ၵူၼ်းပၢႆႈၽေးသိုၵ်း တီႈဝဵင်းမိူင်းၵူဝ်း ၸိုင်ႈတႆးပွတ်းႁွင်ႇ တိတ်းၸပ်းၸိူဝ့်မႅင်းတၢင်း ပဵၼ်ၶူဝ်ႊဝိတ့် 19 တင်းမူတ်း 45 ၵေႃ့ ဝႃႈၼႆ။
သိုၵ်းမၢၼ်ႈ တင်း သိုၵ်းၵူဝ်းၵၢင့် MNDAA ပဵၼ်ပၢင်တိုၵ်းၵၼ် ၼႂ်းဝဵင်းမိူင်းၵူဝ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၵူၼ်းမိူင်းပိုၼ့်တီႈ လႆႈဢွၼ်ၵၼ်ပၢႆႈ မႃးသွၼ်ႈဝႆ့ တီႈဝၢၼ်ႈၵွင်းလူင် ၸႄႈဝဵင်းမိူင်းၵူဝ်း တိတ်းၸပ်းၸိူဝ့်မႅင်းတၢင်းပဵၼ် ၶူဝ်ႊ ဝိတ့် 19 တင်းမူတ်း 45 ၵေႃ့ ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ၸႄႈဝဵင်းမိူင်းၵူဝ်း ၵေႃ့ၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈပူၼ့်မႃးပႆႇႁိုင်သင် တီႈဝၢၼ်ႈၵွင်းလူင်ၼႆ့ သိုၵ်းမၢၼ်ႈ ၵႆ့ၶဝ်ႈဢွၵ်ႇ ၵႆ့မႃးဢႅဝ်ႇလႄႇ ယဝ့်ၵေႃႈ ၵႆ့မႃးတူၺ်း ၵႆ့မႃးသူင်ႇၶွင်ၵိၼ်ယႅမ့် ၸိူဝ်းၼႆ့ ႁိုင်ၵႂႃႇ မွၵ်ႈဝူင်ႈၼိုင်ႈၼႆ့ ၵူၼ်းဝၢၼ်ႈၵွင်း လူင် ၼၢဝ် ဢမ်ႇယူႇလီ ဢမ်ႇလႆႈသႅဝ်ဢႆသင်သေ တႄႇတီႈၼၼ်ႈမႃးၵေႃႈ ၵူၼ်းပၢႆႈၽေးသိုၵ်း တီႈၼၼ်ႈ တႄႇတိတ်းၸပ်းတၢင်းပဵၼ် ၵၼ်မႃးၶႃႈဢေႃႈ”- ဝႃႈၼႆ။
ယွၼ့်ၶွင်ႇသီႇသိုၵ်းမၢၼ်ႈ ၵႆ့ၶဝ်ႈဢွၵ်ႇတူင့်ၼိုင်ၵႂႃႇမႃး ၼႂ်းဝၢၼ်ႈၵွင်းလူင်ၼၼ့်သေ ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈၼၼ်ႈၵေႃႈ လႆႈတိတ်းၸပ်းၸိူဝ့်မႅင်းတၢင်းပဵၼ်ၶူဝ်ႊဝိတ့် 19 ပႃးၵေႃႈမီး ဝႃႈၼႆ။
“ႁဝ်းၶႃႈၼႆ့ ဢမ်ႇဝႃႈ ၵူၼ်းမိူင်း ၵူၼ်းပၢႆႈၽေး ႁဝ်းၶႃႈ ၶဝ်ႈၸွႆႈထႅမ်ပၼ် တီႈဝဵင်းမိူင်းၵူဝ်းၼၼ့်သေ ၽူႈၸွႆႈထႅမ်မၢင်ၵေႃ့ လႆႈတိတ်းၸပ်း ၸိူဝ့်မႅင်းတၢင်းပဵၼ်ၶူဝ်ႊဝိတ့် 19 ၸွမ်းၵေႃႈမီးၶႃႈဢေႃႈ။ ယၢမ်းလဵဝ် ၼႂ်းပၢင်သဝ်းၵူၼ်းပၢႆႈၽေးႁဝ်းၶႃႈၼႆ့ တိတ်းၸပ်း ၸိူဝ့်မႅင်း ၶူဝ်ႊ ဝိတ့် 19 မီး 45 ၵေႃ့ၶႃႈယဝ့်”- ၽူႈၸွႆႈထႅမ်ၵူၼ်းပၢႆႈၽေး သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် ၼႂ်းဝဵင်းမိူင်းၵူဝ်းၼႆ့ ၶွင်ႇသီႇသိုၵ်းမၢၼ်ႈ ယိုတ်းမိူင်း ၸႂ့်ႁႅင်းသိုၵ်းတင်းၼမ်သေ ၶႂၢၵ်ႈၼႃႈတီႈ ထႅမ်ႁႅင်းသိုၵ်းထႅင်ႈ ၶိူဝ်းယၢႆး ယဝ့်ၵေႃႈ ၸႂ့်ၶိူင်ႈၵွင်ႈလူင် ပိုတ်းယိုဝ်းယူႇ ၵူႈႁူးၵူႈတၢင်းသေ ႁဵတ်းႁႂ်ႈၵူၼ်းမိူင်းၼႂ်းပိုၼ့်တီႈ ဢွၼ်ၵၼ်ပၢႆႈၽေးသိုၵ်း တင်းမူတ်း ႁဵင်ပၢႆ ယဝ့် ဝႃႈၼႆ။
