မိူဝ်ႈၼႆႉ ဝၼ်းတီႈ 16/6/2026 ယေးငိုၼ်းလုမ်ႈၾႃႉ ပိုၼ်ၽၢဝ်ႇဢွၵ်ႇဝႃႈ ယွၼ်ႉပၼ်ႁႃပတိၵ်ႈၶၢတ်ႈ ပိုၼ်ႉတီႈတႃဝၼ်းဢွၵ်ႇၵၢင် လႄႈ ပၢင်တိုၵ်းသိုၵ်းသိူဝ် ၼႂ်းမိူင်းသေ ၵႃႈၶၼ်ငိုၼ်းမၢၼ်ႈ ၽိူဝ်ႈၶိုၼ်ႈမႃးထႅင်ႈလိူဝ်ၵဝ်ႇ 25% ၼႆယဝ်ႉ။

တႄႇပီ 2021 သိုၵ်းမၢၼ်ႈယိုတ်းမိူင်းမႃး ၼႂ်းၶၢဝ်းတၢင်း 5 ပီ ငဝ်းလၢႆးၼႂ်းမိူင်းႁူမ်ႈတုမ်ဢမ်ႇၼိမ်တဵင်ႈ ၵိူတ်ႇပဵၼ်ပၢင်တိုၵ်းသိုၵ်းသိူဝ် ႁဵတ်းႁႂ်ႈၵူၼ်းမိူင်းၸိူဝ်းယူႇ ၼႂ်းပိုၼ်ႉတီႈ မွၵ်ႈ 50 လၢၼ်ႉပၢႆ ယဵၼ်းပဵၼ်ၵူၼ်းၵွတ်းၽၢၼ် တူၵ်းယၢၵ်ႈယၢပ်ႇၽိုတ်ႇၵိၼ်းၸႂ်။

ၸွမ်းၼင်ႇၶေႃႈမုလ်း ၸိူဝ်းပိုၼ်ၽၢဝ်ႇဢွၵ်ႇဝႆႉပဵၼ်တၢင်းၵၢၼ်သေ မိူင်းမၢၼ်ႈၼႆႉ လႆႈၸႂ်ယႂ်ႇ ၼမ်ႉမၼ်းမဵၼ် တီႈၼွၵ်ႈမိူင်းဝႆႉ တႃႇ 90% (ဝၢၵ်ႈ)။ မိူဝ်ႈဝၼ်းတီႈ 28 လိူၼ်ၾႅပ်ႊပိဝ်ႊရီႊပူၼ်ႉမႃးၼၼ်ႉ ယွၼ်ႉၸိုင်ႈမိူင်းဢမေႊရိၵၼ်ႊ တင်း ဢီႊရၼ်ႊ ပဵၼ်ပၢင်တိုၵ်းၵၼ်သေ သဵၼ်ႈတၢင်းၼမ်ႉႁေႃႊမူတ်ႊသ် ပိၵ်ႉဢိုတ်းၵႂႃႇ၊ လွင်ႈၼႆႉ တုမ်ႉယွၼ်းပႃးၼိူဝ်မိူင်မၢၼ်ႈႁၢဝ်ႈ ႁႅင်း ၼႆယဝ်ႉ။

ၸုမ်းပၵ်းတႃပႂ်ႉတူၺ်းၵၢၼ်မၢၵ်ႈမီးမိူင်းမၢၼ်ႈ (Myanmar Economic Monitor) ၵေႃႈ ႁဵတ်းၽိုၼ်လိၵ်ႈႁၢႆးငၢၼ်းဢွၵ်ႇဝႆႉဝႃႈ – မိူဝ်ႈပူၼ်ႉမႃးလိူၼ်ဢေႊပရႄႇ ၼႂ်းၶၢဝ်းတၢင်းပီလဵဝ်ၵူၺ်း ၵႃႈၶၼ်ငိုၼ်းၽိူဝ်းၶိုၼ်ႈၵႂႃႇထိုင် 24.6% သေ ၵၢၼ်မၢၵ်ႈမီးမိူင်းမၢၼ်ႈၼႆႉ “ၼိမ်တဵင်ႈဝႆႉယူႇတီႈၵဝ်ႇ” ၼႆ ယေးငိုၼ်းလုမ်ႈၾႃႉပိုတ်ႇလၢတ်ႈသေတႃႉ “ပၼ်ႁႃၼမ်ႉမၼ်းၸၢၵ်ႈၼႆႉ ႁဵတ်း ႁႂ်ႈတုမ်ႉယွၼ်ႈထိုင် ၵၢၼ်မၢၵ်ႈမီးၼႂ်းမိူင်းတေႉတေႉသေ ၸၢင်ႈႁဵတ်းႁႂ်ႈၶူင်းသၢင်ႈၵၢၼ်ၵႄႈလိတ်ႈပၼ်ႁႃမႂ်ႇမႂ်ႇ ဢမ်ႇယိုၼ်းယၢဝ်းလႆႈႁိုင် ထိုင်တီႈလႆႈမႆႈၸႂ်တႃႇမိူဝ်းၼႃႈ” ဝႆႉယူႇ – ဝႃႈၼႆ။

ၼႂ်းၽိုၼ်လိၵ်ႈႁၢႆးငၢၼ်း ယေးငိုၼ်းလုမ်ႈၾႃႉၼၼ်ႉ ပႃးဝႆႉဝႃႈ – ၼႂ်းပီ 2025 ပူၼ်ႉမႃးၼႆႉ လွင်ႈၵွတ်း ၽၢၼ် ၼႂ်းမိူင်းမၢၼ်ႈ မီးထိုင်ႁိမ်းၸမ် 30%။ သင်တႅၵ်ႈၵၼ်တင်းငဝ်းလၢႆး ၵွၼ်ႇ ၼႃႈပီ 2021 ၼၼ်ႉၸိုင် ပဵၼ်ဢၼ်ၶိုၼ်ႈသုင်မႃးႁႅင်းတေႉတေႉ ၼႆယဝ်ႉ။