သိုၵ်းမၢၼ်ႈ ဢၼ်ပႂ်ႉၵဵၵ်ႉ/ လၢၼ်ႇ ၼႂ်းၵႄႈလၢႆးၶႃႈ – မိူင်းၵိုင် ၵေႃႉၼိုင်ႈ လၵ်ႉပၢႆႈ ပႃးၵွင်ႈၵႂႃႇ 4 လဝ်း ရူတ်ႉၶိူင်ႈ 1 လမ်းလႄႈ ငိုၼ်းၵမ်ႈၽွင်ႈ ။
မိူဝ်ႈဝၼ်းတီႈ 29/8/2021 ပူၼ်ႉမႃးၼၼ်ႉ သိုၵ်းမၢၼ်ႈ ၵေႃႉၼိုင်ႈ တႂ်ႈတပ်ႉၶမယ 515 ဢၼ်ပႂ်ႉၵဵၵ်ႉ/ လၢၼ်ႇ တီႈလွႆၶႂၢင် ၼႂ်းၵႄႈမိူင်းၵိုင် – လၢႆးၶႃႈ ၵဵၵ်ႉ 49 လၵ်း ၼႂ်းၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်း ၼၼ်ႉ လၵ်ႉပၢႆႈ။ သိုၵ်းပၢႆႈတပ်ႉၵေႃႉၼၼ်ႉ လၵ်ႉပႃး ၵွင်ႈ 4 လဝ်း ရူတ်ႉၶိူင်ႈ 1 လမ်း၊ ငိုၼ်း ၵွင်ၵၢင်ၼႂ်းတပ်ႉပၢင်သဝ်းၶဝ်သေပၢႆႈ – လႆႈႁူႉၸွမ်းၶၢဝ်ႇၼင်ႇၼႆ ။
ၵူၼ်းမိူင်းၵိုင် ဢၼ်မိုတ်ႈၵိုဝ်းၸမ်ၸႂ်ၵၼ်တင်းတပ်ႉသိုၵ်းမၢၼ်ႈ ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈဝႃႈ – “ၵွင်ႈၵေႃႈ မၼ်းလၵ်ႉပႃးၵႂႃႇ ပဵၼ် 4 လဝ်းလႄႈ တႄႇမိူဝ်ႈၼႆႉၵႂႃႇ ၶဝ်သူင်ႇသိုၵ်းတႄႇ သွၵ်ႈတဝ်ႈႁႃယူႇယဝ်ႉၶႃႈ။ တီႈၵဵၵ်ႉလွႆၶႂၢင်ၼၼ်ႉ ၵမ်ႈၼမ် တေႁူႉၵၼ် ႁွင်ႉၵၼ်ဝႃႈ ၵဵၵ်ႉ/ လၢၼ်ႇ 49 လၵ်းၼႆၶႃႈ”- ဝႃႈၼႆ။
ဝၢႆးသေ သိုၵ်းမၢၼ်ႈ ပႂ်ႉၵဵၵ်ႉၵေႃႉၼိုင်ႈ ႁၢႆၵႂႃႇယဝ်ႉ ၸုမ်းမၢၼ်ႈ ယိုတ်းမိူင်း ၵူတ်ႇထတ်းတီႈၵဵၵ်ႉ/ လၢၼ်ႇ ၵူၼ်းၵႂႃႇမႃး ၸွမ်းသဵၼ်ႈတႃႈသၢႆတၢင်းၼၼ်ႉ ႁၢဝ်ႈႁႅင်း လိူဝ်ၵဝ်ႇ။
“တႄႇဢဝ် မိူဝ်ႈဝႃး ဝၼ်းတီႈ 30 ၸဵမ်ၸဝ်ႉၶႃႈ သိုၵ်းမၢၼ်ႈ ဢၼ်ၶဝ်ပႂ်ႉတီႈၵဵၵ်ႉလွႆၶႂၢင်/ ၵဵၵ်ႉ 49 လၵ်းၼၼ်ႉ ၶဝ်ၵူတ်ႇ ထတ်းၵူၼ်းၵႂႃႇမႃး ၼိူဝ်သဵၼ်ႈတၢင်းၼၼ်ႉ ႁၢဝ်ႈႁႅင်း” – ၵူၼ်းၼုမ်ႇပိုၼ်ႉတီႈ သိုပ်ႇလၢတ်ႈ ၼႄၼင်ႇၼႆထႅင်ႈ။
ယၢမ်းလဵဝ် ၶွင်ႇသီႇသိုၵ်းမၢၼ်ႈ ယိုတ်းမိူင်းၼႆႉ သူင်ႇႁႅင်းသိုၵ်းတင်းၼမ်လၢႆ မႃးတူင်ႉၼိုင်ယူႇဝႆႉ ၼႂ်းဢိူင်ႇဝၢၼ်ႈယၢတ်ႇ ဢၼ်မီးၾၢႆႇၸၢၼ်းဝဵင်းမိူင်းၵိုင် တိတ်းၸပ်းၵၼ်တၢင်းတပ်ႉလွႆၶႂၢင် ၊ တေႁွၼ်ႈထဝ်ႇ သွၵ်ႈႁႃ ဝူင်ႈၵၢင် လၢႆးၶႃႈ မိူင်းၵိုင် ဝႃႈၼႆ။
တပ်ႉ ၶမယ 515 ၼႆႉ ငဝ်ႈငုၼ်း ပၵ်းတီႈဝဵင်းလၢႆးၶႃႈ၊ ယူႇတႂ်ႈ ငဝ်ႈငုၼ်းတိူင်းသိုၵ်းဝၼ်းဢွၵ်ႇၵၢင် ယလၶ ဢၼ်ပၵ်းတီႈဝဵင်းၶူဝ်လမ် ၸႄႈဝဵင်းၼမ်ႉၸၢင်။
