သင်ၶၸဝ်ႈ တီႈတိူၵ်ႈသွၼ်လိၵ်ႈဝတ်ႉပုပ်ႉပႃႇရူင်ႇ ဝဵင်းလွႆၶေႃ ၸပ်းၶူဝ်ႊဝိတ်ႉ 19 ႁိမ်း 100 တူၼ်ၼၼ်ႉ ယၢမ်းလဵဝ် ၸိုၼ်ႈ ၶႅၼ်းယူႇလီၵၼ်မႃးတင်းၼမ်ယဝ်ႉ။
တႄႇဢဝ် ဝၼ်းတီႈ 23 – 24/8/2021 တေႃႇထိုင်မႃး ဝၼ်းတီႈ 31/8/2021 ၼႂ်းၶၢဝ်းတၢင်းၼိုင်ႈဝူင်ႈမႃးၼႆႉ သင်ၶၸဝ်ႈ 92 တူၼ် ဢၼ်တိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တီႈတိူၵ်ႈသွၼ်လိၵ်ႈ ဝတ်ႉပုပ်ႉပႃႇရူင်ႇ ဝဵင်းလွႆၶေႃ/ လွႆၵေႃႇ (ၵယႃး) ၸႄႈ မိူင်းယၢင်းလႅင်ၼၼ်ႉ ယၢမ်းလဵဝ် ၸိုၼ်ႈၶႅၼ်းယူႇလီၵၼ်မႃးတင်းၼမ် ၼႆယဝ်ႉ။
ၸဝ်ႈၶူးဢႃႇတိတ်ႉၸ ၶူးသွၼ်ဝတ်ႉပုပ်ႉပႃႇရူင်ႇ ဝဵင်းလွႆၶေႃ လၢတ်ႈၼႄၽူႈတွႆႇႁွၵ်ႈဝႃႈ – “ၶၢဝ်းတၢင်း ၼိုင်ႈဝူင်ႈမႃးၼႆႉ သင် ၶၸဝ်ႈ ဢၼ်တိတ်းၸပ်းၶူဝ်ႊဝိတ်ႉၼၼ်ႉ ဢွၼ်ၵၼ်ၸိုၼ်ႈၶႅၼ်း လႅတ်းသႅဝ်း ၵၼ်မႃးတင်းၼမ်ယဝ်ႉ။ ၵူၺ်းၵႃႈ ဢႆတႄႉ မီးဢိတ်းဢွတ်းယူႇ။ ထိုင်တီႈပေႃးလႆႈ ၸႂ်ႉၶိူင်ႈဢွၵ်ႊသီႊၵျိၼ်ႊသေ ၸွႆႈတႄႉ ဢမ်ႇမီး။ ဢွၵ်ႊသီႊၵျိၼ်ႊၵေႃႈ တႅၵ်ႈပၼ် ယူႇၵူႈၸဝ်ႈၸဝ်ႈ ပၼ်ပုၼ်ႈၽွၼ်းၸဝ်ႈၶူးၶဝ်ဝႆႉ ႁႂ်ႈတႅၵ်ႈပၼ်ၵူႈဝၼ်း”- ဝႃႈၼႆ။
ဢိင်ၼိူဝ် လွင်ႈၵိၼ်ယႅမ်ႉ/ သုင်းသွမ်း ၸိူဝ်းၼႆႉၵေႃႈ ယူႇတီႈတၵ်ႉၵႃႇသတ်းထႃး တီႈၸမ်ၵႆ လူႇတၢၼ်းၸွႆႈထႅမ်မႃး ဝႆႉယူႇ ဝႃႈၼႆ။
“လွင်ႈၵိၼ်ယႅမ်ႉတႄႉ ၸဝ်ႈတႃႇၼ တီႈၸမ်ၵႆ ၵူႈတီႈ လူႇတၢၼ်းငိုၼ်းမႃးသေ ယူႇတီႈတၵ်ႉၵႃႇၼႂ်းဝဵင်း ဢဝ်ပုၼ်ႈၽွၼ်း သေ ၵႂႃႇသိုဝ်ႉၸၢႆႇမႃးႁဵတ်းပၼ် ယဝ်ႉၵေႃႈ မႃးသူင်ႇပၼ် တႃႇဢဝ်မိူဝ်းလဵင်ႉလူတႄႉ ယူႇတီႈႁဝ်းၸဝ်ႈၶူးၶဝ် သႂ်ႇၶူဝ်း PPE သေ ဢဝ်ပုၼ်ႈ ၽွၼ်း မိူဝ်းသူင်ႇပၼ်။ ယဝ်ႉၵေႃႈ ႁႂ်ႈၵိၼ်ပႃးၼူမ်းထူဝ်ႇ မၢၵ်ႇမႆႉ ၸိူဝ်းၼႆႉ ၼင်ႇႁိုဝ် ပေႃးတေမီးဢဵၼ် ႁႅင်းၵၼ်မႃး”- ၸဝ်ႈၶူး ဢႃႇတိတ်ႉၸ သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် သင်ၶၸဝ်ႈ 92 တူၼ်ၼႆႉ လႆႈထုၵ်ႉယူတ်းယႃ ၵၵ်းတူဝ် ၼႂ်းတိူၵ်ႈသွၼ်လိၵ်ႈ ဝတ်ႉပုပ်ႉပႃႇရူင်ႇဝႆႉ တေႃႇထိုင် ပေႃးၶႅၼ်းႁၢႆလီ တႃႇၶၢဝ်းတၢင်း 14 ဝၼ်း ဢမ်ႇၼၼ် 21 ဝၼ်း ၸွမ်းၼင်ႇငဝ်းလၢႆးတၢင်းပဵၼ် ၼႆယဝ်ႉ။
ပီၼႆႉ တီႈတိူၵ်ႈသွၼ်လိၵ်ႈလူင် ဝတ်ႉပုပ်ႉပႃႇရူင်ႇၼႆႉ မီးသင်ၶၸဝ်ႈ မႃးၶိုၼ်ႈႁဵၼ်းသွၼ်လိၵ်ႈ တင်းမူတ်း 147 တူၼ် ၼႂ်း ၼၼ်ႉ တႃႇ 92 တူၼ် ၵူတ်ႇထတ်းႁၼ်တိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တႃႇ 55 တူၼ်တႄႉ ဢမ်ႇတိတ်း ၸပ်း ၼႆယဝ်ႉ။
