ၵူၼ်းပၢႆႈၽေးသိုၵ်း တီႈမိူင်းၵိုင် ႁူဝ်ၵူၼ်းသၢမ်ႁဵင်ပၢႆ ပႆႇၸၢင်ႈပွၵ်ႈႁိူၼ်း  ၼႂ်းပိုၼ်ႉတီႈ တိုၵ်ႉမီးလွင်ႈၶဵင်ႈၶႅင်ၵၢၼ်သိုၵ်းတေႃႇၵၼ် ပဵၼ်ပၢင်တိုၵ်းၵၼ် ယူႇ။  

မိူဝ်ႈၼႆႉ   ဝၼ်းတီႈ 4/10/2021 ယၢမ်းၵၢင်ၼႂ် ၼႂ်းဢိူင်ႇႁၢမ်းငၢႆး ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း သိုၵ်း RCSS တင်း SSPP တိုၵ်ႉသိုပ်ႇပဵၼ်ပၢင်တိုၵ်းၵၼ်။

ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈဝတ်ႉၵုင်းၸူင်ၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “တေႃႇထိုင်ယၢမ်းလဵဝ် သဵင်ၵွင်ႈလူင် တိုၵ်ႉတႅၵ်ႇယူႇ ၶႃႈ ႁဝ်းၶႃႈ ယူႇတီႈဝတ်ႉၼႆႉသေ လႆႈငိၼ်းသဵင်ယိုဝ်းၵၼ် ႁႅင်းၼႃႇၶႃႈ”- ဝႃႈၼႆ။

ၵူၼ်းပၢႆႈၽေးသိုၵ်း ၼႂ်းၸႄႈဝဵင်းမိူင်းၵိုင်ၼႆႉ တီႈဢိူင်ႇပၢင်ႇၵေႇတု ႁူဝ်ၵူၼ်းမီး 2,233 ၵေႃႉ၊ တီႈဢိူင်ႇႁၢမ်းငၢႆး 900 ပၢႆလႄႈ တီႈဝတ်ႉလွႆလႅင် သမ်ႉ မီး 30 ပၢႆ ၼႆယဝ်ႉ။

“တေႃႇထိုင်ယၢမ်းလဵဝ် ၵူၼ်းပၢႆႈၽေးသိုၵ်းတႄႉ ပႆႇၸၢင်ႈပွၵ်ႈႁိူၼ်းယေးၵၼ်ၶႃႈ သိုၵ်းသွင်ၾၢႆႇ တိုၵ်ႉၶဵင်ႈၶႅင်  ၵၼ်ယူႇၶႃႈ။ ၵူၼ်းဝၢၼ်ႈ  ၶႂ်ႈဝႃႈပၢႆႈဢွၵ်ႇမႃးၵူႈဝၼ်းၶႃႈယဝ်ႉ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈမိူင်းၵိုင် လၢတ်ႈတီႈၽူႈတွႆႇႁွၵ်ႈၼင်ႇၼႆ။

တႄႇဢဝ် ဝၼ်းတီႈ 14/9/2021 ၼၼ်ႉမႃးသေ သိုၵ်း RCSS တင်း SSPP တႄႇပဵၼ်ပၢင်တိုၵ်းၵၼ်မႃးႁၢဝ်ႈႁႅင်း ၼႂ်းဢိူင်ႇႁူဝ်ၶၢႆး ၸႄႈဝဵင်း မိူင်းၵိုင် ႁဵတ်းႁႂ်ႈၵူၼ်းမိူင်းပိုၼ်ႉတီႈ ထူပ်းတၢင်းယၢပ်ႇၽိုတ်ႇ လႆႈပၢႆႈယၢၼ်ႁိူၼ်းယေး တီႈယူႇၵၼ် တေႃႇထိုင်ယၢမ်းလဵဝ် ၵူၼ်းပၢႆႈၽေးသိုၵ်း ပႆႇ ၸၢင်ႈပွၵ်ႈႁိူၼ်းယေးၵၼ် ၼႆယဝ်ႉ။

ဢိင်ၼိူဝ် လွင်ႈသိုၵ်း RCSS တင်း SSPP ပဵၼ်ပၢင်တိုၵ်းၵၼ် ၼႂ်းၸိုင်ႈတႆးပွတ်းႁွင်ႇ တင်း ပွတ်းၸၢၼ်းၼႆႉသေ ယူႇတီႈတင်းသွင်ၾၢႆႇ ဢွၵ်ႇ လိၵ်ႈပိုၼ်ၽၢဝ်ႇ ၼင်ႇၵၼ်။ မိူဝ်ႈဝၼ်းတီႈ 1/10/2021 ပူၼ်ႉမႃးၼၼ်ႉ တၢင်းၾၢႆႇ RCSS ဢွၵ်ႇၶေႃႈပိုၼ်ၽၢဝ်ႇ “ၵဵဝ်ႇၵပ်းပၼ်ႁႃပၢင်တိုၵ်း ၼႂ်း ၸိုင်ႈတႆး” ဝႃႈၼႆ။

ထိုင်မႃးဝၼ်းတီႈ 3/10/2021 ၼႆႉသမ်ႉ ယူႇတီႈ SSPP ဢွၵ်ႇလိၵ်ႈပိုၼ်ၽၢဝ်ႇ “ၵဵဝ်ႇလွင်ႈပၼ်ႁႃ ဢၼ်လႆႈပဵၼ် ပၢင်တိုၵ်းၵၼ်တင်း RCSS”  ။

ၶေႃႈပိုၼ်ၽၢဝ်ႇတင်း 2 ၽိုၼ်ၼၼ်ႉ တႅမ်ႈဝႆႉဝႃႈ ပၼ်ႁႃပၢင်တိုၵ်းပႆႇၵႄႈလႆႈ ယွၼ်ႉပႆႇၸၢင်ႈဢုပ်ႇဢူဝ်းၵၼ်။