ၵူၼ်းၼမ်ႉၶမ်း ႁူမ်ႈၵၼ် ၵႂႃႇသၢၼ်ၶတ်းယႃႉႁူဝ်ႉလႅၼ်လိၼ် ဢၼ်ၾင်ႇမိူင်းၶႄႇ လွမ်ႉၶၢမ်း ၶဝ်ႈမႃးတၢင်းၾင်ႇမိူင်းတႆး ဝႃႈၼႆ။

မိူဝ်ႈဝႃး ဝၼ်းတီႈ 12/9/2021 ယၢမ်းႁူဝ်ၶမ်ႈမွၵ်ႈ 6 မူင်း ပီႈၼွင်ႉၼႂ်းဢိူင်ႇဝၢၼ်ႈႁၢတ်ႇႁိၼ် ၸႄႈဝဵင်းၼမ်ႉၶမ်း ႁူမ်ႈၵၼ် ႁူဝ်ၵူၼ်း 100 ပၢႆ ၵႂႃႇသၢၼ်ၶတ်းယႃႉႁူဝ်ႉ ဢၼ်မိူင်းၶႄႇ  ၶၢမ်းလွမ်ႉၶဝ်ႈမႃးတၢင်းဝၢၼ်ႈႁၢတ်ႇႁိၼ် ဢိူင်ႇႁၢတ်ႇႁိၼ် ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ  ။

ႁူဝ်ပဝ်ႈၾၢႆႇၽွင်းငမ်းၼႂ်းဝၢၼ်ႈႁၢတ်ႇႁိၼ် လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မိူဝ်ႈဝႃး ၵူၼ်းဝၢၼ်ႈႁဝ်းၶႃႈ တီႈႁၢတ်ႇႁိၼ် မွၵ်ႈ 100 ပၢႆ ႁူမ်ႈၵၼ်သေ ၵႂႃႇသၢၼ်ၶတ်း ယႃႉပႅတ်ႈ ႁူဝ်ႉဢၼ်တၢင်းၾင်ႇမိူင်းၶႄႇၶဝ် လွမ်ႉၶဝ်ႈမႃးတၢင်းႁဝ်းၶႃႈၼႆႉ။ ႁူဝ်ႉလႅၼ် လိၼ်ၼႆႉ ၶဝ်လွမ်ႉသွင်ၸၼ်ႉ၊ ၸၼ်ႉဢွၼ်တၢင်းၼၼ်ႉ မၼ်းပဵၼ်လႅၼ်ၵၢင်မၼ်း။ ၸၼ်ႉၵမ်း သွင်ၼႆႉသမ်ႉ လွမ်ႉၶဝ်ႈမႃး တၢင်းၾင်ႇမိူင်းတႆးႁဝ်းၼႆႉၶႃႈဢေႃႈ။ ၵွပ်ႈၼႆလႄႈ ၵူၼ်းဝၢၼ်ႈႁဝ်းၶႃႈ ဢွၼ်ၵၼ်ၵႂႃႇယႃႉပႅတ်ႈ ထပ်ႈသွင်ၸၼ်ႉသွင် ဢၼ်ၶဝ်လွမ်ႉ ၶဝ်ႈမႃးၼႆႉၶႃႈ”- ဝႃႈၼႆ။

လႅၼ်လိၼ်ဢၼ်ၶႅၼ်ႈၵၼ်ဝႆႉၼၼ်ႉသမ်ႉ ပဵၼ်ၼႂ်းၵႄႈ ဝၢၼ်ႈႁၢတ်ႇႁိၼ် ၾင်ႇမိူင်းတႆး လႄႈ ဝၢၼ်ႈတိုင်းၶမ်း ၾင်ႇမိူင်း ၶႄႇ ၼႆယဝ်ႉ။

ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၸႄႈဝဵင်းၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်လွမ်ႉႁူဝ်ႉၶဝ်ႈမႃးၼႆႉ ပဵၼ်ၸဝ်ႈၼႃႈတီႈၶႄႇၶဝ်။ ဢွင်ႈတီႈၸိူဝ်းၼၼ်ႉ ပီႈၼွင်ႉဝၢၼ်ႈတိုင်းၶမ်းၶဝ် လႆႈၶၢႆႉယၢႆႉဝႆႉၵမ်ႈၼိုင်ႈ ယွၼ်ႉဝႃႈ တၢင်းပဵၼ် ၶူဝ်ႊဝိတ်ႉ 19 ပွၵ်ႈၵမ်းသၢမ်ၼႆႉသေ။ ႁူဝ်ႉၼႆႉ ၶဝ်လွမ်ႉဝႆႉၵမ်းၼိုင်ႈယဝ်ႉ ပဵၼ်တီႈလႅၼ် မိူင်းတႆး – မိူင်းၶႄႇၸပ်ႈၵၼ်။ ၵမ်းၼႆႉ တၢင်းၾင်ႇမိူင်းၶႄႇၶဝ် ပူၼ်ႉလႅၼ်ၼၼ်ႉသေ လွမ်ႉၶဝ်ႈမႃးၼႂ်းႁဝ်း”- ဝႃႈၼႆ။

ဢိင်ၼိူဝ် လွင်ႈပၼ်ႁႃၼႆႉ ယူႇတီႈၾၢႆႇၽူႈၵွၼ်းၸႄႈဝဵင်းၼမ်ႉၶမ်းၵေႃႈ လူင်းပိုၼ်ႉတီႈၵူတ်ႇထတ်းတူၺ်းသေ လၢတ်ႈဝႃႈ သင်ဝႃႈ တၢင်းၾင်ႇမိူင်းၶႄႇ တိုၵ်ႉလွမ်ႉၶဝ်ႈမႃးထႅင်ႈယူႇၸိုင် ႁႂ်ႈႁဵတ်းလိၵ်ႈတၢင်ႇၶိုၼ်ႈၵႂႃႇတၢင်းၼိူဝ် ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈပီႈၼွင်ႉတႆး တၢင်းၾင်ႇမိူင်းတႆးလႄႈ မိူင်းၶႄႇ ဝၢၼ်ႈတိုင်းၶမ်းၵေႃႈ လႆႈဢုပ်ႇဢူဝ်းငူပ်ႉငီႉၵၼ် မႃးယဝ်ႉ လွင်ႈဝႃႈ ပီႈၼွင်ႉဝၢၼ်ႈတိုင်းၶမ်း ၶၢမ်းႁဵတ်းသူၼ်ၶဝ်ႈမႃး။ ၼင်ႇႁိုဝ် ပေႃးတေဢမ်ႇပဵၼ်ထႅင်ႈ ပီႈၼွင်ႉ တၢင်း ဝၢၼ်ႈႁၢတ်ႇႁိၼ် ၵေႃႈတေဢမ်ႇႁဵတ်းသူၼ်ၶၢမ်းပူၼ်ႉလိၼ်မိူင်းတႆးၶဝ်ႈမိူင်းၶႄႇ။   ယႃႇႁႂ်ႈပီႈၼွင်ႉတႆး တင်းသွင်ၾင်ႇ လႆႈမီးၸႂ် ၸတ်ႉတႅၵ်ႇ ၵၼ်  – ႁူဝ်ပဝ်ႈဝၢၼ်ႈႁၢတ်ႇႁိၼ်လၢတ်ႈ။

မိူဝ်ႈႁၢင်လိူၼ်ၵျူႊလၢႆႊ 2021 ၼၼ်ႉၵေႃႈ တၢင်းၾင်ႇမိူင်းၶႄႇ ၶၢမ်းဢဝ်တီႈလိၼ် ၶွင်ၵူၼ်းမိူင်း ၵိင်ႇၽႄ ၸႄႈဝဵင်းမၢၼ်ႈ ႁဵဝ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ လွမ်ႉႁူဝ်ႉဢဝ်တီႈလိၼ်ၵူၼ်းမၢၼ်ႈႁဵဝ်း (ဢိူင်ႇ 19 မၢၼ်ႈ) ၽွင်းၵူၼ်းမိူင်းၵၵ်း တူဝ် ယူႇႁိူၼ်းႁင်းၽႂ်မၼ်းၼၼ်ႉ။