ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 တၢင်းဝဵင်းယႂ်ႇဝဵင်းလူင် ၼႂ်းၸိုင်ႈတႆး ယွမ်းလူင်းတင်းၼမ်ယဝ်ႉဝႃႈၼႆသေတႃႉ တၢင်းဝဵင်းဢွၼ်ႇသမ်ႉတိုၵ်ႉမီးၵူၼ်းတိတ်းၸပ်း လူႉတၢႆယူႇၵူႈဝၼ်း ။
ၾၢႆႇပၢႆးယူႇလီ ပိုၼ်ၽၢဝ်ႇႁွင်ႉသမ်းၶဵမ်ႁႄႉၵင်ႈတၢင်းပဵၼ်ၶူဝ်ႊဝိတ်ႉယူႇၶိူဝ်းယႂ်း ၊ ၼႂ်းဝဵင်းယႂ်ႇဝဵင်းလူင် ဢမ်ႇပေႃးမီးၵူၼ်းတိတ်းၸပ်းတၢင်းပဵၼ်ယဝ်ႉဝႃႈၼႆသေတႃႉ တၢင်းဝဵင်းဢွၼ်ႇတႄႉ တိုၵ်ႉမီးၼမ်။ မိူၼ်ၼင်ႇ တီႈဝဵင်းမိူင်းပၼ်ႇ ၸိုင်ႈတႆးပွတ်းၸၢၼ်း ၼႂ်းဝူင်ႈသွင်ဝူင်ႈၵူၺ်း ၵူၼ်းတၢႆယွၼ်ႉတၢင်းပဵၼ်မီး 7 ၵေႃႉယဝ်ႉ ၾၢႆႇပၢႆးယူႇလီ ႁူင်းယႃဝဵင်းမိူင်းပၼ်ႇလၢတ်ႈ။
“ၼႂ်းဝူင်ႈဝၢင်ႈၼႆႉ ဢၼ်လူႉတၢႆၵႂႃႇမီးထိုင် 7 ၵေႃႉ။ ၵမ်ႈၼမ်ပဵၼ်ၵူၼ်းမီးတၢင်းပဵၼ် မၢၵ်ႇႁူဝ်ၸႂ်၊ တပ်း၊ ပွတ်ႇ ၸိူဝ်းၼႆႉၶႃႈဢေႃႈ။ ၵမ်ႈၼမ် ပိူၼ်ႈဢမ်ႇမႃးတီႈႁူင်းယႃၶႃႈၼေႈ။ ပဵၼ်သေ ယူတ်းယႃတူဝ်တီႈႁိူၼ်းႁင်းၵူၺ်း။ ယွၼ်ႉပိူဝ်ႈဢမ်ႇလႆႈယူႇၼႂ်းမိုဝ်းမေႃယႃတင်းဝၼ်းတင်းၶိုၼ်းလႄႈ ဢွၵ်ႊသီႊၵျိၼ်ႊတူၵ်းၸိူဝ်းၼႆႉၵေႃႈဢမ်ႇႁူႉတူဝ်။ သမ်ႉထွတ်ႇသၢႆ ဢွၵ်ႊသီႊၵျိၼ်ႊသေယူႇသဝ်းဝႆႉၸိူင်ႉၵူၼ်းလီၼၼ်ႉတိၵ်းတိၵ်းၶႃႈၼေႈ။ ၽိူဝ်ႇထိုင်ၼႂ်းမိုဝ်းမေႃယႃၵေႃႈ မၼ်းယူတ်းယႃဢဝ်ဢမ်ႇတၼ်းၶိုတ်းယဝ်ႉ ႁဵတ်းၼႆဢေႃႈ” – ဝႃႈၼႆ။
ၼႂ်းၸႄႈဝဵင်းလၢင်းၶိူဝ်းလႄႈ မိူင်းပၼ်ႇၼႆႉမီးၵူၼ်းတိတ်းၸပ်းတၢင်းပဵၼ်ၵူႈဝၼ်း။ ၼႂ်းဝဵင်းမိူင်းပၼ်ႇ ၵူၼ်းဢၼ်ၸပ်းတၢင်းပဵၼ်တင်းမူတ်းမီး 762 ၵေႃႉ။ ဢၼ်ယူတ်းယႃတူဝ်ဝႆႉတီႈႁူင်းယႃ မီးယူႇ 100 ပၢႆ ။ ဢၼ်လူႉတၢႆယွၼ်ႉတၢင်းပဵၼ်မီး 7 ၵေႃႉ၊ပဵၼ် ၸၢႆး 5 ၵေႃႉလႄႈယိင်း 2 ၵေႃႉ။
ၵူၼ်းတိတ်းၸပ်းတၢင်းပဵၼ်ၼမ်လႄႈ ဝဵင်းမိူင်းပၼ်ႇ ဢမ်ႇလွၵ်ႉတၢဝ်ႊဝဵင်းဝႆႉသေတႃႉ ၵၢတ်ႇသႃးလႄႈႁၢၼ်ႉတၢင်းၵိၼ်တႄႉ ယင်းပႆႇပိုတ်ႇ ။
ၵူၼ်းတိတ်းၸပ်းတၢင်းပဵၼ်ယူႇယၢမ်းလဵဝ် ၵမ်ႈၼမ်ပဵၼ်ၵူၼ်းလုၵ်ႉတၢင်ႇတီႈ လၵ်ႉပွၵ်ႈမႃးယူႇႁိူၼ်းၶိုၼ်းလူၺ်ႈဢမ်ႇၵုမ်းၵၵ်းတူဝ်လႄႈ ဢမ်ႇၵူတ်ႇထတ်းယူတ်းယႃတၢင်းပဵၼ် ၵူၼ်းမိူင်းပၼ်ႇၵေႃႉၼိုင်ႈလၢတ်ႈၼင်ႇၼႆ။
ၵဵဝ်ႇၵပ်းဢၼ်သမ်းယႃႈယႃႁႄႉၵင်ႈတၢင်းပဵၼ်တႄႉ ၾၢႆႇပၢႆးယူႇလီၵေႃႈလူင်းပိုၼ်ႉတီႈ သႂ်ႇႁႅင်းတိုၵ်းသူၼ်း၊ ၵူၼ်းမိူင်းၵေႃႈပွင်ႇၸႂ်သေမႃးသမ်းၼမ်ယူႇဝႃႈၼႆ။
“ၵူၼ်းမိူင်းၵေႃႈ ၶဝ်ႈၸႂ် ပွင်ႇၸႂ်ၼိူဝ်လွင်ႈတၢင်းပဵၼ်ၼႆႉသေ ယႃႈယႃၵေႃႈ ၸူဝ်းၵၼ်မႃးသမ်းၼမ်ယူႇ။ တီႈႁူင်းယႃၵေႃႈ ႁဝ်းၶႃႈ ပႂ်ႉသမ်းပၼ်။ ၵမ်ႈၽွင်ႈ ၽႄၸုမ်းလူင်းပိုၼ်ႉတီႈ ၵႂႃႇတၢင်းဝၢၼ်ႈတၢင်းသူၼ်သေ ၵူတ်ႇထတ်း၊ သမ်းၶဵမ်ႁႄႉၵင်ႈပၼ်ယူႇၵူႈဝၼ်းၼင်ႇၵဝ်ႇဢေႃႈ ” ၾၢႆႇပၢႆးယူႇလီ မိူင်းပၼ်ႇ သိုပ်ႇလၢတ်ႈၼင်ႇၼႆ။
ဝဵင်းလၢင်းၶိူဝ်း ဢၼ်ပဵၼ်ဝဵင်းၸႄႈတွၼ်ႈၼၼ်ႉၵေႃႈ တၢင်းပဵၼ်ၶူဝ်ႊဝိတ်ႉ ၵူတ်ႇထတ်း ထူပ်းႁၼ်ၵူႈဝၼ်း။ ယၢမ်းလဵဝ် ၵူၼ်းတိတ်းၸပ်းတၢင်းပဵၼ်မီး 300 ပၢႆ ။ တၢႆယွၼ်ႉတၢင်းပဵၼ်မီး 1 ၵေႃႉ၊ ပဵၼ်ၽူႈယိင်း လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ