ယၢမ်းလဵဝ် ၼႂ်းၸႄႈဝဵင်းၵဵင်းတုင် ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 မီးၵႂႃႇ 4,280 ပၢႆယဝ်ႉ ၵမ်ႈၼမ် ၵူတ်ႇ ထတ်းႁၼ် ၵူၼ်းပိုၼ်ႉတီႈ တၢင်းသၢႆဝၢၼ်ႈၼွၵ်ႈၼႃးပၢင်ႇ ။
တႄႇဢဝ် ၵၢင်လိူၼ်သႅပ်ႊထႅမ်ႊပိူဝ်ႊမႃး တေႃႇထိုင် ဝၼ်းတီႈ 6/10/2021 ၼႆႉ ၸွမ်းမူႇဝၢၼ်ႈ/ ဢိူင်ႇ ပွတ်းသၢႆဝၢၼ်ႈၼွၵ်ႈၼႃးပၢင်ႇ ၼႂ်းၸႄႈ ဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ၵူတ်ႇထတ်းႁၼ် ၵူၼ်းပိုၼ်ႉတီႈ တိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ပုင်ႈၼမ်မႃးႁႅင်း။
ၵူၼ်းပိုၼ်ႉတီႈ ၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တၢင်းပဵၼ်ၼႆႉ ၵႂႃႇပဵၼ်ႁႅင်း တၢင်းသၢႆဝၢၼ်ႈၼွၵ်ႈၼမ်ၶႃႈဢေႃႈ။ ၼႂ်း ဝဵင်းတႄႉ မီးတႄႉမီးယူႇ ၵူၺ်းဢမ်ႇပေႃးပဵၼ် ၼမ်ၵႃႈႁိုဝ်ယဝ်ႉ။ မၢင်ၵေႃႉ ၵႂႃႇသိုဝ်ႉၶိူင်ႈၵူတ်ႇမၼ်းမႃးသေ မႃးၸႅတ်ႇတူၺ်းႁင်းၵူၺ်း ၽႂ်မၼ်း သင် ႁူႉဝႃႈ ပဵၼ်ၼႆၵေႃႈ ၵၵ်းတူဝ်ယူႇဝႆႉႁင်းၵူၼ်းၽႂ်မၼ်း ႁဵတ်းၼႆၵမ်ႈၼမ်ယဝ်ႉၼႂ်းဝဵင်းတႄႉ”- ဝႃႈၼႆ။
မိူဝ်ႈဝႃး ဝၼ်းတီႈ 6/10/2021 ၼႆႉ ၼႂ်းၸႄႈဝဵင်းၵဵင်းတုင် ၵူၼ်းထတ်းႁၼ်ထႅင်ႈ ၵူၼ်းတိတ်းၸပ်း 46 ၵေႃႉ။ ယဝ်ႉၵေႃႈ လူႉတၢႆ 1 ၵေႃႉ။ ၼႂ်း ၵူၼ်းပဵၼ် 46 ၵေႃႉၼၼ်ႉ ၵမ်ႈၼမ် ပဵၼ်ၵူၼ်းပိုၼ်ႉတီႈ ပွတ်းသၢႆၼွၵ်ႈၼႃးပၢင်ႇ တိတ်းၸပ်း 39 ၵေႃႉ ၼႂ်းဢိူင်ႇၵၢတ်ႇၾႃႉ၊ ၵၢတ်ႇတဝ်ႇ၊ မိူင်းၸဵမ်း၊ ယၢင်းလေႃး၊ ဝတ်ႉသၢဝ်း၊ မိူင်းလၢပ်ႈ၊ ယၢင်းၵဵင်၊ ပၢင်ၵိဝ်ႇ ၸိူဝ်းၼႆႉ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းဝဵင်းၼႆႉ ၶႂ်ႈဝႃႈ ပဵၼ်ၸေးၵၼ်ၵူႈဝၢၼ်ႈယဝ်ႉ။ ယၢမ်းလဵဝ် ၵူၼ်းပဵၼ်လူတ်းယွမ်းလူင်းၼမ်။ ၵူၺ်းၵႃႈ သမ်ႉၵႂႃႇၽႄႈလၢမ်းႁႅင်းတၢင်းသၢႆဝၢၼ်ႈၼွၵ်ႈၼႃးပၢင်ႇႁဝ်းၶႃႈ။ ယဝ်ႉၵေႃႈ ၸမ်လူဝ်ႇဢဝ်ၶဝ်ႈယဝ်ႉ လႄႈ လွင်ႈၼႆႉၵေႃႈ ပဵၼ်ဢၼ်ယၢပ်ႇၽိုတ်ႇတႃႇၵူၼ်းဝၢၼ်ႈၼွၵ်ႈၼႃးပၢင်ႇႁဝ်းၶႃႈတႄႉ၊ ယၢမ်းလဵဝ် ယူႇတီႈၾၢႆႇပၢႆးယူႇလီၶဝ် လူင်းၵူတ်ႇထတ်း ပၼ် ၸွမ်းဝၢၼ်ႈၼွၵ်ႈ ဝၢၼ်ႈၼိုင်ႈယဝ်ႉ ဝၢၼ်ႈၼိုင်ႈ ႁဵတ်းၼႆၵႂႃႇတိၵ်းတိၵ်းၶႃႈဢေႃႈၼႆႉ”- ဝႃႈၼႆ။
တီႈသုၼ်ၵၵ်းတူဝ် ၵူၼ်းပဵၼ်ၶူဝ်ႊဝိတ်ႉ 19 တီႈၸႄႈဝဵင်းၵဵင်းတုင်ၵေႃႈ ၸဝ်ႈတႃႇၼ ဢၼ်ႁပ်ႉလဵင်ႉလူ တႃႇၵူၼ်းပဵၼ် ၼၼ်ႉၵေႃႈ လူတ်းယွမ်းလူင်းၼမ်။ မီးပဵၼ်တႃႇ ၵၢတ်ႈပဵၼ်တႃႇ။ ယူႇတီႈပေႃႈမႄႈ ပီႈၼွင်ႉၵူၼ်းႁိူၼ်းၽႂ်မၼ်း ႁဵတ်းၶဝ်ႈၽၵ်းသေ ၵႂႃႇသူင်ႇႁင်းၵူၺ်း ၵေႃႈမီး။
“တၢင်းပဵၼ်ၶူဝ်ႊဝိတ်ႉ 19 တီႈၵဵင်းတုင်ၼႆႉ ပဵၼ်မႃးၶၢဝ်းတၢင်း 3 လိူၼ်ပၢႆယဝ်ႉ တီႈသုၼ်ၵၵ်းတူဝ် ၼၼ်ႉ ဢမ်ႇပေႃးမီးၵူၼ်းၵႂႃႇ ယဝ်ႉၶႃႈ။ သင် ပဵၼ်မႃးၵေႃႈ ယူတ်းယႃ တီႈႁိူၼ်း ႁင်းၵူၺ်းၽႂ်မၼ်း ။ ၸဝ်ႈတႃႇၼ ဢၼ်ၵႂႃႇလဵင်ႉလူ ၶဝ်ႈၼမ်ႉတၢင်းၵိၼ်ၵေႃႈ လူတ်းယွမ်းလူင်းၼမ် ဢမ်ႇပေႃး မိူၼ် မိူဝ်ႈၵူႈပွၵ်ႈယဝ်ႉ။ ဝၢႆးလင်ၼႆႉ ယူႇတီႈပေႃႈမႄႈပီႈၼွင်ႉၽႂ်မၼ်းႁဵတ်းၶဝ်ႈၽၵ်းသေ ၵႂႃႇသူင်ႇပၼ်ႁင်း ၵူၺ်းၵေႃႈမီးဢေႃႈ၊ မၢင်တႃႇၵေႃႈ မီး ၸဝ်ႈတႃႇၼ မၢင်တႃႇၵေႃႈ ဢမ်ႇမီးၶႃႈ” – ၵူၼ်းပိုၼ်ႉတီႈ ၵဵင်းတုင် ၵေႃႉၼိုင်ႈ လၢတ်ႈၼႄၼင်ႇၼႆ။
တႄႇဢဝ် လိူၼ်ႁၢင်လိူၼ်ၵျုၼ်ႊမႃး တေႃႇထိုင် ဝၼ်းတီႈ 6/10/2021 ၼႆႉ ၼႂ်းၸႄႈဝဵင်းၵဵင်းတုင် ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 မီးၵႂႃႇ 4,289 ၵေႃႉ၊ လူႉတၢႆ 79 ၵေႃႉ၊ ယႃၶႅၼ်း 3,484 ၵေႃႉလႄႈ တိုၵ်ႉယူတ်းယႃ 726 ၵေႃႉ သိုဝ်ႉၶၢဝ်ႇၼႂ်းပိုၼ်ႉတီႈ ၵဵင်းတုင် ဢွၵ်ႇဝႆႉၼင်ႇၼႆ။
