မိူဝ်ႈၼႆႉ ဝၼ်းတီႈ 4/10/2021 ယၢမ်းႁူဝ်ၶမ်ႈ မွၵ်ႈ 5 မူင်း RCSS လႄႈ SSPP ပိုတ်းယိုဝ်းၵၼ်ၼႂ်းဢိူင်ႇပၢင်ႇၵေႇတု ၸႄႈဝဵင်းမိူင်းၵိုင်၊ မၢၵ်ႇလူင်တူၵ်းၼႂ်းဝၢၼ်ႈလႄႈ ၵူၼ်းဝၢၼ်ႈၵုင်းပဝ်း ၺႃးၸၢၵ်ႇမၢၵ်ႇ မၢတ်ႇၸဵပ်း 4 ၵေႃႉ ၸုမ်းၸွႆႈထႅမ် လႆႈႁၢမ်တူဝ်သူင်ႇႁူင်းယႃမိူင်းၵိုင် ဝႆႉဝႃႈၼႆ။
ၵူၼ်းဝၢၼ်ႈၼႂ်းဢိူင်ႇပၢင်ႇၵေႇတု ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းမိူင်း 4 ၵေႃႉ ပဵၼ်ၵူၼ်းဝၢၼ်ႈၵုင်းပဝ်း မၢၵ်ႇလူင်မႃးတူၵ်း သေ တိူဝ်ႉၺႃးၸၢၵ်ႇမၢၵ်ႇၶႃႈဢေႃႈ။ ယၢမ်းလဵဝ် ၵူၼ်းဝၢၼ်ႈၵုင်းပဝ်း တိုၵ်ႉဢွၼ်ၵၼ်ပၢႆႈဢွၵ်ႇ မႃးယူႇတိၵ်းတိၵ်းၶႃႈ။ ၾူၼ်ၵေႃႈတူၵ်းဝႆႉလႄႈသဵၼ်ႈတၢင်းၵေႃႈယၢပ်ႇဢေႃႈ။ ”- ဝႃႈၼႆ။
ၵူၼ်းဝၢၼ်ႈၵုင်းပဝ်း ဢၼ်ၺႃးၸၢၵ်ႇမၢၵ်ႇၸွမ်း ၼႂ်းပၢင်တိုၵ်းၼႆႉ ပဵၼ် ၽူႈၸၢႆး 1 ၵေႃႉ ၽူႈယိင်း 3 ၵေႃႉ ပႃးတင်းလုၵ်ႈဢွၼ်ႇ ။
“ၽူႈၸၢႆးတႄႉ တိူဝ်ႉၺႃးတီႈပုမ်၊ ၼၢင်းယိင်းသမ်ႉ တိူဝ်ႉၺႃးတီႈၶႃ၊ လုၵ်ႈဢွၼ်ႇ 2 ၵေႃႉၼၼ်ႉတႄႉ တိူဝ်ႉၺႃးတီႈမိုဝ်း”- ၵူၼ်းပိုၼ်ႉတီႈ ပၢင်ႇၵေႇတု သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် ၵူၼ်းဝၢၼ်ႈၵုင်းပဝ်း ဢွၼ်ၵၼ်ပၢႆႈမႃးတီႈဝၢၼ်ႈၵုင်းလႅင်းႁူဝ်ၵူၼ်းမွၵ်ႈ 800 ။ ၵမ်ႈၽွင်ႈပႆတၢင်းမႃး ၵမ်ႈၽွင်ႈၶီႇရူတ်ႉၵႃး ၶီႇထူဝ်ႈလႃႈၵျီႈမႃး၊ တေႃႇထိုင်ၶၢဝ်းယၢမ်းၵၢင်ၶမ်ႈ8 မူင်းပၢႆၵေႃႈၵူၼ်းဝၢၼ်ႈတိုၵ်ႉပၢႆႈမႃးယူႇတိၵ်းတိၵ်း။ မိူဝ်ႈလဵဝ် လူဝ်ႇဝႆႉ တၢင်းၸွႆႈထႅမ် လွင်ႈၶဝ်ႈၼမ်ႉတၢင်း ၵိၼ် ၼႆယဝ်ႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း မိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈဝတ်ႉမုၼ်ၸဝ်ႈၼႆႉ ၵူၼ်းပၢႆႈၽေး တဵမ်ဝႆႉယဝ်ႉၶႃႈ။ တေမီး ႁူဝ်ၵူၼ်း 800 ၼႆႉ။ ဢၼ်လူဝ်ႇႁႅင်းယၢမ်းလဵဝ်တႄႉၽႃႈယၢင်လႄႈ ၶဝ်ႈၼမ်ႉတၢင်းၵိၼ် ၶႃႈဢေႃႈ”- ဝႃႈၼႆ။
ပၢင်တိုၵ်းၼႆႉ ၵိုတ်းၵိုတ်းယိုဝ်းယိုဝ်းၵၼ်မႃး လၢႆဝၼ်းယဝ်ႉသေထိုင်မႃး မိူဝ်ႈၼႆႉၸႂ်ႉပႃးမၢၵ်ႇလူင် သမ်ႉမႃးတူၵ်းသႂ်ႇ ၼႂ်းဝၢၼ်ႈၵုင်းပဝ်း 2 လုၵ်ႈ ။ ထိုင်တီႈတိူဝ်ႉၺႃးၵူၼ်းဝၢၼ်ႈမၢတ်ႇၸဵပ်း။
တေႃႇထိုင် ဝၼ်းတီႈ 3/10/2021 ၼႆႉ ၵူၼ်းပၢႆႈၽေးသိုၵ်း ၼႂ်းဢိူင်ႇပၢင်ႇၵေႇတု မီး 2233 ၵေႃႉ။ လိူဝ်ၼၼ်ႉ ၵူၼ်းဝၢၼ်ႈၵုင်းပဝ်း ႁူဝ် ၵူၼ်း မွၵ်ႈ 800 လႆႈပၢႆႈမႃးသွၼ်ႈဝႆႉ တီႈဝၢၼ်ႈၵုင်းလႅင်း ထႅင်ႈ ၼႆယဝ်ႉ။