တႆးႁွတ်ႈၼွၵ်ႈမိူင်း/ ၼႂ်းမိူင်း ႁူမ်ႈၵၼ်သေ ၸွႆႈထႅမ် ၵူၼ်းပၢႆႈၽေးသိုၵ်း ၼႂ်းမိူင်းတႆး မီးၶၢဝ်းတၢင်း 4 ပွၵ်ႈယဝ်ႉ ႁူမ်ႈငိုၼ်း တင်းမူတ်း တီႈလႆႈ ၵမ်ႉထႅမ်ၸွႆႈမႃး မွၵ်ႈ 400 သႅၼ်ပျႃး ဝႃႈၼႆ။
မိူဝ်ႈဝၼ်းတီႈ 1/10/2021 ၼၼ်ႉ ယူႇတီႈၸုမ်းႁူမ်ႈသၢင်ႈၸွႆႈထႅမ် ၵူၼ်းပၢႆႈၽေးသိုၵ်း ၼႂ်းမိူင်းတႆး လႆႈႁၢင်ႈႁႅၼ်း ၸွႆႈထႅမ် ၵူၼ်းပၢႆႈၽေးသိုၵ်း တီႈဝတ်ႉၵုင်းၸူင် ဢိူင်ႇႁၢမ်းငၢႆး ၸႄႈဝဵင်းမိူင်းၵိုင် ၸိုင်ႈတႆးပွတ်းၸၢၼ်းလႄႈတၢင်း တီႈၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ သွင်ဢွင်ႈတီႈ ႁူမ်ႈငိုၼ်းတင်းမူတ်း တႃႇ 200 သႅၼ်ပျႃး ။
ၼၢင်းထူၺ်းဢိင်ႇ လွႆဢုင်း(ႁွင်ႉ) ၼၢင်းမႂ်ႇ ၵႅမ်ႁူဝ်ပဝ်ႈ 2 မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ လၢတ်ႈ ၽူႈတွႆႇႁွၵ်ႈဝႃႈ – “ၶၢဝ်းတၢင်း ဢၼ်ႁဝ်းၶႃႈ လႆႈၸွႆႈထႅမ်ၵူၼ်းပၢႆႈၽေးသိုၵ်း ၼႂ်းမိူင်းတႆးႁဝ်းၶႃႈ ၶၢဝ်းတၢင်း 4 ပွၵ်ႈပႃးၵမ်းၼႆႉ။ ႁူမ်ႈၵၼ် တင်းမူတ်း တေတူၵ်းမႅၼ်ႈမွၵ်ႈ 400 သႅၼ်ပျႃးၼႆႉယဝ်ႉၶႃႈ။ ၸဝ်ႈတႃႇၼ ဢၼ်တီႈၵမ်ႉၸွႆႈမႃးတႄႉ တေပဵၼ်ၼွၵ်ႈမိူင်း၊ မိူင်းထႆး လႄႈ ၼႂ်းမိူင်း ၸိူဝ်းၼႆႉၶႃႈ။ ထႅင်ႈပွၵ်ႈၵမ်း 5 ၼႆႉ ႁဝ်းၶႃႈတေ ဢိင်ၼိူဝ် တီႈ ၸဝ်ႈတႃႇၼ ၵမ်ႉထႅမ် ၶဝ်ႈမႃးထႅင်ႈၵမ်းၼိုင်ႈၶႃႈ”- ဝႃႈၼႆ။
ၼႂ်းပွၵ်ႈၵမ်း 4 ဢၼ်ယူႇတီႈ ၸုမ်းႁူမ်ႈသၢင်ႈၸွႆႈထႅမ် ၵူၼ်းပၢႆႈၽေးသိုၵ်း ၼႂ်းမိူင်းတႆး လႆႈၵႂႃႇၸွႆႈထႅမ်တၢင်း ပွတ်းမိူင်းၵိုင်လႄႈ ၵျွၵ်ႉမႄးၼၼ်ႉ သမ်ႉပဵၼ် ၽႃႈႁူမ်ႇ၊ ၽႃႈသိူဝ်ႇ၊ ၶႅပ်းတိၼ်၊ တၢင်းၵိၼ်လုၵ်ႈဢွၼ်ႇ၊ ထူဝ်ႇၽူးယႅၼ်ႈပုင်းဢွၼ်ႇ/ ပုင်းလူင်၊ ၶဝ်ႈသၢၼ်၊ ၼမ်ႉမၼ်းၵိၼ်၊ ၽၵ်းမီႇၶၢဝ် ယဝ်ႉၵေႃႈ ဢိၵ်ႇထႅင်ႈၶွင်ၵိၼ်ယႅမ်ႉထႅင်ႈလၢႆလၢႆလွင်ႈ။
ၼွၵ်ႈလိူဝ်ၼၼ်ႉ လႆႈၸွႆႈထႅမ်ပႃးထႅင်ႈ ယႃႈယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 မိူၼ်ၼင်ႇ ၼမ်ႉယႃလၢင်ႉမိုဝ်း၊ ယႃၶူမ်လူင်၊ ယႃႁႅင်း လုၵ်ႈဢွၼ်ႇ လႄႈ မႄႈလုၵ်ႈဢွၼ်ႇ၊ ထူင်မိုဝ်း၊ ၽႃႈတူမ်းသူပ်း (Mask)၊ ယႃႈယႃ ပႃႇရႃႇသီႇတမေႃး ၸိူဝ်းၼႆႉ။
ၸုမ်းႁူမ်ႈသၢင်ႈၸွႆႈထႅမ် ၵူၼ်းပၢႆႈၽေး ၼႂ်းမိူင်းတႆး လၢႆမူႇၸုမ်းႁူမ်ႈၵၼ် ၶွတ်ႇၽွတ်ႈတင်ႈဝႆႉ မိူၼ်ၼင်ႇ သင်ႇၶႃႇၼုမ်ႇ၊ ၸုမ်းၵေႃၵမ်ၵၢၼ် ပွင် သၢင်ႈလွင်ႈငမ်းယဵၼ် PMC ၊ ၸုမ်းၵူၼ်း ၼုမ်ႇတႆး TYO ၊ မုၵ်ႉၸုမ်းၸၢဝ်းၶိူဝ်းတႆး TNC-T လႄႈ ႁူမ်ႈ ၸဝ်ႈတႃႇၼထႅင်ႈတင်းၼမ် လႆႈႁူႉ ၼင်ႇၼႆ။
“ဢဝ်ၵုင်ႇမုၼ်ပီႈၼွင်ႉႁဝ်းၶႃႈ ယႂ်ႇၼမ်တင်းသဵင်ႈ တႄႉတႄႉၶႃႈ ၸိူဝ်းဢၼ်မီးၼမ်ႉၸႂ်ၸေႇတၼႃႇ ၽိူၵ်ႇၸိုၼ်ႈၶၢဝ်ႇသႂ်သေ ၸွႆႈထႅမ်မႃး တႃႇပီႈ ၼွင်ႉထူပ်းၽေး ၼႂ်းမိူင်းတႆးတင်းသဵင်ႈၼၼ်ႉ ဢမ်ႇဝႃႈပီႈၼွင်ႉႁဝ်းၶဝ် တေယူႇတီႈလႂ် ၼႂ်းမိူင်း/ ၼွၵ်ႈမိူင်းတင်းသဵင်ႈ ႁႂ်ႈႁဝ်းၶႃႈ မေႃပွင်ႇၸႂ် မေႃ ၸွႆႈထႅမ် မေႃလဵပ်ႈႁဵၼ်း ၵၢၼ်ႁဝ်းၶႃႈသေ ႁဝ်းၶႃႈ မီးပုၼ်ႈၽွၼ်းမိူၼ်ၵၼ်ၵူႈၵေႃႉၶႃႈ ယွၼ်းၾၢၵ်ႇထိုင် ပီႈၼွင်ႉႁဝ်းၶဝ် ဝႆႉၼင်ႇၼႆၶႃ”- ၼၢင်း ထူၺ်းဢိင်ႇ လွႆဢုင်း(ႁွင်ႉ) ၼၢင်းမႂ်ႇ သိုပ်ႇလၢတ်ႈၼႄၼင်ႇၼႆ။
သင်ဝႃႈမီးလွင်ႈၶႆႈႁူမ်ႈပၢးၸွႆႈထႅမ်ၸိုင် ၵပ်းသိုပ်ႇၸွႆႈထႅမ် လႆႈတီႈ မၢႆၽူၼ်း ၽူႈမီးပုၼ်ႈၽွၼ်းၼႂ်းၸုမ်းႁူမ်ႈသၢင်ႈၸွႆႈထႅမ် +66946170834, +95 257257015, +95 9788984810, +66 853776769 ၸိူဝ်းၼႆႉ – လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ