ယၢမ်းလဵဝ် ၼႂ်းၸႄႈဝဵင်းတႃႈၶီႈလဵၵ်း မီးၽူႈလၵ်ႉၸၵ်ႉၶုတ်ႈလိူင်ႇၼမ်မႃး လိူဝ်ၵဝ်ႇ ႁဵတ်းႁႂ်ႈၵူၼ်းမိူင်း ပိုၼ်ႉတီႈ ဢမ်ႇ မီးလွင်ႈႁူမ်ႇလူမ်ႈ  ဝႃႈၼႆ။

ဝၢႆးသေ ၶွင်ႇသီႇသိုၵ်းမၢၼ်ႈ ယိုတ်းမိူင်း  တင်ႈတႄႇ ဝၼ်းတီႈ 1/2/2021  မႃး ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်း လႅၼ်လိၼ်တႆး – ထႆးၼႆႉ မီးၽူႈလၵ်ႉၸၵ်ႉၶုတ်ႈလိူင်ႈၼမ်မႃးလိူဝ်ၵဝ်ႇၼႆ ၵူၼ်းတႃႈၶီႈလဵၵ်း လၢတ်ႈ တီႈၽူႈတွႆႇႁွၵ်ႈဝႃႈ   –  “ ယၢမ်းလဵဝ် ၵူၼ်းလၵ်ႉၼႆႉလိူင်ႇၼမ်ၼႃႇယဝ်ႉ ၼႂ်းတႃႈၶီႈလဵၵ်း ၸွမ်းႁိူၼ်းယေးၼႆႉ သင်ဢမ်ႇမီးၵူၼ်းပႂ်ႉႁိူၼ်းသေၵေႃႉၵေႃႉၼႆ ဢမ်ႇဝႃႈမဵဝ်းၼိုင်ႈၵေႃႈ မဵဝ်းၼိုင်ႈတိုၼ်း ႁၢႆၶႃႈယဝ်ႉ။ ၶီႈလၵ်ႉၸိူဝ်းၼႆႉ ၶဝ်ပေႃးပႂ်ႉ တူၺ်းယူႇတႃႇသေႇယဝ်ႉ ။ မီးၵူၼ်းယူႇႁိူၼ်း ယူႇၵေႃႈ တိုၵ်ႉႁၢႆယူႇဢေႃႈ သင်ဝႃႈ ပိုတ်ႇၽၵ်းတူဝႆႉ ဢမ်ႇၵွင်ႉသေႃးၸွမ်း။   ”- ဝႃႈၼႆ။

ၼႂ်းၸႄႈဝဵင်းတႃႈၶီႈလဵၵ်းၼႆႉ ၵမ်ႈၼမ် ၶူဝ်းၶွင် ဢၼ်ၵႆႉႁၢႆသေပိူၼ်ႈတႄႉ ပဵၼ်ရူတ်ႉၶိူင်ႈ ၼႆယဝ်ႉ။

“ရူတ်ႉၶိူင်ႈၼႆႉ ၶႂ်ႈဝႃႈ ႁၢႆၵူႈဝၼ်းယဝ်ႉ ၵမ်ႈၼမ် ဢၼ်တေႁၢႆတႄႉ ၸွမ်းႁွင်ႈၶၢတ်ႈ ၸိူဝ်းၼႆႉၶႃႈ။ လွၵ်ႉႁူဝ်ရူတ်ႉဝႆႉယူႇၵေႃႈ  ယင်းဢဝ်ၵႂႃႇလႆႈယူႇ ။ သႂ်ႇၵွင်ႈ CCTV ဝႆႉၵေႃႈ ဢမ်ႇၸၢင်ႈႁဵတ်းႁိုဝ် ႁၼ်ယူႇဢိူဝ်ႈၵူၼ်းလၵ်းၼၼ်ႉ။ သင် ရူတ်ႉၶိူင်ႈႁၢႆၼႆ လူဝ်ႇဝႆႉၸႂ်ဝႃႈ ဢမ်ႇႁၼ်ၶိုၼ်းယဝ်ႉ သုမ်းယဝ်ႉၼႆၵူၺ်းယဝ်ႉ။ ရူတ်ႉၶိူင်ႈ ၸိူဝ်း ႁၢႆၸိူဝ်းၼႆႉ တေႃႇထိုင် ယၢမ်းလဵဝ် ဢမ်ႇမီးၽႂ်လႆႈၶိုၼ်းသေလမ်းၶႃႈ။ ပလိၵ်ႈၵေႃႈဢမ်ႇႁဵတ်းၵၢၼ် ။ ၵႂႃႇတိူင်ႇၵေႃႈ တိူင်ႇလၢႆလၢႆၵူၺ်းၶႃႈ ဢေႃႈ”-  ၵူၼ်းၼုမ်ႇ သိုပ်ႇလၢတ်ႈၼႄၼင်ႇၼႆ။

ယွၼ်ႉဝႃႈ ငဝ်းလၢႆး ယၢမ်းလဵဝ်ၼႆႉ ၵၢၼ်မိူင်းၵေႃႈ သုၵ်ႉယုင်ႈ ပိူင်ၼိုင်ႈ တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းၵေႃႈ ပိူင်ၼိုင်ႈ  ၵၢၼ်ႁႃ ၵိၼ်လဵင်ႉတွင်ႉ ယၢပ်ႇၽိုတ်ႇၵပ်ႉၵိၼ်းၵၼ်မႃးႁၢဝ်ႈႁႅင်း ၼႆႉယဝ်ႉ။

ၵူၼ်းပိုၼ်ႉတီႈ တႃႈၶီႈလဵၵ်း ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈဝႃႈ – “ၵူၼ်းၼႆႉ မၼ်းတိူၵ်ႈယဝ်ႉ ပေႃးတိူၵ်ႈယဝ်ႉၵေႃႈ ၸၢင်ႈမိူၵ်ႈၼၼ်ႉၶႃႈယဝ်ႉ။ ယွၼ်ႉၵၢၼ်ႁႃၵိၼ်လဵင်ႉတွင်ႉၼၼ်ႉၶႃႈယဝ်ႉ။ ၵိၼ်သမ်ႉၵိၼ်ၵူႈဝၼ်းၶႃႈလူး တႃလႆႈဢမ်ႇမီး ၼႆ တေႁဵတ်းႁိုဝ် ၵွပ်ႈၼႆလႄႈ ၵၢၼ်မိူၵ်ႈၼႆႉ မၼ်းၸင်ႇပဵၼ်မႃးၼမ်ၶႃႈယဝ်ႉ။ ပေႃးလၢတ်ႈသိုဝ်ႈသိုဝ်ႈၵေႃႈ ယူႇတီႈလူင် ပွင်ၸိုင်ႈၼၼ်ႉၵူၺ်း။ လွင်ႈႁူမ်ႇလူမ်ႈၵေႃႈ ဢမ်ႇမီးသင်ယဝ်ႉ တီႈတႃႈၶီႈလဵၵ်းၼႆႉ”- ဝႃႈၼႆ။

ၵမ်ႈၼမ် ၽူႈလၵ်ႉၸၵ်ႉၶုတ်ႈ ၼႂ်းၸႄႈဝဵင်းတႃႈၶီႈလဵၵ်းၼႆႉ ပဵၼ်ၵူၼ်းလုၵ်ႉတၢင်းပွတ်းထုင်ႉလိၼ်ပဵင်းမႃးၵမ်ႈၼမ်။    လွင်ႈရူတ်ႉၶိူင်ႈႁၢႆ ၶူဝ်း ၶွင်ႁၢႆ ၸိူဝ်းၼႆႉ ၸဝ်ႈၶွင်ရူတ်ႉၵႂႃႇတၢင်ႇလၢတ်ႈ တီႈလုမ်းပလိၵ်ႈၵေႃႈ ဢမ်ႇတွၼ်ႉတီႉလႆႈ တူဝ်ၵူၼ်းႁၢႆႉ ၵူၼ်းလၵ်ႉသေ ပွၵ်ႈ ၵူၼ်းပိုၼ်ႉတီႈ တႃႈၶီႈလဵၵ်းလၢတ်ႈ။

ၼွၵ်ႈလိူဝ်ၼၼ်ႉ တီႈၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၵေႃႈ  ၽူႈလၵ်ႉ ၵူၼ်းၸူၼ် လိူင်ႇၼမ် ။ ၸွမ်းၵၢင်ဝဵင်း ၸိူဝ်းၼႆႉ ၽူႈလၵ်ႉၵူၼ်းၸူၼ်  ဢဝ်ရူတ်ႉၶိူင်ႈလမ်းၸွမ်းသေ ၽႃႇတမ် လၢၵ်ႈၸၼ် ပေႃႉထုပ်ႉ ၸူၼ်ႁိမ်လိပ်း  ၵေႃႈမီး ။