဵဝ် ယႃႇႁႂ်ႈၵႂႃႇၸပ်းပိူၼ်ႈထႅင်ႈ။ ယႃႇဝႆႉမဝ်မၢင် ၵႆႉတူမ်းသူပ်း ။ ၵႆႉသုၵ်ႈပၼ်မိုဝ်း ၵႆႉပူၼ်ႈပၢၵ်ႇပၼ်၊ ၵႆႉၵိၼ် ၼမ်ႉမႆႈ ယႃႇပေႁႂ်ႈမၼ်းၸပ်းၸိူဝ်ႉ မႅင်းလႆႈငၢႆႈငၢႆႈၼၼ်ႉ”- ဝႃႈၼႆ။
တၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ် ဢၼ်ၽႄႈလၢမ်း ၼႂ်းၸႄႈဝဵင်းၵျွၵ်ႉမႄးမႃး ႁၢၼ်ႉတေႃႇထိုင် ယၢမ်းလဵဝ် မီးၵူၼ်းတိတ်းၸပ်းၸိူဝ်ႉမႅင်း ၵႂႃႇယဝ်ႉ 1,500 ပၢႆ လူႉတၢႆ 80 ပၢႆ ၼႆယဝ်ႉ။
