ၸဝ်ႈၼႃးၵဵင်းတုင် ဢွၼ်ၵၼ်မႆႈၸႂ် ၵူဝ်ဢမ်ႇမီးၵူၼ်းႁပ်ႉၸၢင်ႈ ႁဵတ်းၼႃး ယွၼ်ႉတၢင်းပဵၼ်ၶူဝ်ႊဝိတ်ႉ 19 တိုၵ်ႉၽႄႈ လၢမ်းႁႅင်း ဝႃႈၼႆ။
တၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ် ၽႄႈလၢမ်းႁႅင်း ၼႂ်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ႁၢၼ်ႉတေႃႇထိုင် ဝၼ်းတီႈ 5/10/2021 ၼႆႉ မီးၵူၼ်းတိတ်းၸပ်းၵႂႃႇယဝ်ႉ 4,240 ပၢႆ လူႉတၢႆ 78 ၵေႃႉ ၸဝ်ႈသူၼ်ၼႃး ၵမ်ႈၼမ် ဢွၼ်ၵၼ်မႆႈၸႂ် ၵူဝ်ဢမ်ႇမီးၵူၼ်းႁပ်ႉၵိၼ်ၸၢင်ႈ ႁဵတ်း ၵၢၼ် ၼႆယဝ်ႉ။
ၸဝ်ႈၼႃး ၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈၵဵင်းတုင်ၼႆႉ ပေႃးဢွၵ်ႇဝႃႇသႃယဝ်ႉ တေဢွၼ်ၵၼ်ပၢတ်ႇၶဝ်ႈ ပုမ်ႇၶဝ်ႈ ပေႃႉၶဝ်ႈ ၵၼ် ၵမ်ႈၼမ်ယဝ်ႉ ။ ၽွင်းယၢမ်းၼႆႉသမ်ႉ တၢင်းပဵၼ်ၶူဝ်ႊဝိတ်ႉ 19 ၵေႃႈ တိုၵ်ႉၽႄႈလၢမ်းႁႅင်းၼႆ ပဵၼ်ဢၼ်ယၢပ်ႇၽိုတ်ႇ တႃႇၸၢင်ႈၵူၼ်းႁဵတ်း ၵၢၼ်။ သင် ဢမ်ႇမီးၵူၼ်းႁပ်ႉၸၢင်ႈၼႆ ၶဝ်ႈၼႆႉ တေတူၵ်းလႃႈတူၵ်းလိုၼ်းသေ တေၸၢင်ႈသုမ်းၶႃႈဢေႃႈ။ ဢၼ်ႁဝ်းၶႃႈ မႆႈၸႂ် ၼၵ်းၸႂ်ယူႇၼႆႉ တႄႉ ၵူဝ်ဢမ်ႇ မီးၵူၼ်းႁပ်ႉၸၢင်ႈၼၼ်ႉၵူၺ်း။ ပေႃးမီးၼႆၵေႃႈ တေလႆႈၸၢင်ႈၵႃႈၶၼ်သုင်ၼၼ်ႉယဝ်ႉ”- ဝႃႈၼႆ။
ယၢမ်းလဵဝ် ၼႂ်းၸႄႈဝဵင်းၵဵင်းတုင်ၼႆႉ ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၼႆႉသမ်ႉ ၵမ်ႈၼမ် ၵူတ်ႇထတ်းႁၼ် တၢင်းသၢႆဝၢၼ်ႈ ၼွၵ်ႈၼႃးပၢင်ႇ ၼႆယဝ်ႉ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပေႃးတူၺ်း ငဝ်းလၢႆးၸဝ်ႈၼႃးၶဝ် တေလႅပ်ႈမီးတၢင်းယၢပ်ႇ ၽိုတ်ႇၵၼ်ၼမ်ၶႃႈဢေႃႈ။ ႁဵတ်းသင်လႄႈၼႆ တၢင်းသၢႆဝၢၼ်ႈၼွၵ်ႈၼႃးပၢင်ႇၼႆႉသမ်ႉ ဢွၼ်ၵၼ်တိတ်းၸပ်းၸိူဝ်ႉမႅင်းတၢင်းပဵၼ်ၵၼ်ၼမ်ၶႃႈ ဢေႃႈ။ ပေႃးပဵၼ်ၵေႃႈ ပဵၼ်တင်းဝၢၼ်ႈ တင်းဝၢၼ်ႈႁဵတ်းၼႆ ၵွပ်ႈၼႆလႄႈ ပေႃးတေဢဝ်ၶဝ်ႈၼႂ်းၼႃးၸိုင် တေပဵၼ်ဢၼ်ယၢပ်ႇၽိုတ်ႇတႃႇၵူၼ်း ဝၢၼ်ႈၼႃးပၢင်ႇႁဝ်းၶႃႈ တႄႉတႄႉဢေႃႈ”- ဝႃႈၼႆ။
ဢိင်ၼိူဝ် လွင်ႈတၢင်းပဵၼ်ၶူဝ်ႊဝိတ်ႉ 19 ၼႆႉသေ ၸဝ်ႈၼႃးမၢင်ၵေႃႉတႄႉ သင်ဢမ်ႇမီးၵူၼ်း ႁပ်ႉၸၢင်ႈ ၵႃႈလႆႈဢဝ်ႁႅင်းၵူၼ်းၼႂ်းႁိူၼ်း ယေးၽႂ်မၼ်းသေ ၸွႆႈၵၼ်ၵႂႃႇ ၼိုင်ႈဝၼ်း ၼိုင်ႈဢိတ်း ႁဵတ်းၼၼ်ႉၵႂႃႇဢဝ်ၵူၺ်း ၸဝ်ႈၼႃး ၵဵင်းတုင် သိုပ်ႇလၢတ်ႈၼႄၼင်ႇၼႆ။
“တိူၵ်ႈတီႈဝႃႈ ဢမ်ႇမီးၵူၼ်းႁပ်ႉၸၢင်ႈ/ ၵိၼ်ၸၢင်ႈယဝ်ႉၼႆ ၵႃႈလႆႈဢဝ်ၵူၼ်းၼႂ်းႁိူၼ်းယေးၽႂ်မၼ်းသေ ၵႂႃႇပၢတ်ႇ ၵႂႃႇၵွင် ၵႂႃႇပေႃႉ ၵမ်းဢိတ်း ဢိတ်းဢဝ်ၵူၺ်းယဝ်ႉ။ ပေႃးမီးၵူၼ်းႁပ်ႉၸၢင်ႈၼႆ ပၢတ်ႇၶဝ်ႈ ဝၼ်းၼိုင်ႈ၊ ၵွင်/ ပုမ်ႇဝၼ်းၼိုင်ႈလႄႈ ပေႃႉၶဝ်ႈဝၼ်းၼိုင်ႈ ဢမ်ႇၼၼ် 2 ဝၼ်း ၸႂ်ႉၶၢဝ်းတၢင်း 4-5 ဝၼ်းၵေႃႈယဝ်ႉမူတ်း။ သင်ဝႃႈ ႁဵတ်းႁင်းၵူၺ်းၼႆ ၸႂ်ႉၶၢဝ်းယၢမ်းႁိုင်သေ ၶဝ်ႈၼႂ်းၼႃး ၸၢင်ႈသုမ်းၼၼ်ႉၶႃႈယဝ်ႉ။ သင်ဝႃႈ ၸၢင်ႈလႆႈၵူၼ်းမႃးၸွႆႈၼႆ ႁဝ်းၶႃႈ ဝူၼ်ႉဝႆႉ တေၶတ်းၸႂ် ယူႇႁၢင်ႇၵၼ် ဢွၼ်ၵၼ်သႂ်ႇၽႃႈတူမ်းသူပ်းသေ ႁဵတ်းၵၢၼ်။ ၵႃႈလႆႈႁဵတ်းၸိူင်ႉၼၼ်ၶႃႈ ဢေႃႈ”- ဝႃႈၼႆ။
ၼႂ်းၸႄႈဝဵင်းၵဵင်းတုင် တေႃႇထိုင် ဝၼ်းတီႈ 5/10/2021 ၼႆႉ မီးၵူၼ်းတိတ်းၸပ်း ၸိူဝ်ႉမႅင်း 4,243 ၵေႃႉ၊ လူႉတၢႆ 78 ၵေႃႉ၊ ယႃၶႅၼ်း လူင်းႁူင်း ယႃ 3,413 ၵေႃႉလႄႈ တိုၵ်ႉယူတ်းယႃ 752 ၵေႃႉ သိုဝ်ႇၶၢဝ်ႇၼႂ်းပိုၼ်ႉတီႈ ၵဵင်းတုင်ဢွၵ်ႇဝႆႉၼင်ႇၼႆ။
