မိူဝ်ႈၼႆႉ ဝၼ်းတီႈ 5/10/2021 ယၢမ်းၵၢင်ၼႂ် ၸၢႆးလူၺ် ဢႃယု 30 ပီ ၵူၼ်းဝၢၼ်ႈၵုင်းပဝ်း ဢိူင်ႇပၢင်ႇၵေႇတု ၸႄႈဝဵင်းမိူင်းၵိုင် ၸႄႈတွၼ်ႈ လွႆလႅမ် ၸိုင်ႈတႆးပွတ်းၸၢၼ်း ဢၼ်ၺႃးၸၢၵ်ႇမၢၵ်ႇ ၸွမ်းၼႂ်းၵႄႈပၢင်တိုၵ်း RCSS တင်း SSPP ၼၼ်ႉ လႆႈလူႉတၢႆၵႂႃႇ တီႈႁူင်းယႃလူင် ၵူၼ်းမိူင်း ဝဵင်းမိူင်းၵိုင် ၼႆယဝ်ႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ၸႄႈဝဵင်းမိူင်းၵိုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၸၢႆးလူၺ် ဢႃယု 30 ပီ လႆႈလူႉသဵင်ႈၵႂႃႇတီႈႁူင်းယႃ မိူဝ်ႈၼႆႉ ယၢမ်းၵၢင်ၼႂ်ၶႃႈ။ ၵေႃႉပဵၼ်မေးၼၢင်းလႄႈ လုၵ်ႈမၼ်းၸၢႆး သွင်ၵေႃႉၼၼ်ႉတႄႉ လွတ်ႈၽေး ယူႇၶႃႈ။ ၶႃၵေႃႈ ယၢမ်းလဵဝ် တိုၵ်ႉယူတ်းယႃယူႇဝႆႉတီႈ ႁူင်းယႃ ဝဵင်းမိူင်းၵိုင် ဝႆႉၶႃႈ”- ဝႃႈၼႆ။
ၶၢပ်ႈတူဝ်တၢႆ ၸၢႆးလူၺ် ဢႃယု 30 ပီ ၵူၼ်းဝၢၼ်ႈၵုင်းပဝ်းၼႆႉ ယူႇတီႈၸုမ်းပရႁိတ ၸႄႈဝဵင်းမိူင်းၵိုင် ႁၢင်ႈႁႅၼ်းပူၼ်ႉၶၢပ်ႈတူဝ် မိူဝ်ႈၼႆႉ ဝၼ်း တီႈ 5/10/2021 ၵမ်းလဵဝ်ၼႆယဝ်ႉ။
မိူဝ်ႈဝႃး ဝၼ်းတီႈ 4/10/2021 ယၢမ်းႁူဝ်ၶမ်ႈ မွၵ်ႈ 5 မူင်းၼႆႉ သိုၵ်း RCSS တင်း SSPP ပိုတ်းယိုဝ်းၵၼ်၊ မၢၵ်ႇလူင်တူၵ်းသႂ်ႇ ၼႂ်း ဝၢၼ်ႈၵုင်းပဝ်းသေ တိူဝ်ႉၺႃး ၸၢႆးလူၺ် ဢႃယု 30 ပီ၊ မေးၼၢင်းလႄႈ လုၵ်ႈမၼ်း 2 ၵေႃႉ ။
ဢိင်ၼိူဝ် ပၢင်တိုၵ်း ၼႆႉသေ ၵူၼ်းဝၢၼ်ႈၵုင်းပဝ်း တင်း ဝၢၼ်ႈၵုင်းလႅင်း ႁူဝ်ၵူၼ်း မွၵ်ႈ 800 လႆႈဢွၼ် ၵၼ်ပၢႆႈၽေးသိုၵ်း ဢွၵ်ႇမႃးတၢမ်းၶမ်ႈ မႃးသွၼ်ႈ ဝႆႉတီႈဝတ်ႉၵုင်းၸူင် ၼႆယဝ်ႉ။
“ယၢမ်းလဵဝ် တီႈဝတ်ႉၵုင်းၸူင်ၼႆႉ ၵူၼ်းပၢႆႈၽေးသိုၵ်းမႃးသွၼ်ႈဝႆႉ ပေႃးဢမ်ႇမီးတီႈယူႇၵၼ်ယဝ်ႉၶႃႈ။ လႆႈဢွၼ်ၵၼ်ၼွၼ်းၼိူဝ်ထူဝ်ႈ ၼိူဝ်လေႃႉ ၶႃႈဢေႃႈ။ ဢၼ်လူဝ်ႇတၢင်းၸွႆႈထႅမ် ႁႅင်းတီႈသုတ်း တီႈဝတ်ႉၵုင်းၸူင်ၼႆႉတႄႉ ၽႃႈယၢင် တႃႇသိူဝ်ႇတႃႇမုင်း လႄႈ ၶွင်ၵိၼ်ယႅမ်ႉ ၶဝ်ႈၼမ်ႉတၢင်း ၵိၼ် ၸိူဝ်းၼႆႉၶႃႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈမိူင်းၵိုင် သိုပ်ႇလၢတ်ႈၼႄၼင်ႇၼႆ။
သဵၼ်ႈမၢႆ ၵူၼ်းပၢႆႈၽေးသိုၵ်း ၼႂ်းၸႄႈဝဵင်းမိူင်းၵိုင် တေႃႇထိုင် ဝၼ်းတီႈ 3/10/2021 ၼႆႉ တင်းမူတ်းမီးယူႇ 2,233 ၵေႃႉ။ ၵမ်ႈၽွင်ႈၵေႃႈသွၼ်ႈယူႇၸွမ်းဝတ်ႉဝႃးၽႃသိူဝ်ႇသေၵမ်ႈၽွင်ႈသမ်ႉယူႇၸွမ်းႁိူၼ်းယေးပီႈၼွင်ႉၽႂ်မၼ်း။ မိူဝ်ႈဝႃး ဝၼ်းတီႈ 4 ယၢမ်း ႁူဝ် ၶမ်ႈ ၵူၼ်းဝၢၼ်ႈၵုင်းပဝ်း တင်း ဝၢၼ်ႈၵုင်းလႅင်း ပၢႆႈမႃးထႅင်ႈ ႁူဝ်ၵူၼ်း မွၵ်ႈ 800 လႄႈ ပေႃးႁူမ်ႈၵၼ် တင်းမူတ်း ၵူၼ်းပၢႆႈၽေးတေမီး 3 ႁဵင်ပၢႆ ၼႆယဝ်ႉ။
လိူဝ်ၼၼ်ႉ တီႈဢိူင်ႇႁၢမ်းငၢႆးၵေႃႈ မီးၵူၼ်းပၢႆႈၽေးသိုၵ်းဝႆႉ ႁူဝ်ၵူၼ်း 900 ပၢႆလႄႈ တီႈဝတ်ႉၼွင်လႅင် 30 ပၢႆ။ ၵူၼ်းပၢႆႈၽေးသိုၵ်း ၼႂ်းၸႄႈဝဵင်း မိူင်းၵိုင် ႁူမ်ႈၵၼ်တင်းမူတ်း မွၵ်ႈ 4 ႁဵင် ၼႆယဝ်ႉ။
တႄႇဢဝ် ဝၼ်းတီႈ 14/9/2021 ၼၼ်ႉမႃးသေ သိုၵ်း RCSS တင်း SSPP ပဵၼ်ပၢင်တိုၵ်းၵၼ် မႃးႁၢဝ်ႈႁႅင်း ၼႂ်းဢိူင်ႇႁူဝ်ၶၢႆး ၸႄႈဝဵင်းမိူင်း ၵိုင်သေ ႁဵတ်းႁႂ်ႈၵူၼ်းမိူင်း မွၵ်ႈ 4 ႁဵင် လႆႈပၢႆႈယၢၼ်ႁိူၼ်းယေးလႄႈ ထူပ်းတၢင်းယၢပ်ႇၽိုတ်ႇၵိၼ်းၸႂ်ၵၼ် ၼႆယဝ်ႉ။
