တင်ႈတႄႇသိုၵ်းမၢၼ်ႈယိုတ်းမိူင်း ပီ 2021 လိူၼ်ၾႅပ်ႊပိဝ်ႊရီႇ 1 ဝၼ်း တေႃႇထိုင် ပီ 2016 လိူၼ်ဢေႊပရႄႊလ် ဝၼ်းတီႈ 10 ၸဝ်ႈသင်ႇၶ လႄႈ ၸဝ်ႈၶၢဝ် (ၼၢႆးၶၢဝ်) လႄႈ ၵူၼ်း ၸိူဝ်းႁဵတ်းၵၢၼ်ၼႂ်းသႃႇသၼႃႇ လူႉလွၼ်ႇ သဵင်ႈၵၢမ်ႇၵႂႃႇ 93 ၵေႃႉ ဝႃႈၼႆ။

ၸုမ်းပၵ်းတႃပႂ်ႉတူၺ်းၸွႆႈထႅမ် ၵူၼ်းတူၵ်းၶွၵ်ႈၵၢၼ်မိူင်း (AAPP) ပိုၼ်ၽၢဝ်ႇဢွၵ်ႇဝႃႈ – ၵူၼ်းၸိူဝ်းလူႉလွၼ်ႇ သဵင်ႈၵၢမ်ႇၵႂႃႇၼၼ်ႉ ပဵၼ်ၵူၼ်းၼုမ်ႇၾၢႆႇတႂ်ႈဢႃႇယု 18 ပီ ၼႆႉ မီးယူႇ 18 ၵေႃႉသေ တႃႇ 19 ၵေႃႉၼႆႉ ပဵၼ်ၵူၼ်းယူႇၼႂ်းတိူင်းၸႄႈၵႅင်း ၼမ်လိူဝ်ပိူၼ်ႈသုတ်းသေ ၵူၼ်းၼႂ်းမိူင်းတႆးၵေႃႈ ပႃးၼမ်တီႈသွင် ပဵၼ် 16 ၵေႃႉ ၼႆယဝ်ႉ။

ၸဝ်ႈသင်ႇၶ လႄႈ ၸဝ်ႈၶၢဝ် ဢိၵ်ႇပႃး ၵူၼ်းၸိူဝ်းႁဵတ်းၵၢၼ်ၼႂ်းသႃႇသၼႃႇ လူႉလွၼ်ႇ သဵင်ႈၵၢမ်ႇၵႂႃႇ တႃႇ 49 ၵေႃႉၼႆႉ ပဵၼ်ယွၼ်ႉ သိုၵ်းမၢၼ်ႈယိုတ်းမိူင်း ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ႁၢဝ်ႈႁႅင်း။ လူႉသဵင်ႈၵႂႃႇ ယွၼ်ႉၶိူင်ႈၵွင်ႈလူင် တႃႇ 16 ၵေႃႉ။

မိူဝ်ႈပူၼ်ႉမႃး ဝၼ်းတီႈ 6 လိူၼ်ဢေႊပရႄႊလ်ၼႆႉၵေႃႈ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ တီႈႁူင်းႁဵၼ်း ဝၢၼ်ႈသိၼ်ႇဢိၼ်း ၸႄႈဝဵင်းသူၺ်ႇပူဝ်ႇ မိူင်းမၢၼ်ႈထုင်ႉပဵင်းသေ ၸဝ်ႈၸၢင်း ပႃးၼိုင်ႈ လႄႈ ၼၢင်းယိင်းၵေႃႉၼိုင်ႈ လူႉသဵင်ႈၵႂႃႇထႅင်ႈ။

လိူဝ်ၼၼ်ႉ ၵူၼ်းႁဵတ်းၵၢၼ်ၼႂ်းသႃႇသၼႃႇ ၸိူဝ်းၵဵဝ်ႇၵွင်ႉၸွမ်း ၵၢၼ်လုၵ်ႉၽိုၼ်ႉ တႃႇ 169 ၵေႃႉၵေႃႈ ၺႃးသိုၵ်းမၢၼ်ႈ တီႉၺွပ်းၵႂႃႇ ပဵၼ်ၵူၼ်းၼႂ်းတိူင်းဝဵင်းလိူဝ်ႇ (မၢၼ်းတလေး) 61 ၵေႃႉ ၼမ်လိူဝ်ပိူၼ်ႈသုတ်း ဝႃႈၼႆ။