တႃႇၵႅတ်ႇၵင်ႈတၢင်းပဵၼ် ၶူဝ်ႊဝိတ့် 19 ၼႆသေ ဝဵင်းၼမ့်လၼ်ႈ Lockdown တဵမ် ၶၢဝ်းတၢင်း 7 ဝၼ်း မိူဝ်ႈၼႆႉ ၶိုၼ်းပိုတ်ႇပၼ်ၵူၼ်းမိူင်း ၵႂႃႇမႃးၶိုၼ်းမိူၼ်ၵဝ်ယဝ့်။
မိူဝ်ႈၼႆ့ ဝၼ်းတီႈ 16/9/2021 တီႈဝဵင်းၼမ့်လၼ်ႈ ၸႄႈဝဵင်းသီႇပေႃ့ ၸႄႈတွၼ်ႈၵျွၵ့်မႄး ၸိုင်ႈတႆးပွတ်းႁွင်ႇ ၶိုၼ်းပူတ်း Lockdown လႄႈ ၵူၼ်းမိူင်း ဢွၵ်ႇၵႂႃႇမႃးသိုဝ့်ၸၢႆႇၶိုၼ်းမိူၼ်ၵဝ်ႇ လႆႈႁူႉၼင်ႇၼႆ။
ၽူႈတူင့်ၼိုင်ၼႂ်းၶွမ်ႊမတီႊတႃႇၵႅတ်ႈၵင်ႈတၢင်းပဵၼ်ၶူဝ်ႊဝိတ့် 19 တီႈၼမ့်လၼ်ႈ ၵေႃ့ၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တႄႇမိူဝ်ႈၼႆ့ၵႂႃႇ ၶိုၼ်းပိုတ်ႇ Lockdown တီႈၼမ့်လၼ်ႈ။ ၵူၼ်းမိူင်းတႄ့ ဢွၵ်ႇႁိူၼ်းၵၼ်ၵမ်ႈၽွင်ႈယူႇ မိူဝ်ႈၼႆ့ ပႆႇၼမ် မိူၼ်မိူဝ်ႈၵူႈပွၵ်ႈ။ ၵူၺ်းၵႃႈ ပိူင် တိုဝ်းၵမ် ၼိုင်ႈႁိူၼ်းလႂ် တေလႆႈဢွၵ်ႇၼိုင်ႈၵေႃ့ တေလႆႈမီးဝႂ်ၶႂၢင့်ဢွၵ်ႇႁိူၼ်းၼၼ့်တႄ့ တိုၵ့်ၸႂ့်တိုဝ်းၵၼ် ႁဵတ်းၸွမ်းပၵ်းပိူင်ဢၼ်ၼၼ့် ယူႇၶႃႈ”- ဝႃႈၼႆ။
ယၢမ်းလဵဝ် ဢၼ်လုၵ့်တၢင်းမိူင်းၵိုင်ၶဝ်ႈမႃးလႄႈသင်၊ လုၵ့်တၢင်းသီႇပေႃ့ၶဝ်ႈမႃးလႄႈသင် ၶိုၼ်း ပိုတ်ႇပၼ် ၶဝ်ႈဢွၵ်ႇၵႂႃႇမႃး ၶိုၼ်းမိူၼ်ၵဝ်ႇယဝ့် ဝႃႈၼႆ။
“တၢင်းၶဝ်ႈဢွၵ်ႇဝဵင်း ၸိူဝ်းၼႆ့ၵေႃႈ ပိုတ်ႇၶိုၼ်းမူတ်းယဝ့်ၶႃႈ ဢၼ်လုၵ့်တၢင်းသီႇပေႃ့မႃးလႄႈသင် လုၵ့်တၢင်းမိူင်းၵိုင်မႃးလႄႈသင် ၸိူဝ်း ၼႆ့။ လွင်ႈလူင်းၵူတ်ႇထတ်း ၸွမ်းၼႂ်းပိုၼ့်တီႈ ၸွမ်းၵိဝ်ႇ ၸိူဝ်းၼႆ့ၵေႃႈ တိုၵ့်ႁဵတ်းယူႇၶႃႈ။ ၵၢတ်ႇတႄ့ၵေႃႈ ပႆႇပိုတ်ႇ ႁၢၼ့်ၶၢႆၶူဝ်း ၶၢႆၽၵ်းၶဵဝ် ၶၢႆၼိူဝ်ႉ ၸိူဝ်းၼႆ့တႄ့ ပိုတ်ႇၶိုၼ်းယဝ့် တႄႇဢဝ် 5 မူင်းၵၢင်ၼႂ် ထိုင် 12 မူင်း ၵၢင်ဝၼ်း။ လင်ၼၼ့် တေလႆႈပိၵ့်ဢိုတ်းယဝ့်ၶႃႈ။ ႁၢၼ့်ၶၢႆ ၶူဝ်း ၸွမ်းႁိူၼ်းယေး ၽႂ်မၼ်းၼၼ့်တႄ့ တႄႇဢဝ် 6 မူင်း ၵၢင်ၼႂ် ထိုင် 6 မူင်းၵၢင်ၶမ်ႈၶႃႈ ပၼ်ၶႂၢင့်ပိုတ်ႇ။ ၵူၺ်းၵႃႈ တေဢမ်ႇလႆႈၶွၼ်ႈ တုမ်ၵူၼ်းၼမ်”- ၽူႈတူင့်ၼိုင် ၼႂ်းၶွမ်ႊမတီႊ သိုပ်ႇလၢတ်ႈၼႄ ၼင်ႇၼႆ။
ၵူၼ်းတိတ်းၸပ်းတၢင်းပဵၼ်တႄႉၵေႃႈ တိုၵ်ႉႁၼ်မႅၼ်ႈယူႇ ၵူၺ်းၵႃႈ ဢမ်ႇၼမ်ပဵင်းမိူဝ်ႈၵွၼ်ႇ ။ ယွၼ့်ဝႃႈ မိူဝ်ႈၼႆ့ တိုၵ့်ပဵၼ်ဝၼ်းႁႅၵ်ႈ ပူတ်းၵၢၼ် Lockdown တီႈဝဵင်းၼမ့်လၼ်ႈၵူၺ်းလႄႈ ၵူၼ်းပိုၼ့်တီႈ ဢွၵ်ႇသိုဝ့်ဢွၵ်ႇၸၢႆႇတႄ့ ပႆႇ မီးၼမ်။ ၵူၺ်းၵႃႈ တေလႆႈပႂ့်တူၺ်းငဝ်းလၢႆး ထႅင်ႈဝႃႈ သင်တၢင်းပဵၼ်ၶူဝ်ႊဝိတ့် 19 ၼႆ့ ၽႄႈလၢမ်းတိတ်းၸပ်းမႃးႁႅင်းထႅင်ႈၸိူင် တေ ၸၢင်ႈ Lockdown ၶိုၼ်းထႅင်ႈယူႇ ဝႃႈၼႆ။
“လွင်ႈတေ Lockdown ထႅင်ႈတၢင်းၼႃႈၼႆ့ ဢိင်ၼိူဝ်ငဝ်းလၢႆးထႅင်ႈၵမ့် သင်ဝႃႈ ၵူၼ်းပဵၼ်တိုၵ့်တိူဝ်းထႅင်ႈ ပဵၼ်ႁႅင်းထႅင်ႈၼႆၸိုင် တေ ၸၢင်ႈ Lockdown ထႅင်ႈယူႇ။ သင်ဝႃႈ Lockdown ထႅင်ႈၸိုင် ႁဝ်းၶႃႈ တေတူၺ်းၶေႃႈမုလ်းဢၼ်ႁဝ်းၶႃႈ Lockdown မႃးၶၢဝ်းတၢင်း 7 ဝၼ်းၼႆ့ မီးလွင်ႈယူပ်ႇယွမ်းၸိူင့်ႁိုဝ် ဢိင်ၼိူဝ် ၶေႃႈမုလ်းဢၼ်ၼၼ့်သေ တေၶိုၼ်းၽိူမ့်ၸိူင့်ႁိုဝ်၊ မူၼ့်မေး ၸိူင့်ႁိုဝ်ထႅင်ႈၼႆၸိူဝ်းၼႆ့ ”- ၽူႈတူင့်ၼိုင် ၼႂ်းၶွမ်ႊပတီႊ သိုပ်ႇလၢတ်ႈၼႄထႅင်ႈ ၼင်ႇၼႆ။
ယၢမ်းလဵဝ် ၼႂ်းဝဵင်းၼမ့်လၼ်ႈ တေႃႇထိုင် ဝၼ်းတီႈ 16/9/2021 ၼႆ့ ၵူၼ်းပဵၼ်တိတ်းၸပ်း ၸိူဝ့်မႅင်းတၢင်းပဵၼ်ၶူဝ်ႊဝိတ့် 19 တင်း မူတ်း 220 ပၢႆ လူ့တၢႆ မွၵ်ႈ 20 ပၢႆ တိုၵ့်ယူတ်းယႃ 10 ပၢႆ ၼႆယဝ့်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ