ၼႂ်းၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ၾၢႆႇယူႇလီ ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 ၼမ်ၶိုၼ်ႈၵူႈဝၼ်းယၢမ်းလဵဝ်မီးၵႂႃႇ 400 ပၢႆ လူႉတၢႆယွၼ်ႉတၢင်းပဵၼ်မီး 5 ၵေႃႉ ။
ၼၢင်းသီၼူၼ်း မေႃယႃလုမ်းလႃး ၵူၼ်းပဵၼ် ႁူင်းယႃလူင်ၵူၼ်းမိူင်း ၸႄႈဝဵင်းမိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ – “တေလႆႈဝႃႈ ၼႂ်းဝဵင်းမိူင်းပၼ်ႇ ယၢမ်းလဵဝ် ပဵၼ်ႁႅင်းၶႃႈဢေႃႈ။ သွင်ဝၼ်းထပ်းၵၼ်မႃးၼႆႉ မီးၵူၼ်းလူႉတၢႆ 2 ၵေႃႉ ၵမ်းလဵဝ်ၶႃႈ။ မိူဝ်ႈဝႃး ၵေႃႉၼိုင်ႈ၊ မိူင်းသိုၼ်းၵေႃႉၼိုင်ႈၶႃႈ။ တီႈမိူင်းပၼ်ႇၼႆႉ တင်းမူတ်း လူႉတၢႆယွၼ်ႉတၢင်းပဵၼ်မီး 5 ၵေႃႉယဝ်ႉၶႃႈ”- ဝႃႈၼႆ။
ၵူၼ်းပဵၼ်ၶူဝ်ႊဝိတ်ႉ 19 ဢၼ်လႆႈလူႉတၢႆ မိူဝ်ႈဝႃး ဝၼ်းတီႈ 3/10/2021 ၼႆႉ ပဵၼ်ၽူႈၸၢႆး ဢႃယု 28 ပီ။ မိူဝ်ႈဝၼ်းတီႈ 2/10/2021 သမ်ႉ ပဵၼ် ၽူႈၸၢႆး ဢႃယု 50 ပၢႆ ။ ၵူၼ်းတၢႆယွၼ်ႉတၢင်းပဵၼ် 5 ၵေႃႉၼႆႉ မႃးလူႉတၢႆတီႈႁူင်းယႃလူင် ၼႆႉၵူႈၵေႃႉ။
“ၵူၼ်းလူႉတၢႆ 5 ၵေႃႉၼၼ်ႉတႄႉ ပဵၼ်ၵူၼ်းပဵၼ်ၶူဝ်ႊဝိတ်ႉသေ လူႉတၢႆတီႈႁူင်းယႃ ။ လွင်ႈလႆႈ လူႉတၢႆတႄႉ မၢင်ၵေႃႉ ၸပ်းတၢင်းပဵၼ်ယဝ်ႉ ယူတ်းယႃတူဝ်တီႈႁိူၼ်းယေးႁင်းၵူၺ်း။ ၽိူဝ်ႇပဵၼ်ႁၢဝ်ႈႁႅင်း ၸင်ႇတေႁွတ်ႈမႃး တီႈႁူင်းယႃ ။ ၽိူဝ်ႇႁွတ်ႈမႃးၵေႃႈ ဢွၵ်ႊသီႊၵျိၼ်ႊၶဝ်တူၵ်းႁႅင်းၼႃႇသေ လႆႈလူႉၵႂႃႇ။ မၢင်ၵေႃႉသမ်ႉ ႁူႉဝႃႈ ပဵၼ်ၶူဝ်ႊဝိတ်ႉၼႆသေ မႃးယူတ်းယႃၵမ်းလဵဝ်ၵေႃႈမီးယူႇ။ ၵူၺ်းၵႃႈ ၶဝ်သမ်ႉမီးဝႆႉတၢင်းပဵၼ်ထႅင်ႈ တၢင်ႇမဵဝ်း ၼႂ်းတူဝ်ၸိူင်ႉၼႆသေ လႆႈလူႉၵႂႃႇၵေႃႈမီး၊ သင်ဝႃႈ ၵူၼ်းမိူင်းပၼ်ႇႁဝ်းၶႃႈ လူႉတၢႆတီႈႁိူၼ်းၼႆ ႁဝ်းၶႃႈ ၾၢႆႇပၢႆးယူႇလီ မေႃယႃၶဝ်ၸိူဝ်းၼႆႉ လူင်းၵူတ်ႇထတ်းပၼ်ၵမ်းလဵဝ် ဝႃႈၸွင်ႇပဵၼ် ဢမ်ႇပဵၼ် ၶူဝ်ႊ ဝိတ်ႉ ၼႆ ”- ၼၢင်းသီၼူၼ်း သိုပ်ႇလၢတ်ႈၼႄၼင်ႇၼႆထႅင်ႈ။
တေႃႇထိုင်မႃး ဝၼ်းတီႈ 3/10/2021 ၼႂ်းၸႄႈဝဵင်းမိူင်းပၼ်ႇၼႆႉ ၵူတ်ႇထတ်း ႁၼ်ၵူၼ်းတိတ်း ၸပ်းၸိူဝ်ႉမႅင်းၶူဝ်ႊဝိတ်ႉ 19 မီး 406 ၵေႃႉ၊ လူႉ တၢႆ 5 ၵေႃႉ၊ တိုၵ်းယူတ်းယႃ 100 ၵေႃႉ လႄႈ လူင်း ႁူင်းယႃယဝ်ႉ 300 ပၢႆ ၼႆယဝ်ႉ။
ယၢမ်းလဵဝ်ၵူၼ်းမိူင်း လၢင်းၶိူဝ်း မိူင်းပၼ်ႇ ဢွၼ်ၵၼ်ၵႂႃႇသမ်းယႃႈယႃႁႄႉၵင်ႈတၢင်းပဵၼ် ၸွမ်းၼင်ႇၾၢႆႇပၢႆးယူႇလီႁွင်ႉသမ်းၼၼ်ႉယဝ်ႉၵမ်ႈၼမ်။ ၵူၼ်းပိုၼ်ႉတီႈၵေႃႈ ယူႇသဝ်းလူၺ်ႈမၢႆမီႈ ၾိင်ႈတိုဝ်းၵမ် တႃႇၵၢင်းယၢၼ်ၶူဝ်ႊဝိတ်ႉ ၊ ပိၵ်ႉႁၢၼ်ႉပိၵ်ႉႁိူၼ်း ယူႇသဝ်းၵၼ်ယူႇ။ ၵူၺ်းၵႃႈ ၵူၼ်းၸိူဝ်းဢၼ်လုၵ်ႉတၢင်ႇဝၢၼ်ႈတၢင်ႇမိူင်းသေပွၵ်ႈမႃးၶိုၼ်း သမ်ႉမႃးလၵ်ႉယူႇသဝ်းလူၺ်ႈဢမ်ႇၵၵ်းတူဝ်လႄႈ ၶိုၼ်းၽႄႈလၢမ်းၸပ်းၵၼ် ၾၢႆႇပၢႆးယူႇလီၼႂ်းၸႄႈတွၼ်ႈလၢင်းၶိူဝ်းၵေႃႉၼိုင်ႈၵေႃႈလၢတ်ႈၼင်ႇၼႆ။
ၼႂ်းၸႄႈဝဵင်းလၢင်းၶိူဝ်းၵေႃႈ တေႃႇထိုင်ဝၼ်းမိူဝ်ႈၼႆႉမီးၵူၼ်းၸပ်းတၢင်းပဵၼ် 300 ပၢႆ။ လူႉတၢႆ ယွၼ်ႉတၢင်းပဵၼ်ၶူဝ်ႊဝိတ်ႉ 19ၵေႃႈမီး ၵေႃႉၼိုင်ႈယဝ်ႉ လႆႈႁူႉၼင်ႇၼႆ။
