ၵူၼ်းပၢႆႈၽေးသိုၵ်း ဢၼ်မီးတီႈဝတ်ႉပၢင်ၸလွပ်ႈ ၵျွၵ်ႉမႄး ႁူဝ်ၵူၼ်း မွၵ်ႈ 500 ထူပ်းတၢင်းယၢပ်ႇၽိုတ်ႇ လွင်ႈၶဝ်ႈ ၼမ်ႉတၢင်းၵိၼ် လူဝ်ႇတၢင်း ၸွႆႈထႅမ် ႁၢဝ်ႈႁႅင်း။
တေႃႇထိုင် ဝၼ်းတီႈ 27/8/2021 ၼႆႉ ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ မီးၵူၼ်းပၢႆႈၽေးသိုၵ်း ႁဵင်ပၢႆ ပႆႇ ၸၢင်ႈပွၵ်ႈၶိုၼ်းႁိူၼ်းယေး ယွၼ်ႉပၢင်တိုၵ်း ၸုမ်းဢူၺ်းလီပွတ်းႁွင်ႇ TNLA, SSPP တင်း RCSS။ ၵူၼ်းမိူင်း ၼႂ်း ပိုၼ်ႉတီႈထူပ်းတၢင်းယၢပ်ႇၽိုတ်ႇ လွင်ႈၶဝ်ႈၼမ်ႉတၢင်းၵိၼ် ပၢႆႈယၢၼ်ႁိူၼ်းယေးလႄႈ ႁၢမ်းၵၢၼ်ငၢၼ်း။
ၵူၼ်းပၢႆႈၽေး ၼႂ်းၸႄႈဝဵင်းၵျွၵ်ႉမႄး ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈဝႃႈ – “ႁဝ်းၶႃႈ ပၢႆႈမႃးၼႆႉ မီးၶၢဝ်းတၢင်း 5-6 ဝၼ်း။ လႆႈၵိၼ်ၶဝ်ႈၼိုင်ႈဝၼ်းလႂ် 2 တႃႇၵူၺ်းၶႃႈ။ လွင်ႈၶဝ်ႈၼမ်ႉတၢင်းၵိၼ်တႄႉ လူဝ်ႇၼမ်ၶႃႈဢေႃႈ။ ၶူဝ်းၼုင်ႈၵေႃႈ လူဝ်ႇၶႃႈ။ ၵမ်ႈၽွင်ႈ ၼုင်ႈၶူဝ်းႁဵတ်းၵၢၼ်မႃးၵူၺ်းၶႃႈၼႃႇ။ ၵမ်ႈၽွင်ႈ ၽၵ်းတူႁိူၼ်း ဢမ်ႇတၼ်းလႆႈပိၵ်ႉဢိုတ်း ။ ပွႆႇပႅတ်ႈဝႆႉၸိူင်ႉၼၼ်ၵူၺ်းၶႃႈဢေႃႈ။ ”- ဝႃႈၼႆ။
မိူဝ်ႈဝႃး ဝၼ်းတီႈ 26/8/2021 ယၢမ်းဝၢႆးဝၼ်း မွၵ်ႈ 4 မူင်းၼႆႉ ၵူၼ်းဝၢၼ်ႈလွႆၵူင် 2 ၵေႃႉ ၽႃႇၺႃးမၢၵ်ႇ ဢၼ်ၸုမ်းယိပ်းၵွင်ႈ ၵၢင်ႇၶဝ်ႁၢင်ႈဝႆႉ ၵေႃႉၼိုင်ႈမၢတ်ႇၸဵပ်းႁၢဝ်ႈႁႅင်းသေ လႆႈသူင်ႇယူတ်းယႃတူဝ်တီႈႁူင်းယႃၵျွၵ်ႉမႄး ၼႆယဝ်ႉ။
“ၶဝ်ၽႃႇၺႃးမၢၵ်ႇ ဢၼ်သိုၵ်းႁၢင်ႈဝႆႉၼၼ်ႉၶႃႈ ပဵၼ်ၽူႈၸၢႆးသွင်ၵေႃႉ မႃးၼွၼ်းၶၢင်းၵၼ်သေ ဢမ်ႇၸၢင်ႈႁဵတ်းႁိုဝ် ၵေႃႉ မၢတ်ႇၸဵပ်းႁၢဝ်ႈႁႅင်းၼၼ်ႉတႄႉ လႆႈသူင်ႇယူတ်းယႃတီႈၵျွၵ်ႉမႄးယဝ်ႉၶႃႈ။ ၵေႃႉဢမ်ႇပေႃးမၢတ်ႇၸဵပ်းႁႅင်းၼၼ်ႉတႄႉ ယူႇ ဝႆႉတီႈဝတ်ႉၼႆႉၵူၺ်းၶႃႈ။ တိူဝ်ႉၺႃးၼႃႈၶႅင်ႈမၼ်း။”- ၵူၼ်းပၢႆႈၽေးသိုၵ်း တီႈၵျွၵ်ႉမႄး သိုပ်ႇလၢတ်ႈၼႄၼင်ႇၼႆ။
လိူဝ်ၼၼ်ႉ ဢွင်ႈတီႈၵူၼ်းပၢႆႈၽေးသိုၵ်း တီႈၼမ်ႉၸေႃႉလႄႈ မိူင်းတၢင်ႈၵေႃႈ မီးၵူၼ်းပၢႆႈၽေးမႃးသွၼ်ႈ တိူဝ်းမႃးထႅင်ႈ ၼႆယဝ်ႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈၵျွၵ်ႉမႄး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းပၢႆႈၽေးသိုၵ်းၵေႃႈ တိုၵ်ႉပၢႆႈ လူင်းမႃးထႅင်ႈယူႇၶႃႈ မိူဝ်ႈလဵဝ် တီႈမိူင်းတၢင်ႈ ၼမ်ႉၸေႃႉ ၸိူဝ်းၼႆႉၵေႃႈတိူဝ်းမႃးထႅင်ႈ။ တီႈမိူင်းတၢင်ႈၼႆႉ မီးၸမ် 200 တီႈ ၼမ်ႉၸေႃႉသမ်ႉမီး 112 ၵေႃႉၼႆႉၶႃႈ။ မၢင်ၸိူဝ်းၵေႃႈ ၵႂႃႇယူႇၸွမ်းႁိူၼ်းပီႈၼွင်ႉၵေႃႈမီး”- ဝႃႈၼႆ။
ယၢမ်းလဵဝ် ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၵျွၵ်ႉမႄးၼႆႉ ၸိူဝ်းပၢႆႈၵႂႃႇယူႇၸွမ်းႁိူၼ်းပီႈၼွင်ႉ ၼႂ်းဝဵင်းၽႂ်မၼ်းတေမီး 100 ပၢႆ ၸွမ်းၼင်ႇလႆႈယိုၼ်ႈမိုဝ်းၵဵပ်းလႆႈ။ တီႈၵိဝ်ႇသႅဝ်း 130 ပၢႆ၊ တီႈပၢင်ၸလွပ်ႈ 490 ပၢႆ၊ တီႈၼမ်ႉၸေႃႉ 100 ပၢႆ၊ မိူင်းတၢင်ႈ မွၵ်ႈ 200 လႄႈ မိူင်းငေႃႉ 500 ပၢႆ ၵူၼ်းဝၢၼ်ႈၸိူဝ်းၼႆႉတႄႉ လႆႈပၢႆႈမႃး မီးၶၢဝ်းတၢင်းလိူၼ်ပၢႆယဝ်ႉ ပႆႇၸၢင်ႈပွၵ်ႈၶိုၼ်းႁိူၼ်း ၽႂ်မၼ်း ၼႆယဝ်ႉ။
