ဝၼ်းတီႈ 8 – 13/11/2025 ၼႆႉ ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး SSPP/SSA  ၸတ်းပၢင်ၵုမ်လူင် ၵွၼ်ႇၵရႅတ်ႉ ပွၵ်ႈၵမ်း 5 တီႈဝၢၼ်ႈႁႆး ယဝ်ႉတူဝ်ႈသေ ဢွၵ်ႇလိၵ်ႈပိုၼ်ၽၢဝ်ႇဝႆႉပဵၼ်တၢင်းၵၢၼ် ။ ၼႂ်းၼၼ်ႉ ပႃးလွင်ႈ ၶတ်းလိူၵ်ႈၸုမ်းႁူဝ်ပဝ်ႈ လႄႈၸုမ်းပွင်ၵၢၼ်။ လွင်ႈၽဵဝ်ႈလၢင်ႉၵျႃႊၽျႅၼ်ႉ ၸဵမ်ၸိူဝ်းၼႆႉ။ မီးလွင်ႈလႅၵ်ႈလၢႆႈလၢၵ်ႇလၢႆးၸိူင်ႉႁိုဝ်လၢႆလၢႆ။ ၽႂ်ပဵၼ်မႃးၼႂ်းၸုမ်းၽူႈၼမ်း။ ၸုမ်းၶၢဝ်ႇၽူႈတွႆႇႁွၵ်ႈ လႆႈဢုပ်ႇဢူဝ်းတွင်ႈထၢမ် ၸဝ်ႈသိုၵ်းၽုင်းႁၢၼ် ၽူႈၶၢၼ်ပၢၵ်ႇ SSPP ဝႆႉၼင်ႇၼႆၶႃႈဢေႃႈ။

ထၢမ် – မႂ်ႇသုင်ၶႃႈ ၼႂ်းလိၵ်ႈပိုၼ်ၽၢဝ်ႇ ၵဵဝ်ႇလူၺ်ႈပၢင်ၵုမ် ၵွၼ်ႇၵရႅတ်ႉ ပွၵ်ႈၵမ်း 5  SSPP/SSA  ၼၼ်ႉ လႆႈႁၼ်မီး 3 တွၼ်ႈ ၼႂ်းၶေႃႈ 2 (င) ၼၼ်ႉပႃးဝႆႉဝႃႈ ၶတ်းလိူၵ်ႈ ႁူဝ်ပဝ်ႈ ၵႅမ်ႁူဝ်ပဝ်ႈၸိူဝ်းၼႆႉ မီးၸိူင်ႉႁိုဝ်ၽွင်ႈၶႃႈ။

တွပ်ႇ – ၼႂ်းၸုမ်း ႁူဝ်ပဝ်ႈၼၼ်ႉ ႁူဝ်ပဝ်ႈၵေႃႈ ပဵၼ် – ၸဝ်ႈပၢင်ႇၾႃႉ ၊ ၵႅမ်ႁူဝ်ပဝ်ႈ 1 ၸဝ်ႈၶိူဝ်းတႆး ၊ ၵႅမ်ႁူဝ်ပဝ်ႈ 2 ၸဝ်ႈၶုၼ်သႅင် ၵႅမ်ႁူဝ်ပဝ်ႈ 3 ၸဝ်ႈသိူဝ်ပိူင်ႇၾႃႉ ၸိူဝ်းၼႆႉ ဢမ်ႇလႅၵ်ႈလၢႆႈၶႃႈ ၊  လိူၵ်ႈတင်ႈယူႇ ၵူၺ်းၵႃႈ လႆႈၶိုၼ်းၵူၼ်းၵဝ်ႇ ၼၼ်ႉၶႃႈၼႃႇၼေႃႈ။

ၽူႈၼမ်းၼႂ်း တႄႉ 1 – ၸဝ်ႈၵျေႃႇလႃႉ 2  ၸဝ်ႈၸၢႆးသူႉ 3 ၸဝ်ႈပထုၼ်း ။ ၼႂ်းၵေႃႇမတီႇငဝ်ႈငုၼ်းၵေႃႈ မိူဝ်ႈဢွၼ်တၢင်း မီး 33 ၵေႃႉ မိူဝ်ႈလဵဝ် မီး  27 ၵေႃႉ ၼႂ်းၼၼ်ႉ ၵူၼ်းၼုမ်ႇ ပႃး 4-5 ၵေႃႉ ။

ထၢမ် – ပၢင်ၵုမ်လူင် ၵွၼ်ႇၵရႅတ်ႉ ပွၵ်ႈၵမ်း 5 တီႈဝၢၼ်ႈႁႆး ၼႆႉ လႆႈဝႃႈ မီးလွင်ႈလၢၵ်ႇလၢႆးသင်ၶႃႈ ။

တွပ်ႇ – ၼႂ်းပွၵ်ႈၵမ်း 5 ၼႆႉ လႆႈဝႃႈ လွင်ႈႁၢင်ႈႁႅၼ်းလီသေပိူၼ်ႈယဝ်ႉၶႃႈ။ ၽူႈၶိုၼ်ႈႁွတ်ႈၵေႃႈ မႃးၼမ်လႆႈလိူဝ်ပိူၼ်ႈ ။ ၵွပ်ႈပိူဝ်ႈငဝ်းလၢႆး လွင်ႈသုၵ်ႉယုင်ႈမၼ်းဢမ်ႇပေႃးမီး။လွင်ႈႁၢင်ႈႁႅၼ်း လိူၵ်ႈတင်ႈၼႆႉ လႆႈဝႃႈ ႁၢင်ႈႁႅၼ်းမႃး လီသေၵူႈပွၵ်ႈ။

လွၵ်းလၢႆးလိူၵ်ႈတင်ႈၵေႃႈ မၼ်းတႅတ်ႈသေၵူႈပွၵ်ႈ ။ ၵၢပ်ႈပၢၼ် ဢၢႆႊထီႊၵေႃႈလႅၵ်ႈလၢႆႈမႃးသေ ႁဝ်းၶႃႈ update လၢႆးၶပ်ႉႁႅၼ်းပၢင်ၵုမ်ႁဝ်း တိူဝ်းၶႅမ်ႉမႃး။

ထၢမ် – ၼႂ်းပၢင်ၵုမ်ၼႆႉ တႃႇမိူဝ်းၼႃႈၶႃႈလူး လႆႈဝၢင်းၽႅၼ်ၵၢၼ်ၵႂႃႇၸိူင်ႉႁိုဝ်ၽွင်ႈၶႃႈ။

တွပ်ႇ – ၸွမ်းၼင်ႇ တၢင်းယိူင်းဢၢၼ်း ပၢင်ၵုမ်ၵွၼ်ႇၵရႅတ်ႉႁဝ်းမီးၼၼ်ႉၶႃႈၼႃႇၼေႃႈ ။ ၶိုၼ်းမႄးလိူၵ်ႈၶိုၼ်ႈ ၵေႃႇမတီႇငဝ်ႈငုၼ်း ၼင်ႇဝႃႈ 4 ပီလႂ်ၼိုင်ႈပွၵ်ႈ ။ ၵူၺ်းၵႃႈ သမ်ႉ တူၵ်းလိုၼ်းၵႂႃႇပႅတ်ႈ 2-3 ပီ။

ပိူင်လူင်တႄႉ ႁဝ်းၶႃႈ လႆႈမူၼ်ႉမႄးၶိုၼ်းၵၢၼ်ႁဝ်း။ပိူင်ၾၢင်ပႃႇတီႇ ၶေႃႈၸႂ်ႉမၼ်းႁႃႉ ။ တီႈပွင်ႇၵႂၢမ်းၼႂ်း ပိူင်ပႃႇတီႈႁဝ်းႁႃႉ ၼႆ ႁႂ်ႈပေႃးၶိုတ်းၸွမ်း ၵၢပ်ႈပၢၼ်ငဝ်းလၢႆးမိူဝ်ႈလဵဝ် လႆႈၶိုၼ်းမူၼ်ႉမႄးၸိူင်ႉၼၼ် ။

ပိူင်လူင်တႄႉ ႁဝ်းတေဝႆႉၼမ်ႉၼၵ်း ၵၢၼ်ပႃႇတီႇသေ သိုပ်ႇႁဵတ်းၵႂႃႇ ။ ပေႃးမႃးလဵပ်ႈႁဵၼ်းတူၺ်းပိုၼ်းတပ်ႉသိုၵ်းႁဝ်းၶႃႈ ၵူႈပၢၼ်ပၢၼ်ၼႆ ပေႃးဢမ်ႇမီးပႃႇတီႇပၢႆးမိူင်းဢွၼ်ႁူဝ်ၼႆ မၼ်းမီးလွင်ႈၵိတ်ႇၶွင်ႈၼၼ်ႉၼႃႇၼေႃႈ။မၼ်းၸၢင်ႈမီးလွင်ႈယူပ်ႈယွမ်း။

ပႃႇတီႇပၢႆးမိူင်းၼႆႉ လွင်ႈဢွၼ်ႁူဝ်မၼ်းလမ်ႇလွင်ႈ ။ ပေႃးမႃးတူၺ်း ၸိူဝ်းဢၼ်တႅၵ်ႇၵႂႃႇလူႉၵႂႃႇၸိူဝ်းၼၼ်ႉၼႆ ယွၼ်ႉဝႃႈ ၵၢၼ်မိူင်းႁဝ်းဢမ်ႇၵႅၼ်ႇၶႅင်။

လွင်ႈၸုၵ်းၸင်ႈၼိူဝ်ၵၢၼ်လုၵ်ႉၽိုၼ်ႉလႄႈသင် ပေႃးတူၵ်းတၢင်းယၢပ်ႇတၢင်းၽိုတ်ႇမႃးၼႆ မၼ်းဢမ်ႇၶၢမ်ႈပူၼ်ႉလႆႈ။ၵွပ်ႈၼၼ် တေဝႆႉပိူင်ၵၢၼ်ပႃႇတီႇပဵၼ်ယႂ်ႇ။ၼႆ မီးၶေႃႈလူင်ႉလႅင်း ပွင်ႇၵၼ်ၸိူင်ႉၼၼ်။

ထၢမ် – ၼႂ်းပၢင်ၵုမ်လူင်ၼႆႉ ၸွင်ႇလႆႈ ဢုပ်ႇလွင်ႈၵူၼ်းၼုမ်ႇၶႃႈႁႃႉ ၊ တႃႇၵူၼ်းၼုမ်ႇလူး တေၶိုင်ပွင်ၸိူင်ႉႁိုဝ်ၽွင်ႈၶႃႈ။

တွပ်ႇ – မိူၼ်ၼင်ႇ ၼေႃႇၵေႃႇမတီႇငဝ်ႈငုၼ်းၼၼ်ႉၼႃႇၼေႃႈ။ၼေႃႇတူဝ်တႅၼ်းႁဝ်းၼႆႉၼႆ လႆႈဢဝ်ၵူၼ်းၼုမ်ႇၶိုၼ်ႈမႃး မႃးလိူၵ်ႈတင်ႈပႃးၼၼ်ႉၼႃႇၼေႃႈ။ပႃးၼၢင်းယိင်း 4 ၵေႃႉ။တေလႆႈဝႃႈ ၵၢၼ်လိူၵ်ႈတင်ႈပွၵ်ႈၼႆႉ ၵူၼ်းၼုမ်ႇၵေႃႈ ၶဝ်ႈပႃးမႃး။ၼၢင်းယိင်းႁဝ်းၵေႃႈ ၶဝ်ႈပႃးမႃးၼႆ ။

ၵူၺ်းၵႃႈ ၼၢင်းယိင်းတႄႉ ပႆႇပႃးမႃး ၼႂ်းၵေႃႇမတီႇငဝ်ႈငုၼ်းသေတႃႉၵေႃႈ ႁဝ်းပိုတ်ႇတိုဝ်ႉတၢင်း ပၼ် ႁႂ်ႈၼၢင်းယိင်းၵေႃႈပႃး ၵူၼ်းၼုမ်ႇၵေႃႈပႃး ၼႆ လၢၵ်ႇလၢႆးၸိူင်ႉၼၼ်ၼၼ်ႉၶႃႈဢေႃႈ ။

 ပေႃးဢဝ်ၼႂ်းပိူင် ပၢင်ၵုမ်ၵွၼ်ႇၵရႅတ်ႉၼႆႉၼႆ ၵူၼ်းၶဝ်ႈႁူမ်ႈတင်းသဵင်ႈ မီးသုၼ်ႇလၢတ်ႈလႆႈလွတ်ႈလႅဝ်းၼၼ်ႉၶႃႈၼႃႇၼေႃႈ။

ထၢမ် – တွၼ်ႈ 2 ၊ ၶေႃႈ (သ) ၼၼ်ႉပႃးဝႆႉဝႃႈ တေဢမ်ႇႁႂ်ႈၸုမ်းလႅၼ်ငိုၼ်းဢွၼ်ႊလၢႆႊ မီးၼႂ်းၼႃႈတီႈ ၊ ယႃႈမဝ်းၵမ်ၵေႃႈ တေႁႂ်ႈယူတ်းၸၢင်ႇမူတ်းႁၢႆၼႆလႄႈ မိူဝ်ႈဢွၼ်တၢင်း ယၢမ်ႈမီးမႃး ၼႂ်းပိုၼ်ႉတီႈၶႃႈႁႃႉ။

တွပ်ႇ – ၸုမ်းလႅၼ်ငိုၼ်းဢွၼ်ႊလၢႆႊ ဢၼ်ဝႃႈၼႆႉ ႁႂ်ႈႁဵတ်းၸွမ်းတြႃးဝၢင်ႇၼႆ ဢမ်ႇမီးသေပွၵ်ႈၶႃႈလူင် ။ ပေႃးမႃးတူၺ်း မၼ်းဢမ်ႇၸႂ်ႈၼႂ်းၼႃႈတီႈ SSPP  လႄႈ ၸုမ်းၸၢဝ်းၶိူဝ်း ၸိူဝ်းၼႆႉၵူၺ်း။

မၢင်တီႈၵေႃႈ မၢပ်ႇၼႄးၵေႃႈပႃးၼၼ်ႉၼႃႇၼေႃႈ။မၢင်တီႈၵေႃႈ မီးတေႉၵေႃႈမီး။ၽတ်ႉၽဵင်ႇၵၼ်တင်းသဵင်ႈတႄႉ ပိူၼ်ႈတေဝႃႈ ၸုမ်းၸၢဝ်းၶိူဝ်းၸိူဝ်းၼႆႉ ဢဝ်ဝႆႉၼႃႇၼႆ။ ၸၢင်ႈမီးလွင်ႈၸီႉၸမ်ႈၸိူင်ႉၼၼ်မႃး။

ႁဝ်းၶႃႈၵေႃႈ လႆႈဢွၵ်ႇလိၵ်ႈပိုၼ်ၽၢဝ်ႇ 4-5 ၵမ်းယဝ်ႉၶႃႈ။တေဢမ်ႇလႆႈမီးၼႂ်းၼႃႈတီႈႁဝ်း။ႁဝ်းၶႃႈ ဢမ်ႇႁပ်ႉၶၢမ်ႇၼႆ ဢၼ်ၼႆႉ ပဵၼ်ပိူင်ႁဝ်း  တီႈငဝ်ႈငုၼ်းႁဝ်းၶႃႈ ။

ဢမ်ႇၵွမ်ႉၵႃႈ ၸုမ်းၵျႃႊၽျႅၼ်ႉၵူၺ်း မိူၼ်ၼင်ႇ ပၢင်တေႃႇပၢင်လွင်းၸိူဝ်းၼႆႉၵေႃႈ ဢမ်ႇပၼ်ႁဵတ်း ၼႂ်းၼႃႈတီႈၵုမ်းၵမ်ႁဝ်း ။

ငဝ်းလၢႆးမိူဝ်ႈလဵဝ်ၼႆႉ ငဝ်းလၢႆးၵျႃႊၽျႅၼ်ႉၼႆ မၼ်းၽတ်ႉယွၼ်ႈၵႂႃႇၵူႈတီႈၵူႈတၢင်း ၼၼ်ႉ ၼင်ႇႁိုဝ် တေဢမ်ႇမီးၼႂ်းၼႃႈတီႈႁဝ်းၼၼ်ႉၼႆ လႆႈတႅပ်းတတ်း ဢွၵ်ႇပိူင်ဝႆႉ ၸီႉသင်ႇၵၼ်ဝႆႉ ။

မိူၼ်ၼင်ႇ ယႃႈမဝ်းၵမ်ၼႆၵေႃႈ ႁဝ်းၶႃႈ တိုၼ်းမီးၸုမ်းႁႄႉယႃႈမဝ်းၵမ်ယူႇယဝ်ႉ။  တေႃႇထိုင် ၸၼ်ႉငဝ်ႈငုၼ်း တေႃႇထိုင် ၸႄႈတွၼ်ႈ ၸႄႈဝဵင်း ။ၼႆႉ ပဵၼ်ပိူင်ငဝ်ႈငုၼ်းႁဝ်း။ ႁဵတ်းမႃးၵူႈပီပီ ။ဢမ်ႇၸႂ်ႈမိူဝ်ႈၼႆႉၵူၺ်း။

ဢမ်ႇၸႂ်ႈဝႃႈ ၵျႃႊၽျႅၼ်ႉမီးမႃးသေ ၸင်ႇမႃးဢွၵ်ႇပိူင်ႁႄႉၵင်ႈပၢင်ႇတေႃႇလွင်းၼႆ ဢမ်ႇၸႂ်ႈၸိူင်ႉၼၼ်ၶႃႈ။

ပေႃးတေထၢမ်ဝႃႈ ႁဝ်းၵျိူၵ်ႈႁႃႉ ဢမ်ႇၵျိူၵ်ႈႁႃႉၼႆၼၼ်ႉတႄႉ တေႃႈၼင်ႇ ႁဝ်းယင်းဢမ်ႇပၼ်မီးၼႂ်းၼႃႈတီႈႁဝ်းၼၼ်ႉၼႃႇၼေႃႈ။ ၼႆႉတႄႉ ၸႅင်ႈလႅင်းၵၼ်ယူႇ။

ထၢမ် – ၵဵဝ်ႇလူၺ်ႈ ၵျႃႊၽျႅၼ်ႉၼႆႉသေ ၸူဝ်ႈၶဝ်ၽႄႈလၢမ်းမႃးၼႆႉ ၸွင်ႇလႆႈတီႉၺွပ်း တီႈတွၼ်ႈလႂ်ၽွင်ႈၶႃႈ ၼႂ်းၼႃႈတီႈၸိူဝ်းၼႆႉဢေႃႈ။

တွပ်ႇ – ဢၼ်တီႉၺွပ်းသေ သူင်ႇပၼ်ၸဝ်ႈၼႃႈတီႈၶႄႇၶဝ်တႄႉ ဢၼ်တွင်းလႆႈ မီးယူႇ 3-4 ပွၵ်ႈ။ ၸွမ်းလႅၼ်လိၼ်ၸိူဝ်းၼႆႉၼၼ်ႉၼႃႇၼေႃႈ။ ဢၼ်ၼႆႉတႄႉ ယွၼ်ႉဝႃႈ လႆႈႁူမ်ႈၵၼ်တင်း တၢင်ႇၸိူဝ်းလႄႈ တေဢမ်ႇၸၢင်ႈလၢတ်ႈၼႄႁူဝ်ယွႆႈမၼ်း။

ၼႂ်းၼႃႈတီႈ SSPP ၵေႃႈ ဢမ်ႇၸႂ်ႈဝႃႈ လႆႈၵုမ်းတင်းပိုၵ်းၸိူင်ႉၼၼ် မၢင်တီႈၵေႃႈ မိူၼ်ၼင်ႇ ဆက်စပ်နယ်မြေ ဝႃႇ  မၢင်တီႈၵေႃႈ ဢၼ်တိတ်းၸပ်းၵေႃႈမီး ၊ မၢင်တီႈၵေႃႈ မၼ်းသွၼ်ႉၵၼ် ဢၼ်ပိူၼ်ႈၵေႃႈမီး ႁဝ်းၵေႃႈမီး ၸိူဝ်ႉၼႆႉၼၼ်ႉၼႃႇၼေႃႈ ၶူၼ်းၶဝ်းၵၼ်ၸိူဝ်းၼၼ်ႉၵေႃႈမီး ၼႆ တေဝႃႈ မၼ်းမႃးမီးၼႂ်းၼႃႈတီႈႁဝ်း လုမ်းလုမ်းၼႆၵေႃႈ ဢမ်ႇၸၢင်ႈဝႃႈၼၼ်ႉၶႃႈၼႃႇၼေႃႈ ။

ပေႃးႁူႉငဝ်းလၢႆးပထဝီႇ မိူင်းတႆးႁဝ်းလႄႈ မုၵ်ႉၸုမ်း EAO ၸိူဝ်းၼႆႉ မၼ်းသုၵ်ႉသၵ်ႉၵႃႈႁိုဝ်ၼႆၼၼ်ႉ မၼ်းၸင်ႇၸၢင်ႈႁူႉႁၼ်ၼၼ်ႉၶႃႈ။ လၢတ်ႈလႆႈဝႃႈ ႁဝ်းႁူမ်ႈမိုဝ်းၵၼ် ႁႄႉၵင်ႈယူႇလွင်ႈၵျႃႊၽျႅၼ်ႉၼႆႉ။

ထၢမ် – တႃႇႁႄႉၵင်ႈ ၽေးလွၵ်ႇလႅၼ်ငိုၼ်း ၊ ယႃႈမဝ်းၵမ် ၊ ၵၢၼ်တေႃႇလွင်း ၸိူဝ်းၼႆႉ SSPP တေလူင်းမိုဝ်းႁဵတ်းလႆႈၸိူင်ႉႁိုဝ်ၶႃႈ။

တွပ်ႇ – ယူႇတီႈငဝ်ႈငုၼ်းႁဝ်းသေ လႆႈဢွၵ်ႇပိူင်ဝႆႉယဝ်ႉလူးၼေႃႈ ၽႂ်တေဢမ်ႇလႆႈၵဵဝ်ႇၶွင်ႈ ။ ပေႃးဝႃႈ ၵဵဝ်ႇၶွင်ႈမႃးၵေႃႈ တိုၼ်းတေဢဝ်လိူင်ႈၼႆ မၼ်းမီးဝႆႉတႅၵ်ႇတႅၵ်ႇလႅင်းလႅင်း ။

ထၢမ် – ပၢင်လိူၵ်ႈတင်ႈ ဢၼ်သိုၵ်းမၢၼ်ႈ တေၸတ်း ပၢႆပီ 2025 ၼႆႉၶႃႈလူး ႁၼ်ထိုင်ၸိူင်ႉႁိုဝ်ၶႃႈ။

တွပ်ႇ – ႁဝ်းၶႃႈတႄႉ ၵၢၼ်လိူၵ်ႈတင်ႈဢၼ်ဝႃႈၼႆႉ  ပေႃး ပဵၼ် တီႊမူဝ်ႊၵရေႊၸီႊယူႇၼႆႉ တေလႆႈယွမ်းႁပ်ႉယူႇ။ ၵွပ်ႈသင်ၼႆ မၼ်းလႆႈဢဝ် ၵၢင်ၸႂ်ၵူၼ်းၼမ်သေ လိူၵ်ႈတင်ႈၼၼ်ႉၶႃႈၼႃႇၼေႃႈ။

ၵူၺ်းသေတႃႉၵေႃႈ ပေႃးမႃးထတ်းသၢင်တူၺ်း လွၼ်ႉမွၼ်းဢၼ်ႁဵတ်းယူႇၼႆႉ မၼ်းတေလႆႈမွၵ်ႈလႂ်ၼႆ တေလႆႈထတ်းသၢင်တူၺ်း။ ၵူၼ်းၶဝ်ႈႁူမ်ႈမၼ်းမီးမွၵ်ႈၵႃႈႁိုဝ်။

ပေႃးဢဝ်ငဝ်းလၢႆးမိူဝ်ႈလဵဝ်ဝႃႈတႄႉ မၼ်းဢမ်ႇႁူမ်ႇငမ်းလႆႈတင်းသဵင်ႈၶႃႈ။ ႁဝ်းၶႃႈ ဢမ်ႇၸၢင်ႈဝႃႈ သင်ၸွမ်းၼၼ်ႉၶႃႈၼႃႇၼေႃႈ။

သၢၼ်ၶတ်းႁႃႉၼႆၵေႃႈ ဢမ်ႇဝႃႈ ၵမ်ႉထႅမ်ႁႃႉ ၼႆၵေႃႈ ဢမ်ႇၸၢင်ႈလၢတ်ႈ။ ၵူၺ်းၵႃႈ ၽႂ်ႁဵတ်းၵေႃႈမၼ်းၶၢမ်ႇ ႁဝ်းၶႃႈတႄႉ တေလႆႈဝႃႈၼၼ်ၵူၺ်းၶႃႈယဝ်ႉ။ ၵူၼ်းဢၼ်ႁဵတ်းၵေႃႈ တေလႆႈဢဝ်ပုၼ်ႈ မၼ်းတေၵႂႃႇလႆႈမွၵ်ႈလႂ် တေလႆႈပႂ်ႉတူၺ်း ၸိူင်ႉၼၼ်ၵူၺ်းၶႃႈ။

ထၢမ် – ဢၼ်ၶႃႈ ဢမ်ႇလႆႈထၢမ်သေ ဢၼ်ၶႂ်ႈလၢတ်ႈထႅင်ႈၸွင်ႇမီးသင်ၶႃႈ ။

တွပ်ႇ – လွင်ႈဝႃႈ ႁဝ်းၶႃႈ ၸတ်းပၢင်ၵုမ်လူင် ၵွၼ်ႇၵရႅတ်ႉ ပွၵ်ႈၵမ်း 5 ၼႆႉ ၶႂ်ႈႁႂ်ႈၵူၼ်းမိူင်းႁူႉၸွမ်းၼၼ်ႉၼႃႇၼေႃႈ ယဝ်ႉတူဝ်ႈၵႂႃႇလီငၢမ်းယဝ်ႉၼႆ။ ပိူင်လူင်မၼ်းတႄႉ ၼႂ်းပႃႇတီႇႁဝ်းၶႃႈၼႆႉ ယႃႇႁႂ်ႈမီးၸဝ်ႈဢႃႇၼႃႇ။

ၸင်ႇၼၼ် လႄႈ ၸင်ႇလုၵ်ႉတီႈ ၵေႃႇမတီႇသေ လိူၵ်ႈတင်ႈမႃး။ ပွင်ႇဝႃႈ တႄႉ ဢႃႇၼႃႇၼႆႉ မၼ်းယူႇတီႈၵူၼ်းတင်းၼမ်ၼၼ်ႉၶႃႈၼႃႇၼေႃႈ။ မၼ်းမီးၵူၼ်းတင်းၼမ်လိူၵ်ႈမႃးသေ ဢႃႇၼႃႇၼႆႉ ႁႂ်ႈပဵၼ်ၵူၼ်းတင်းၼမ်ၵုမ်းၵမ်။ ပႃႇတီႇမႂ်ႇသုင်ၸိုင်ႈတႆး မၼ်းပဵၼ်ၸိူင်ႉၼႆ။

ယဝ်ႉၵေႃႈ မၼ်းလူဝ်ႇပႃး သဵင်ၵၢင်ၸႂ်ၵူၼ်းမိူင်းတင်းၼမ်ၼၼ်ႉယဝ်ႉၶႃႈ။ ပေႃးၵူၼ်းၵတ်ႉၵူၼ်းမိူင်းႁဝ်း ၶဝ်ႈမႃးၼႆ ၸင်ႇတေပဵၼ်လွၵ်းပိူင် တီႊမူဝ်ႊၵရေႊၸီႊ။ ဢဝ်ၵၢင်ၸႂ်ၵူၼ်းၼမ်သေ လိူၵ်ႈမႃးလႄႈ ပဵၼ်သဵၼ်ႈတၢင်း တီႊမူဝ်ႊၵရေႊၸီႊ ၼၼ်ႉၶႃႈၼႃႇၼေႃႈ။

မိူဝ်းၼႃႈမႃးၵေႃႈ ႁႂ်ႈၵူၼ်းမိူင်းႁဝ်း ပႃးၼႂ်းပႃႇတီႈၼမ်ၼမ်ၼႆ ၶေႃႈလိုၼ်းသုတ်းတႄႉ ၶႂ်ႈတုၵ်းယွၼ်းၸိူင်ႉၼႆၶႃႈ။

ယိၼ်းၸူမ်းၶႃႈ