ၶွမ်ႊပၼီႊႁူင်ပင်း ၸႂ်ႉႁႅင်းၵူၼ်းတင်းၼမ် ဢဝ်ရူတ်ႉ ၶဝ်ႈထုၺ်ထႆသူၼ်ႁႆႈၼႃး ၵူၼ်းဝၢၼ်ႈ ႁွင်ႇ တႃႈၶီႈလဵၵ်းထႅင်ႈ ဝႃႈၼႆ။
မိူဝ်ႈၼႆႉ ဝၼ်းတီႈ 6/9/2021 ယၢမ်းၵၢင်ၼႂ် မွၵ်ႈ 9 မူင်း ၶွမ်ႊပၼီႊႁူင်ပင်း ဢဝ်ဢဵၼ်ႁႅင်းၵူၼ်း မွၵ်ႈ 60 ပၢႆ ရူတ်ႉၵႃးပႅၵ်ႉႁူဝ်ႊ 2 လမ်းလႄႈ ၵႃးထုၺ်လိၼ် 1 လမ်း ၶဝ်ႈထႆထုၺ်လိၼ် ၼႂ်းသူၼ်ႁႆႈၼႃး ၵူၼ်းဝၢၼ်ႈႁွင်ႇ ၼႂ်းဢိူင်ႇႁွင်ႈလိုၵ်ႉ ၸႄႈဝဵင်း တႃႈၶီႈ လဵၵ်းထႅင်ႈ ၼႆယဝ်ႉ။
ၸဝ်ႈၶွင်တီႈလိၼ်/ သူၼ်ႁႆႈၼႃး ဝၢၼ်ႈႁွင်ႇ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ၶဝ်ဢဝ်ၵႃးပႅၵ်ႉႁူဝ်ႊ 2 လမ်း ၵႃးထုၺ်လိၼ် 1 လမ်း ႁႅင်းၵူၼ်း 60 ပၢႆ ၵူၼ်းၼုမ်ႇလွၼ်ႉလွၼ်ႉ မႃးထုၺ်လိၼ်သူၼ်ႁႆႈၼႃး ၵူၼ်းဝၢၼ်ႈ ။ ၶဝ်ဢမ်ႇမႃးထုၺ်တၢင်းၼႃႈ ၶဝ်ၶဝ်ႈထုၺ်တၢင်းလင်ဢဝ်ၶႃႈ။ တူၼ်ႈမႆႉၶီႈလဵၵ်း ဢၼ်ၸဝ်ႈၼႃးၽုၵ်ႇဝႆႉၸိူဝ်းၼၼ်ႉၵေႃႈ လူမ်ႉႁၢၵ်းလူင်းမူတ်းၶႃႈဢေႃႈ”- ဝႃႈၼႆ။
ဢွင်ႈတီႈလိၼ် တႃႇ 100 ဢေႊၶိူဝ်ႊၼၼ်ႉ ပဵၼ်တီႈလိၼ် ၵူၼ်းဝၢၼ်ႈ ၼႂ်းဢိူင်ႇႁွင်ႈလိုၵ်ႉ တင်းမူတ်းတေ မီးၸဝ်ႈၶွင် မၼ်းဝႆႉ မွၵ်ႈ 50 ၵေႃႉၼႆႉ ဝႃႈၼႆ။
“တီႈလိၼ်ၼၼ်ႉ မၼ်းပဵၼ်ၶွင်တီႈလိၼ်ၵူၼ်းမိူင်းႁဝ်းၶႃႈ ၶဝ်ႁဵတ်းၶူင်းၵၢၼ် ဢမ်ႇဢွင်ႇၼႆၵေႃႈ ၶဝ်လူဝ်ႇပၼ်ၶိုၼ်း ၵူၼ်း မိူင်း။ မၼ်းပဵၼ်တီႈလိၼ်ၵူၼ်းမိူင်းလူး။ ၶဝ်တိုၼ်းဢမ်ႇယွမ်းၶႃႈ တီႈလိၼ်ၼၼ်ႉ ၶဝ်တိုၼ်းၶႂ်ႈလႆႈ ႁိမ်ဢဝ်ၵူၼ်းမိူင်းၶႃႈ ယဝ်ႉ”- ၸဝ်ႈၶွင်တီႈလိၼ်သူၼ်ႁႆႈၼႃးၼၼ်ႉ သိုပ်ႇလၢတ်ႈၼႄၼင်ႇၼႆ။
ပၼ်ႁႃ လွင်ႈတီႈလိၼ်ၼႆႉ ၵူၼ်းဝၢၼ်ႈႁွင်ႇတင်း ၶွမ်ႊပၼီႊႁူင်ပင်း လႆႈၽိတ်းထဵင်ၵၼ် ႁိမ်ၵၼ်မႃး တေႃႇထိုင်ယၢမ်းလဵဝ် ၵူၺ်းၵႃႈ ဢမ်ႇမီးၸုမ်းလႂ် မူႇလႂ် ၶဝ်ႈၵႄႈၸွႆႈသင်ပၼ်။ ၶွင်ႇသီႇသိုၵ်းမၢၼ်ႈ ယိုတ်းမိူင်းတႄႉ ၶဝ်ႈႁူမ်ႈၸွႆႈတင်း ၾၢႆႇၶွမ်ႊပ ၼီႊ ဝႃႈၼႆ။
လွင်ႈပၼ်ႁႃတီႈလိၼ်ၼႆႉ မိူဝ်ႈပီ 1998-1999 မိူဝ်ႈပၢၼ်သိုၵ်းၽွင်းငမ်းဝၢၼ်ႈမိူင်းၼၼ်ႉ ၶဝ်ဢထမ်ႇမတဵၵ်းဢဝ်လၢႆတီႈ လိၼ်ၵူၼ်းဝၢၼ်ႈ ၼႂ်းဢိူင်ႇႁွင်ႈလိုၵ်ႉ ၸႄႈဝဵင်းတႃႈၶီႈလဵၵ်း တႃႇ 100 ဢေႊၶိူဝ်ႊ။ ပၼ်ၶွမ်ႊပၼီႊႁူင်ပင်းၸႂ်ႉ ဢဝ်ႁဵတ်း ႁူင်းၸၢၵ်ႈထူင်ယၢင် တႃႇ 20 ဢေႊၶိူဝ်ႊ။ ၵမ်းၼႆႉ ၵိုတ်းထႅင်ႈ 80 ဢေႊၶိူဝ်ႊၼၼ်ႉ ၸဝ်ႈၶွင်သူၼ်ႁႆႈၼႃႈ ၶိုၼ်း ၽုၵ်ႇသွမ်ႈ ၵိၼ်ၼႂ်းမၼ်းမႃးၶိုၼ်း။
မိူဝ်ႈပီ 2018 ၼၼ်ႉ ယူႇတီႈၻွၵ်ႊတိူဝ်ႊလိၼ်းထုတ်ႉ ၸွမ်ၽွင်းလူင် မိူင်းတႆးလၢတ်ႈဝႃႈ တီႈလိၼ်သူၼ်ႁႆႈၼႃး ၵူၼ်းမိူင်း ဢၼ်ထုၵ်ႇႁုပ်ႈယိုတ်းဢဝ်ၵႂႃႇၼၼ်ႉ သင်ဝႃႈ ဢမ်ႇၽုၵ်ႇသွမ်ႈသင်ၼႆ ပၼ်ၶိုၼ်းၸဝ်ႈၶွင်တီႈလိၼ်ၶိုၼ်းၼႆသေ ၵူၼ်း ဝၢၼ်ႈၶိုၼ်ႈလုမ်းတြႃး တေႃႇသူႈ ဢွင်ႇပေႉမႃးယဝ်ႉသေတႃႉ ၶွမ်ႊပၼီႊ ဢမ်ႇယွမ်းပၼ်ၶိုၼ်း။ ၵူၼ်းမိူင်းသမ်ႉတုၵ်းယွၼ်း မႃးၶိူဝ်းယႂ်းထိုင်တီႈၶွမ်ႊပၼီႊဢဝ်ႁႅင်းပလိၵ်ႈလႄႈသိုၵ်းမႃးလွမ်ႉႁူဝ်ႉဢဝ် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ