တႃႇ ႁေႉၵင်ႈတၢင်းပဵၼ်ၶူဝ်ႊဝိတ်ႉ 19 ၼင်ႇႁိုဝ်ပေႃးတေဢမ်ႇၽႄႈလၢမ်းႁၢဝ်ႈႁႅင်းၼၼ်ႉၼႆသေ ယူႇတီႈ SSPP တေ Lockdown ငဝ်ႈ ငုၼ်းဝႆႉဝၢၼ်ႈႁႆးဝႆႉ ၸူဝ်ႈၶၢဝ်း တႃႇၶၢဝ်းတၢင်း 2 ဝူင်ႈ ဝႃႈၼႆ။
မိူဝ်ႈဝႃး ဝၼ်းတီႈ 4/10/2021 ယူႇတီႈၵေႃႇမတီႇၵႅတ်ႇၶႄႁေႉၵင်ႈ တၢင်းပဵၼ်ၶူဝ်ႊဝိတ်ႉ 19 (ငဝ်ႈငုၼ်း) ပိုၼ်ၽၢဝ်ႇဢွၵ်ႇမႃးဝႃႈ တေပိၵ်ႉဢိုတ်း Lockdown ဝၢၼ်ႈႁႆးတႃႇၶၢဝ်းတၢင်း 2 ဝူင်ႈ တႄႇဢဝ်ဝၼ်းတီႈ 7 ထိုင် 21/10/2021 တႃႇတေၵႅတ်ႇၶႄႁႄႉၵင်ႈလႆႈ တၢင်းပဵၼ်ၶူဝ်ႊဝိတ်ႉ 19 ။ ဢၼ်ထုၵ်ႇႁၢမ်ႈၶဝ်ႈဢွၵ်ႇၵႂႃႇမႃး ၊ ႁၢမ်ႈဢွၵ်ႇႁိူၼ်းယေးၼႆႉပဵၼ် ၼႂ်းဝဵင်းမႂ်ႇဝၢၼ်ႈႁႆး မိူၼ်ၼင်ႇ ဝၢၼ်ႈပၢင်ႇလေႃႉ၊ ဝၢၼ်ႈၵၢင်၊ ပၢင်ၶၢၼ်၊ ဝၢၼ်ႈၵႃႈ၊ မႆႉၺွင်ႇၵူင်း၊ ၼွင်ႁီး၊ ပၢင်ႇၼႃးၼွင်၊ ၼႂ်းၵၢင် ဝဵင်း ၸိူဝ်းၼႆႉ တေဢမ်ႇလႆႈဢွၵ်ႇၼွၵ်ႈဝၢင်းႁိူၼ်း ၵႂႃႇမႃးၼႂ်းၵိဝ်ႇ/ ပွၵ်ႉ ၼႂ်းဝဵင်း ၸူဝ်ႈၶၢဝ်းလွၵ်ႉတွင်း ဝႃႈၼႆ။
ၸဝ်ႈသိုၵ်း သႅင်ႁၢၼ် ၵေႃႇမတီႇၵႅတ်ႇၶႄႁေႉၵင်ႈ ၶူဝ်ႊဝိတ်ႉ 19 (ငဝ်ႈငုၼ်း) လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈယဝ်ႉၶႃႈ ပေႃးထိုင်ဝၼ်းတီႈ 7 ၼႆႉ တေလွၵ်ႉတွင်းၵႂႃႇယဝ်ႉ တီႈငဝ်ႈငုၼ်း တႃႇၶၢဝ်းတၢင်း 2 ဝူင်ႈ။ လွၵ်ႉတွင်းဢၼ်ဝႃႈၼၼ်ႉ ဢမ်ႇၸႂ်ႈဝႃႈ ပိၵ်ႉဢိုတ်းဢမ်ႇပၼ်ၵူၼ်းၵႂႃႇမႃးပႅတ်ႈၸိူင်ႉ ၼၼ် ။ တႃႇၵူၼ်းႁဵတ်းႁႆႈႁဵတ်းၵၢၼ် ပေႃးတေၸၢင်ႈၵႂႃႇမႃးလႆႈ တေပိုတ်ႇပၼ် ပဵၼ်ၶၢဝ်းယၢမ်း ၵၢင်ၼႂ်ၵမ်ႉၼိုင်ႈ ႁူဝ်ၶမ်ႈၵမ်ႉၼိုင်ႈ ။ ယိူင်းဢၢၼ်းတႃႇၵုမ်းၵမ် တၢင်းပဵၼ်ၶူဝ်ႊဝိတ်ႉ 19 ပေႃးတေဢမ်ႇၽႄႈလၢမ်းႁႅင်း”- ဝႃႈၼႆ။
တႃႇဢွၵ်ႇႁိူၼ်းၼၼ်ႉသမ်ႉ တေပၼ်ၶႅပ်းဝႂ် ၼိုင်ႈႁိူၼ်းၼိုင်ႈၶႅပ်း၊ တေလႆႈပႃးၶႅပ်းဝႂ်ၵႂႃႇၸွမ်း ၸင်ႇၵႂႃႇမႃးလႆႈ ၸွမ်း ၼင်ႇၶၢဝ်းတၢင်းမၵ်းတမ်းဝႆႉ၊ ၶႅပ်းဝႂ်ၼိုင်ႈဢၼ်ၼႆႉ ၸႂ်ႉလႆႈတႃႇၼိုင်ႈၵေႃႉၵူၺ်း။ လုၵ်ႈဢွၼ်ႇတိုၼ်းတေ ဢမ်ႇလႆႈဢွၵ်ႇတင်းၼွၵ်ႈ ဝႃႈ ၼႆ။
ၼႂ်းၶၢဝ်းယၢမ်းလွၵ်ႉတွင်းၼႆႉ ၵူၼ်းမိူင်း/ ၵူၼ်းသိုၵ်း တေလႆႈႁဵတ်းၸွမ်းၵူႈၵေႃႉ သင်ဝႃႈ ဢမ်ႇႁဵတ်းၸွမ်း မီးလွင်ႈပူၼ်ႉပႅၼ်ၸိုင် တေ လႆႈၶၢမ်ႇတၢင်းဢဝ်လိူင်ႈၵၼ်ၵႂႃႇ ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉပႃးထႅင်ႈဝႃႈ ၶၢဝ်းယၢမ်းႁၢမ်ႈဢွၵ်ႇတၢင်းၼွၵ်ႈ တႄႇဢဝ် 9 မူင်းၵၢင်ၼႂ် တေႃႇထိုင် 4 မူင်းဝၢႆးဝၼ်း။ တႄႇဢဝ် 7 မူင်းၵၢင်ၶမ်ႈ တေႃႇထိုင် 5 မူင်းၵၢင်ၼႂ်။
ၶၢဝ်းယၢမ်းပၼ်ၶႂၢင်ႉဢွၵ်ႇၼွၵ်ႈဝၢင်းႁိူၼ်းသမ်ႉ ၵၢင်ၼႂ် 5 မူင်း ထိုင် 9 မူင်း ၊ ၶၢဝ်းယၢမ်း ႁူဝ်ၶမ်ႈ 4 မူင်း တေႃႇထိုင် 7 မူင်း ဝႃႈၼႆ။
တၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ်ၼႆႉသေ တီႈဝၢၼ်ႈႁႆး လႆႈၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 မီးၵႂႃႇ 100 ပၢႆ လူႉတၢႆယဝ်ႉ 2 ၵေႃႉ။ ယဝ်ႉၵေႃႈ ၼႂ်းၼႃႈတီႈၵုမ်းၵမ် ဝၢၼ်ႈႁႆး SSPP ဢၼ်လႆႈလူင်းသမ်းယႃႁႄႉၵင်ႈၶူဝ်ႊဝိတ်ႉ 19 ပၼ်ၵႂႃႇသမ်ႉ မီးႁူဝ်ၵူၼ်း 3 ႁဵင်ပၢႆယဝ်ႉ ၸဝ်ႈသိုၵ်း သႅင်ႁၢၼ် လၢတ်ႈၼႄၼင်ႇၼႆ။
ၼႂ်းပီ 2021 ၼႆႉ တီႈငဝ်ႈငုၼ်းၵေႃႈ ၼင်ႇႁိုဝ် တၢင်းပဵၼ် ပေႃးတေဢမ်ႇၽႄႈလၢမ်းႁၢဝ်ႈႁႅင်းၼႆႉ ပေႃႈမႄႈ ၵူၼ်း မိူင်း ၵူၼ်းသိုၵ်း ယႃႇပေဝႆႉမဝ်မၢင်၊ ႁႂ်ႈဢွၼ်ၵၼ်သမ်းယႃႁႄႉၵင်ႈၶူဝ်ႊဝိတ်ႉ 19 ၊ ယဝ်ႉၵေႃႈ ႁႂ်ႈႁူမ်ႈမိုဝ်းတၢင်း ၽူႈမီးပုၼ်ႈၽွၼ်း ၵူႈၸၼ်ႉ ၸၼ်ႉသေ ၵႅတ်ႉၶႄႁႄႉၵင်ႈၵႂႃႇၸွမ်းၵၼ်ၸိုင် ၸင်ႇတေလွတ်ႈၽႄးယၢၼ်ၵႆ တၢင်းပဵၼ်လူင်ၼႆႉၵႂႃႇဢမ်ႇႁၢၼ်ႉ ၸဝ်ႈသိုၵ်းသႅင်ႁၢၼ် သိုပ်ႇတိုၵ်း သူၼ်းလၢတ်ႈၼႄၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ