မိူဝ်ႈၼႆႉဝၼ်းတီႈ 1/9/2021 ယၢမ်းၵၢင်ဝၼ်း 11:45 မူင်း မုၼ်ၸဝ်ႈၵူဝ်ႇယိၼ်ႇလေး (ၸဝ်ႈပေႃးရိသ)  ဢႃယု 47 ပီ ၸႄႈဝဵင်းႁူဝ်ပူင်း ၸိုင်ႈတႆးပွတ်းၸၢၼ်း လူႉလွၼ်ႇသဵင်ႈမုၼ် လူၺ်ႈတၢင်းပဵၼ်ၶူဝ်ႊဝိတ်ႉ 19 တီႈၵျွင်းမၼ်းၸဝ်ႈ ဢၼ်မီးတီႈ ဝၢၼ်ႈႁူဝ်တိုဝ်ႉ ၸႄႈဝဵင်းႁူဝ်ပူင်း ။

တၵ်ႉၵႃႇမၼ်းၸဝ်ႈၵူၼ်းတူၼ်ႈတီး ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ၶူဝ်ႊဝိတ်ႉ 19 ၶႃႈဢေႃႈ။ ၵမ်ႉမႃးဝၢႆးဝၼ်းၼႆႉ တေသၢင်းၵဵဝ်ႇၽဝ်ၶၢပ်ႈတူဝ်ၸဝ်ႈယဝ်ႉၼႆၶႃႈဢေႃႈ။ ႁဝ်းၶႃႈတႄႉ ဢမ်ႇၸၢင်ႈၵႂႃႇလူႇ ၵႂႃႇဝႆႈၶႃႈ။ ၵွပ်ႈပိူဝ်ႈတီႈၼႆႉၵေႃႈ ပိူၼ်ႈဢမ်ႇပၼ်ဢွၵ်ႇႁိူၼ်း။ တီႈပၢင်ၸႃႇပၼ ၸဝ်ႈၵေႃႈ ပိူၼ်ႈတေဢမ်ႇပၼ်ၵူၼ်းမိူင်းၶဝ်ႈႁူမ်ႈ။ ပဵၼ်ၸႂ်ဢမ်ႇလီတႄႉဢေႃႈ ” – ဝႃႈၼႆ။

လိူဝ်ၼၼ်ႉ  ၽူႈၼမ်းၼမ်း ၸုမ်းၸိူဝ်ႉၸၢတ်ႈပဢူဝ်း ၽျႃးၶုၼ်ႇတဵင်းၽေႇ ၵေႃႈလၢတ်ႈတီႈၸုမ်းၶၢဝ်ႇပဢူဝ်း ဝႃႈ- ၸၢဝ်းပဢူဝ်း ၸဝ်ႈၽူႈပူၵ်းပွင်သႃသၼႃ  လႆႈလူႉလွၼ်ႇၶဝ်ႈသူၼ်မၢၵ်ႇႁၢၵ်ႈၶမ်းၵႂႃႇ  တွၼ်ႈတႃႇၸၢဝ်းပဢူဝ်းတင်းမူတ်း လႄႈ တွၼ်ႈတႃႇၸုမ်း PNO ႁဝ်းၶႃႈ ပဵၼ်ဢၼ်ၸႂ်ဢမ်ႇလီတႄႉတႄႉၶႃႈဢေႃႈ – ဝႃႈၼႆ။

ၶၢပ်ႈတူဝ်ၸဝ်ႈၵူဝ်ႇယိၼ်ႇလေး ၵေႃႈ တေသၢင်းၵဵဝ်ႇ မိူဝ်ႈၼႆႉဝၢႆးဝၼ်းၵမ်းလဵဝ်လႆႈႁူႉၼင်ႇၼႆ။

တီႈဝဵင်းႁူဝ်ပူင်းၼႆႉ ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 တင်းမူတ်းမီး 576 ၵေႃႉ။ လူႉသဵင်ႈယွၼ်ႉတၢင်းပဵၼ်ၼႆႉမီး 8 ၵေႃႉယဝ်ႉလႆႈႁူႉၸွမ်းၸုမ်းႁဵတ်းၵၢၼ်ပရႁိတ ၼႂ်းပိုၼ်ႉတီႈၼင်ႇၼႆ။

မုၼ်ၸဝ်ႈၵူဝ်ႇယိၼ်ႇလေးၼႆႉ ၸိုဝ်ႈသဵင်လိုဝ်းလင်လူၺ်ႈပဵၼ် မုၼ်ၸဝ်ႈၸိူဝ်ႉၸၢတ်ႈပဢူဝ်း ဢၼ်ၸွႆႈၵၢၼ်ၸိူဝ်ႉၸၢတ်ႈပဢူဝ်း၊ ဢၼ်ပၼ်ဢတိၵ်ႈထီႇမႅၼ်ႈယမ်၊ မႃးယူႇသဝ်းၼႂ်းထမ်ႈၸၢင်ႉတီႈၼႂ်းၸႄႈဝဵင်းႁူဝ်ပူင်းသေ ႁဵတ်းၵၢၼ်သႃႇသၼႃႇ ပူၵ်းပွင်ပိုၼ်ႉတီႈ ၵူၼ်းမိူင်းတီႈၸမ်တီႈၵႆ မႃးဢႅဝ်ႇယဵမ်ႈဝႆႈသႃ၊ ဢၼ်ၶိုၼ်ႈၵႂႃႇၵေႃႇၵွင်းမူးၶမ်းၼိူဝ်ၸိၵ်းလွႆ ထမ်ႈၸၢင်ႉသေ ႁဵတ်းပွႆးလိူၼ်သီႇဝၼ်းၸိူဝ်ႉၸၢတ်ႈပဢူဝ်း ၵိုၼ်းၶွၼ်ႈယႂ်ႇလူင် ၸဵမ်ၸိူဝ်းၼႆႉ။