ၸဝ်ႈတူၼ်ၶူး ၵလျႃႇၼဝမ်ႇသ ၵျွင်းယွတ်ႈ ၵျွၵ်ႉမႄးလွၼ်ႇတဵမ် 3 ပီ ပႆႇၺွပ်းလႆႈၵူၼ်းႁၢႆႉ

ၸဝ်ႈတူၼ်ၶူး ၵလျႃႇၼဝမ်ႇသ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၺႃးၵူၼ်းႁၢႆႉၶဝ်ႈယိုဝ်းထိုင်ၼႂ်းဝတ်ႉၵျွင်းသေ လူႉလွၼ်ႇၶဝ်ႈသူၼ်မၢၵ်ႇႁၢၵ်ႈၶမ်းတဵမ် 3 ပီယဝ်ႉသေတႃႉ ပႆႇတီႉၺွပ်းလႆႈ တူဝ်ၵူၼ်းႁၢႆႉ  ။

ဝၼ်းတီႈ 5/10/2021 ၸဝ်ႈတူၼ်ၶူး ၵလျႃႇၼဝမ်ႇသ ၽူႈၵွၼ်းဝတ်ႉၵျွင်းယွတ်ႈ (သူၺ်ႇၵျိၼ်ႇ) ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ လူႉလွၼ်ႇတဵမ် 3 ပီ  ၵူၼ်းမိူင်းၵျွၵ်ႉမႄး  ၽူႈတူင်ႉၼိုင် ၼႂ်းတူင်ႇဝူင်းၵူၼ်း ဢွၼ်ၵၼ်ငိၼ်းသေလၢႆမွင်ၸႂ်ၸွမ်း လႄႈၶႂ်ႈႁႂ်ႈတီႉၺွပ်းၵူၼ်းႁဵတ်းႁၢႆႉႁႂ်ႈလႆႈ ၼႆ ယဝ်ႉ။

လုင်းၸၢႆးၵူး ၽူႈတူင်ႉၼိုင် ၼႂ်းတူင်ႇဝူင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ၵမ်းၼႆႉ ၽိူဝ်ႇထိုင်ပၢၼ်ႁဝ်းမႃးယဝ်ႉ ၼႆၵေႃႈ ၸဝ်ႈသြႃႇဢၼ် ၵတ်ႉဢၼ်ၶႅၼ်ႇမၼ်း ပေႃႇဢွၵ်ႇမႃးယဝ်ႉ ႁဵတ်းသင်လႄႈ မၼ်းၸဝ်ႈလႆႈလူႉသုမ်းၵႂႃႇ၊ ႁဵတ်းသင်လႄႈ ၵူၼ်းဢၼ်မိူၵ်ႈ ၵူၼ်းဢၼ်ဢမ်ႇႁၼ် လီၼၼ်ႉသမ်ႉမႃးယိုဝ်းတၢႆၵႂႃႇၼႆႉတႄႉ ယူႇတီႈၵူၼ်းမိူင်း သေဢမ်ႇၵႃး ၸုမ်းတူင်ႇဝူင်းၵူၼ်း တင်းပတ်းပိုၼ်ႉ ဢွၼ်ၵၼ်မွင်ၸႂ်သေလၢႆ ဢမ်ႇလူင် ဢမ်ႇလိုမ်းၸွမ်းမၼ်းၸဝ်ႈလႆႈ”- ဝႃႈၼႆ။

ၸဝ်ႈတူၼ်ၶူးၵလျႃႇၼဝမ်ႇသၼႆႉ ပဵၼ်ၸဝ်ႈတူင်ႉၼိုင် ၼႂ်းၵၢၼ်ၽႃႇသႃႇ၊ သႃႇသၼႃႇလႄႈ ၵၢၼ်ပၢႆးပၺ်ႇၺႃႇမႃး။ ယဝ်ႉၵေႃႈ ယၢမ်ႈဢွၼ်ႁူဝ် တႄႇတင်ႈပႃး ၵၢၼ်ၸွႆႈထႅမ် တူင်ႇဝူင်းၵူၼ်း ၸိူဝ်းၼႆႉသေ လွင်ႈမၼ်းၸဝ်ႈလႆႈလွၼ်ႇၵႂႃႇၼႆႉ ပဵၼ်ဢၼ်လႆႈလူႉသုမ်းၽူႈဢွၼ်ႁူဝ်ၵတ်ႉၶႅၼ်ႇၵႂႃႇ ၸဝ်ႈၼိုင်ႈ ၼႆယဝ်ႉ။

လုင်းၸၢႆးလႅင်းႁၢၼ် ႁူဝ်ပဝ်ႈ ၵေႃလိၵ်ႈလၢႆး ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ ငိၼ်းၶေႃးၶူမ် သေလၢႆၸွမ်းတႄႉတႄႉၶႃႈ။ မိူၼ် ႁဝ်းၶႃႈ လႆႈတူၵ်းသုမ်း ၽူႈဢွၼ်ႁူဝ်လီၸဝ်ႈၼိုင်ႈယဝ်ႉ။ ၵွပ်ႈသင်ၼႆ ႁႂ်ႈမၼ်းပေႃးမိူၼ်ၸဝ်ႈႁဝ်းၶဝ် ႁဵတ်းသၢင်ႈၸိူင်ႉၼႆၼႆႉ မၼ်းဢမ်ႇမီးၼမ် ၶႃႈ။ ပေႃးဢဝ်ၵႂၢမ်းမိူဝ်ႈၵွၼ်ႇဝႃႈတႄႉ မႆႉၼိုင်ႈတူၼ်ႈလီၵေႃႈ ၼူၵ်ႉမိုၼ်ႇတူဝ်လႆႈ ပိုင်ႈႁူမ်ႈၼၼ်ႉၼႃႇ ဢၼ်ၼႆႉ မၼ်းမိူၼ်မႆႉတူၼ်ႈလူင် ဢၼ်ၼိုင်ႈ ၵူၼ်ႇပင်းၵႂႃႇ လူႉၵႂႃႇ ဢၼ်ႁဝ်းၶႃႈ ၸိူဝ်းလႆႈပိုင်ႈဢိင်ႁူမ်ႈမၼ်းၸဝ်ႈၸိူဝ်းၼႆႉ မီးတၢင်းယၢပ်ႇၸႂ်ၵႂႃႇၵူႈလွင်ႈၵူႈတၢင်းၼၼ်ႉယဝ်ႉ”- ဝႃႈၼႆ။

ၵဵဝ်ႇလူၺ်ႈဝၼ်း ၸဝ်ႈတူၼ်ၶူး ၵလျႃႇၼဝမ်ႇသ လွၼ်ႇၵႂႃႇတဵမ် 3 ပီယဝ်ႉၼႆသေ ယူႇတီႈၵူၼ်းမိူင်း ၼႂ်းၸႄႈဝဵင်းၵျွၵ်ႉမႄးႁူမ်ႈၵၼ် ၵၢပ်ႈသွၼ်း လူႇတၢၼ်းပၼ် ၼႂ်းဝၼ်းတီႈ 5-6/10/2021 ၼႆႉ ။ ၵူၼ်းၼုမ်ႇ လႄႈၸုမ်းတူင်ႇဝူင်းၵူၼ်းမီးၵၢင်ၸႂ်ၶႂ်ႈႁႂ်ႈၽူႈမီးပုၼ်ႈၽွၼ်းၶူၼ်ႉႁႃတီႉၺွပ်းၵူၼ်းႁဵတ်းၽိတ်း ၼၼ်ႉယူႇဝႃႈၼႆ။

တႄႇဢဝ် ၼႂ်းပီ 2017-2018 ၼၼ်ႉမႃး ၼႂ်းၸႄႈဝဵင်းၵျွၵ်ႉမႄးၼႆႉ ၵႆႉမီးၵူၼ်းလၵ်ႉယိုဝ်းၵႃးတၢင်ႇၶူဝ်းၵုၼ်ႇလႄႈဝူဝ်းၵႂၢႆးလတ်းၵႂႃႇမႃး၊ ၵႆႉမီးၵူၼ်းလၵ်ႉယိုဝ်းၵူၼ်းမိူင်းတၢႆ။ လိူဝ်ၼၼ်ႉယင်းမီးၵူၼ်းႁတ်းယိုဝ်း သင်ၶရႁၢၼ်း ၊ ၸဝ်ႈၼင်ႈဝတ်ႉၵျွင်း၊ ၶဝ်ႈယိုဝ်းထိုင်ၼႂ်း ၵုတိ သင်ၶၸဝ်ႈၵေႃႈမီး။ 

  ၼႂ်းၸႄႈတွၼ်ႈၵျွၵ်ႉမႄးၼႆႉ ပဵၼ်ပိုၼ်ႉတီႈမီး ၸုမ်းယိပ်းၵွင်ႈၵၢင်ႇၼမ်၊   ၵူၼ်းဢၼ်ပိုတ်းယိုဝ်းၶႃႈႁႅမ်ပိူၼ်ႈၼၼ်ႉၵေႃႈ ဢမ်ႇမီးၽႂ်ၸုမ်းလႂ် တီႉၺွပ်းဢဝ်မႃးပၼ်တူတ်ႈတၢမ်ႇလႆႈသေပွၵ်ႈ။