ထဝ်ႈယိင်း ဢႃယု 60 ပၢႆ ၵေႃ့ၼိုင်ႈ လူ့တၢႆ လူၺ်ႈတၢင်းပဵၼ်ၶူဝ်ႊဝိတ့် 19 တီႈၸႄႈဝဵင်းမိူင်းၵိုင် လူႉတၢႆယွၼ်ႉတၢင်းပဵၼ်  ပဵၼ်ၵေႃ့ႁႅၵ်ႈ လႄႈၵူၼ်းမိူင်းတူၵ်းၸႂ်။

မိူဝ်ႈၼႆ့ ဝၼ်းတီႈ 28/9/2021 ယၢမ်းၵၢင်ဝၼ်း 12.20 မူင်းပၢႆ ထဝ်ႈယိင်း ဢႃယု 64 ပီ လူ့တၢႆ ယွၼ့်တၢင်းပဵၼ်ၶူဝ်ႊဝိတ့် 19 တီႈႁူင်းယႃ လူင် ၵူၼ်းမိူင်း ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း ၼႆယဝ့်။

ၽူႈတူင့်ၼိုင် ၼႂ်းတူင်ႇဝူင်းၵူၼ်း မိူင်းၵိုင် ၵေႃ့ၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈၶႃႈဢေႃႈ ပဵၼ်ၵေႃ့ႁႅၵ်ႈ လႆႈႁူ့ဝႃႈ မၼ်းၸပ်း တၢင်းပဵၼ်မႃးတီႈပၢင်လူင်ၼႆၶႃႈ။ ယၢမ်းလဵဝ် ၵေႃ့ပဵၼ်လုၵ်ႈယိင်း ဢၼ်ၵႂႃႇႁပ့်မႄႈထဝ်ႈမႃးၼၼ့် ထုၵ်ႇၵၵ်းတူဝ်ဝႆ့ မီး 3-4 ဝၼ်းယဝ့်ၶႃႈ။ ၵူၼ်းမိူင်းတႄ့  ဢွၼ်ၵၼ် တူၵ်းၸႂ်ၵၼ်ႁႅင်းဢေႃႈ။ ယွၼ့်တီႈမိူင်းၵိုင်ၼႆႉ ပႆႇယၢမ်ႈမီးၽူႈလႂ်ၽႂ်လူ့တၢႆ ယွၼ့်တၢင်းပဵၼ်ၼႆ့သေၵေႃ့လႄႈ ”- ဝႃႈၼႆ။

ဝၢႆးလင် ထဝ်ႈယိင်း ဢႃယု 64 ပီ  လူ့တၢႆ ယွၼ့်တၢင်းပဵၼ်ၶူဝ်ႊဝိတ့် 19 ဢမ်ႇႁိုင်သင် ယၢမ်းဝၢႆးဝၼ်းၼႆႉ ယူႇတီႈၸုမ်းပရႁိတ မိူင်းၵိုင် လႆႈပူၼ့်ၶၢပ်ႈ တူဝ်ပၼ်ၵမ်းလဵဝ် လႆႈႁူႉၼင်ႇၼႆ။  

ထဝ်ႈယိင်း ဢႃယု 64 ပီ ဢၼ်လႆႈလူ့တၢႆၵႂႃႇၼႆႉ ဢမ်ႇယူႇလီ မီးတၢင်းပဵၼ်မၢၵ်ႇႁူဝ်ၸႂ် ၊ လိူတ်ႈသုင်ဝႆႉလႄႈ ၶဝ်ႈယူတ်းယႃတူဝ် တီႈႁူင်းယႃမိူင်းၵိုင် မိူဝ်ႈဝၼ်းတီႈ 22 ပူၼ့်မႃးၼႆ့  ။

တၢင်းပဵၼ်ၶူဝ်ႊဝိတ့် 19 ပွၵ်ႈၵမ်းသၢမ် ၽႄႈလၢမ်းတိတ်းၸပ်း ၵူၼ်းမိူင်းပိုၼ့်တီႈ ၼႂ်းၸႄႈဝဵင်းမိူင်းၵိုင် တေႃႇထိုင် မိူဝ်ႈၼႆ့ ဝၼ်းတီႈ 28/9/2021 ယၢမ်းၵၢင်ၼႂ် မီးၵူၼ်းတိတ်းၸပ်း တင်းမူတ်း 98 ၵေႃ့၊ လူင်းႁူင်းယႃယဝ့် 93 ၵေႃ့၊ တိုၵ့်ယူတ်းယႃတူဝ်ဝႆ့ 4 ၵေႃ့လႄႈ လူ့တၢႆ 1 ၵေႃ့  လႆႈႁူႉၸွမ်းသဵၼ်ႈမၢႆၸုမ်းၸွႆႈထႅမ်တူင်ႇဝူင်းၵူၼ်း ပရႁိတ ၼင်ႇၼႆ။

ထႅင်ႈၾၢႆႇၼိုင်ႈၵေႃႈ တီႈၸႄႈဝဵင်းမိူင်းၵိုင်တၢင်းပွတ်းဢိူင်ႇႁူဝ်ၶၢႆးၼႆ့ သိုၵ်း RCSS လႄႈ SSPP ပိုတ်းယိုဝ်းတိုၵ်းတေႃးၵၼ် တင်ႈတႄႇ ဝၼ်းတီႈ 14/9/2021 ၼႆ့ မႃး လႄႈ မီးၵူၼ်းပၢႆႈၽေးဝႆ့ မွၵ်ႈ 3 ႁဵင်   ။ ၼွၵ်ႈလိူဝ်ၼၼ့် ပၢင်တိုၵ်း ၽႄႈလၢမ်းမႃး တၢင်းဢိူင်ႇႁၢမ်းငၢႆး သေ ၵူၼ်းမိူင်းပွတ်းႁၢမ်းငၢႆး လႆႈပၢႆႈၽေးသိုၵ်း မႃးမူၵ်ႈသွၼ်ႈဝႆ့ တီႈဝတ့်ၵုင်းၸူင် ႁူဝ်ၵူၼ်း 600 ပၢႆထႅင်ႈ တီႈၼၼ်ႈၵေႃႈ လူဝ်ႇ တၢင်းၸွႆႈထႅမ် ၶဝ်ႈၼမ့်တၢင်းၵိၼ် ႁၢဝ်ႁႅင်း ။

ၵူၼ်းမိူင်းၵိုင် မႆႈၸႂ်ၵူဝ်တၢင်းပဵၼ်ၶူဝ်ႊဝိတ်ႉ ၶဝ်ႈၸပ်းၽႄႈလၢမ်းသႂ်ႇၵူၼ်းပၢႆႈၽေးသိုၵ်းလႄႈ ယင်းၶႆႈတုၵ်းယွၼ်းႁႂ်ႈၾၢႆႇပၢႆးယူႇ လီ သႂ်ႇၸႂ်တူၺ်းလူ သမ်းယႃႁႄႉၵင်ႈတၢင်းပဵၼ်ၶူဝ်ႊဝိတ်ႉပၼ်ၵူၼ်းပၢႆႈၽေးသိုၵ်း ဢွၼ်တၢင်းလူးၵွၼ်ႇ ဝႃႈၼႆ။