ၶၢဝ်းတၢင်းသၢမ်လိူၼ်ပၢႆမႃးၼႆႉ ၵူၼ်းၵဵင်းတုင် တိတ်းၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 ပုင်ႈၶိုၼ်ႈၸမ် 4 ႁဵင် ဝႃႈၼႆ။
တႄႇဢဝ် ႁၢင်လိူၼ်ၵျုၼ်ႊမႃး တေႃႇထိုင် ဝၼ်းတီႈ 30/9/2021 ၼႆႉ ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်း တၢင်း ပဵၼ်ၶူဝ်ႊဝိတ်ႉ 19 ၼႂ်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း တင်းမူတ်းထတ်းႁၼ် 3,796 ၵေႃႉ လူႉတၢႆ 70 ပၢႆ ၼႆယဝ်ႉ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ်ၼႆႉ ၾၢႆႇပၢႆးယူႇလီၶဝ် လူင်းပိုၼ်ႉတီႈ ၵူတ်ႇထတ်း ၸွမ်းၼႂ်းဝဵင်း တႃႇ 5 ၶဵတ်ႇ/ ပွၵ်ႉ။ ပေႃးၵူတ်ႇထတ်းယဝ်ႉ တေလူင်းၵူတ်ႇထတ်းၸွမ်းဢိူင်ႇ။ ၼႂ်းဢိူင်ႇၼၼ်ႉၵေႃႈ ပေႃးဝႃႈဝၢၼ်ႈလႂ် ပဵၼ်ၼမ်ၼႆ တေၶဝ်ႈၵူတ်ႇထတ်းဝၢၼ်ႈၼၼ်ႉဢွၼ်တၢင်း ႁဵတ်းၼႆၵႂႃႇ။ တေႃႇထိုင် လိူၼ်ဢွၵ်ႊထိူဝ်ႊပိူဝ်ႊၼႆႉ တၢင်းပဵၼ်ၶူဝ်ႊဝိတ်ႉ 19 ပႆႇၵုမ်းၵမ်လႆႈ၊ တိုၵ်ႉၽႄႈလၢမ်းယူႇၵူႈဝၼ်း”- ဝႃႈၼႆ။
မိူဝ်ႈဝႃး ဝၼ်းတီႈ 30/9/2021 ၼႆႉ ၼႂ်းၸႄႈဝဵင်းၵဵင်းတုင် ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ ၼႂ်းဝၼ်းလဵဝ် 88 ၵေႃႉ။ လူႉတၢႆ 1 ၵေႃႉ ၼႆယဝ်ႉ။
တၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ် ၽႄႈလၢမ်းၼႂ်းၸႄႈဝဵင်းၵဵင်းတုင် ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်း တေႃႇထိုင် ဝၼ်းတီႈ 30 ၼႆႉ တင်းမူတ်း 3,796 ၵေႃႉ လူႉတၢႆ 17 ၵေႃႉ လူင်းႁူင်းယႃယဝ်ႉ 3,087 ၵေႃႉလႄႈ တိုၵ်ႉယူတ်းယႃ 638 ၵေႃႉ သိုဝ်ႉၶၢဝ်ႇပိုၼ်ႉတီႈ ၵဵင်းတုင် ဢွၵ်ႇဝႆႉ ၼင်ႇၼႆ။
