ၵူၼ်းဝဵင်းပၢင်လူင်  ၽႂ် ဢမ်ႇသႂ်ႇၽႃႈတူမ်းသူပ်း Mask သေ ဢွၵ်ႇၼွၵ်ႈႁိူၼ်းယေး ၸိုင်ထုၵ်ႇႁွင်ႉတူဝ်ၵႂႃႇၵူတ်ႇထတ်း တၢင်းပဵၼ် ၶူဝ်ႊဝိတ်ႉ 19 တီႈႁူင်းယႃၵမ်းလဵဝ်။

တႄႇဢဝ်ဝၼ်းတီႈ 6/10/2021 ၼႆႉမႃး ယူႇတီႈႁွင်ႈၵၢၼ်လူင်ပွင်ၸိုင်ႈ ၾၢႆႇပၢႆးယူႇလီ ၾၢႆႇၵႅတ်ႇၶႄၾႆး ၾၢႆႇၸွႆႈထႅမ် ၸုမ်းပရႁိတ ၸိူဝ်းၼႆႉ  ပႂ်ႉၵူတ်ႇထတ်း ၵူၼ်းၵႂႃႇမႃး ၸွမ်းသဵၼ်ႈတႃႇသၢႆတၢင်းလူင် ၼႂ်းဝဵင်းလႄႈ ၸွမ်းၼႂ်းၵၢတ်ႇ ဝဵင်းပၢင်လူင် ၸႄႈဝဵင်းလွႆလႅမ် ၸိုင်ႈတႆး ပွတ်းၸၢၼ်း။ သင်ၽူႈလႂ် ၽႂ်ဢမ်ႇသႂ်ႇၽႃႈတူမ်းသူပ်း ဢွၵ်ႇႁိူၼ်းၸိုင် တေထုၵ်ႇႁွင်ႉ ၵႂႃႇၵူတ်ႇထတ်းၶူဝ်ႊဝိတ်ႉ 19 တီႈႁူင်းယႃ ၵမ်းလဵဝ် ၼႆယဝ်ႉ။

ၽူႈၸွႆႈထႅမ် ၼႂ်းၸုမ်းပရႁိတ ဝဵင်းပၢင်လူင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“တႄႇဢဝ် မိူဝ်ႈဝႃးမႃး ၸွမ်းသဵၼ်ႈတၢင်းလူင် ၸွမ်းၼႂ်း ၵၢတ်ႇ ၸိူဝ်းၼႆႉ ပႂ်ႉၵူတ်ႇထတ်း။ သင်ဝႃႈ  ဢမ်ႇသႂ်ႇၽႃႈ တူမ်းသူပ်း  ဢွၵ်ႇႁိူၼ်းမႃးၸိုင် တေႁွင်ႉပၼ်တၢင်းႁူႉသေ ယဝ်ႉၵေႃႈ ႁွင်ႉၵႂႃႇၵူတ်ႇထတ်းသေႇၶူးၼင် ၸႅတ်ႈတၢင်းပဵၼ် ၶူဝ်ႊဝိတ်ႉ 19 တီႈႁူင်းယႃၵမ်းလဵဝ်။   သင်ဝႃႈ   ဢမ်ႇယွမ်းၵူတ်ႇထတ်း သေႇၶူးၼင်ၸိုင် တေထုၵ်ႇၺႃးတၢမ်ႇငိုၼ်း 3 မိုၼ်ႇၶႃႈဢေႃႈ။ သင်ဝႃႈ ၵူတ်ႇထတ်းယဝ်ႉ ဢမ်ႇမီးမႅင်းၸိုင် တေႁဵတ်း ပၼ်ဝႂ် သင်ဢွၵ်ႇတႃႈ ဢွၵ်ႇတၢင်းၼႆၸိုင် ၸႂ်ႉဝႂ်ၼႆႉၼႄသေ ၵႂႃႇမႃးၵေႃႈလႆႈ”- ဝႃႈၼႆ။

ဢိင်ၼိူဝ် လွင်ႈၼႆႉ ၵူၼ်းမိူင်းပိုၼ်ႉတီႈ ဝဵင်းပၢင်လူင် ၵမ်ႈၼမ်တႄႉ ႁၼ်လီၸွမ်း ၼင်ႇႁိုဝ် တၢင်းပဵၼ်ပေႃးတေဢမ်ႇၽႄႈလၢမ်းႁၢဝ်ႈႁႅင်းသေ ပေႃးတေၵုမ်းၵမ်လႆႈ ဝႃႈၼႆ။

ယိင်းသႅင်ၼွင်ႉ ၵူၼ်းမိူင်း   ဝဵင်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ – “မၼ်းပဵၼ်တူဝ်ယၢင်ႇလီ ဢၼ်ၼိုင်ႈၶႃႈဢေႃႈ။ တေလႆႈဝႃႈ ပဵၼ် ဢၼ်လီတႄႉတႄႉ ပေႃးဝႃႈတႄႉၼႆ တင်းထုၵ်ႇလီႁဵတ်း ဢမ်ႇၸႂ်ႈဝႃႈၼႂ်းၵၢင်ဝဵင်းတီႈလဵဝ်ၵူၺ်း ပႂ်ႉၵူတ်ႇထတ်း ၸွမ်းၼင်ႇသဵၼ်ႈတၢင်း ၵိဝ်ႇဢွၼ်ႇ ၸိူဝ်းၼႆႉၵေႃႈ ထုၵ်ႇလီၵူတ်ႇထတ်းပႃးၶႃႈဢေႃႈ။ ယွၼ်ႉဝႃႈ ၵိဝ်ႇဢွၼ်ႇၸိူဝ်းၼႆႉ ဢၼ်တီႈဝႄႈမၼ်းၵေႃႈမီးၼမ် ပေႃးႁဵတ်းၸိူင်ႉၼႆ ၵူၼ်းဢမ်ႇၶႂ်ႈ သႂ်ႇၽႃႇတူမ်းသူပ်းသမ်ႉ တေၶႂ်ႈဝႄႈၵႂႃႇတၢင်ႇတၢင်းၵေႃႈလႆႈ သင်ပဵၼ်လႆႈတၢင်းလီပိၵ်ႉဢိုတ်းသေ ႁဵတ်းၵူႈၾၢႆႇၾၢႆႇ ပေႃးႁဵတ်းၸိူင်ႉၼႆ ၶဝ်ၸင်ႇ တေသတိလႆႈဢိူဝ်ႈ ပေႃးၶဝ်တေဢွၵ်ႇတၢင်းၼွၵ်ႈ”- ဝႃႈၼႆ။

မိူဝ်ႈဝႃးဝၼ်းတီႈ 6/10/2021 ၼၼ်ႉ ၼႂ်းဝဵင်းပၢင်လူင် ၵူၼ်းမိူင်း ဢမ်ႇသႂ်ႇၽႃႈတူမ်းသူပ်း ဢွၵ်ႇႁိူၼ်းယေးၵၼ် ထုၵ်ႇႁွင်ႉၵူတ်ႇထတ်း သေႇၶူး ၼင် ၸႅတ်ႈပၢႆးယူႇလီ တီႈႁူင်းယႃ ဝဵင်းပၢင်လူင် တင်းမူတ်း 50 ပၢႆ ဝႃႈၼႆ။  

လိူဝ်ၼၼ်ႉ တီႈၵၢတ်ႇလူင် ဝဵင်းပၢင်လူင်ၵေႃႈ တႄႇပိုတ်ႇပၼ် ၵူၼ်းမိူင်းသိုဝ်ႉၶဝ်ႈၶၢႆၵၼ် တႄႇမိူဝ်ႈဝႃး ဝၼ်းတီႈ 6 မႃး ပိုတ်ႇပၼ် ယၢမ်းၵၢင်ၼႂ် 7 မူင်း ထိုင် 10 မူင်းၵၢင်ၼႂ် ပၼ်ၶႂၢင်ႉၶၢႆ ၶွင်ၵိၼ်ယႅမ်ႉလႄႈ ယႃႈယႃ ၵႃႈၼႆႉၵူၺ်း လိူဝ်ၼၼ်ႉ ပႆႇပၼ်ၶႂၢင်ႉပိုတ်ႇ ၼႆယဝ်ႉ။

ၼႂ်းၸႄႈဝဵင်းလွႆလႅမ်ၼႆႉ ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၼႆႉ မီးၵႂႃႇ 809 ၵေႃႉ လူႉတၢႆယဝ်ႉ 20 ၵေႃႉ ယႃ ၶႅၼ်း 623 ၵေႃႉလႄႈ တိုၵ်ႉယူတ်းယႃ 166 ၵေႃႉ ၼႆယဝ်ႉ။