လူမ်းလႅင်ႉၽတ်ႉပဝ်ႇ ႁူင်းႁဵၼ်းၸိူဝ်ႉၸၢတ်ႈ ငဝ်ႈၸိုင်ႈလွႆတႆးလႅင်း လူႉၵွႆၼမ်

ဝၼ်းတီႈ 25/04/2024 ယၢမ်းဝၢႆးဝၼ်းမွၵ်ႈ 3:40 မူင်း ၾူၼ်ယႂ်ႇလူမ်းလူင် ၽတ်ႉပဝ်ႇ လဵၵ်းမုင်း/ လင်ၶႃး ႁူင်းႁဵၼ်းၸိူဝ်ႉၸၢတ်ႈ ငဝ်ႈၸိုင်ႈလွႆတႆးလႅင်း (RCSS/ SSA) လူႉၵွႆသုမ်းၼမ် လွင်ႈတုမ်ႉတိူဝ်ႉ လုၵ်ႈႁဵၼ်း မၢတ်ႇၸဵပ်းလူႉတၢႆ ဢမ်ႇမီး ဝႃႈၼႆ။  

ၸၢႆးသိူဝ်ၼုမ်ႇ ၽူႈၵွၼ်းႁူင်းႁဵၼ်းၸိူဝ်ႉၸၢတ်ႈ ငဝ်ႈၸိုင်ႈလွႆတႆးလႅင်း လၢတ်ႈတီႈၽူႈတွႆႇႁွၵ်ႈဝႃႈ – “ၾူၼ် တႄႉ ဢမ်ႇပေႃးၵျၢမ်း ဢၼ်ၵျၢမ်းႁႅင်းတႄႉ ပဵၼ်လူမ်းၽတ်ႉပဝ်ႇဢေႃႈ။ ပဵၼ်မိူဝ်ႈဝႃး ယၢမ်းဝၢႆးဝၼ်းမွၵ်ႈ 3:40 မူင်းၼႆႉ လွင်ႈတုမ်ႉတိူဝ်ႉ လုၵ်ႈႁဵၼ်းႁဝ်းၶႃႈ မၢတ်ႇၸဵပ်းတႄႉ ဢမ်ႇမီး”- ဝႃႈၼႆ။

ႁူင်းႁဵၼ်းၸိူဝ်ႉၸၢတ်ႈ ငဝ်ႈၸိုင်ႈလွႆတႆးလႅင်းၼႆႉ မီးလုၵ်ႈႁဵၼ်း ၸၢႆးယိင်း 382 ၵေႃႉသေ လႆႈၵေႃႇသၢင်ႈ ၶိုၼ်ႈမႃးမီး 10 ပီပၢႆယဝ်ႉ – တီႈၾဵတ်ႉပုၵ်ႉသ် Loi Tai Leng School တႅမ်ႈတၢင်ႇဝႆႉၼင်ႇၼႆ။

ပူၼ်ႉမႃး မိူဝ်ႈဝၼ်းတီႈ 09/07/2022 ယၢမ်းၵၢင်ၶိုၼ်းမွၵ်ႈ 10 မူင်းပၢႆ ၼမ်ႉပႃႇၵိုင်ႉၵၢင်ႉ လႆလုပ်ႇထူမ်ႈ တီႈ ပွၵ်ႉႁူင်းယႃ  ႁူၺ်ႈပႃၶီး ငဝ်ႈၸိုင်ႈလွႆတႆးလႅင်း ႁဵတ်းႁႂ်ႈႁိူၼ်းယေးၵူၼ်းဝၢၼ်ႈ လႆလွင်ႈၸွမ်းၼမ်ႉၼမ် တုမ်ႉတိူဝ်ႉၵူၼ်းမိူင်း လူႉတၢႆ 4 ၵေႃႉ ၊ မၢတ်ႇၸဵပ်း 11 ၵေႃႉ ၼႆယဝ်ႉ။

ငဝ်ႈၸိုင်ႈလွႆတႆးလႅင်း ယၢမ်းလဵဝ်ၼႆႉ ယူႇတီႈ တပ်ႉသိုၵ်းၸိုင်ႈတႆး (SSA – S) ဢၼ်ၸွမ်သိုၵ်းလူင် ယွတ်ႈသိုၵ်း ဢွၼ် ႁူဝ်ပိုၼ်ၽၢဝ်ႇ မၵ်းမၼ်ႈတင်ႈငဝ်ႈၸိုင်ႈမႃး မိူဝ်ႈဝၼ်းတီႈ 8 လိူၼ်ၻီႊသႅမ်ႊပိူဝ်ႊ 1999 ။ ငဝ်ႈၸိုင်ႈလွႆတႆးလႅင်းၼၼ်ႉ မီးဝႆႉ ႁွင်ႈၵၢၼ်ၾၢႆႇပၢႆးပၺ်ႇၺႃႇ၊ ပၢႆးယူႇလီ၊ ၵူၼ်းပၢႆႈၽေး၊ လုၵ်ႈဢွၼ်ႇ ၽၢၼ်ပေႃႈမႄႈလႄႈ ႁွင်ႈၵၢၼ်ယုၵ်ႉမုၼ်းၸၢတ်ႈပၢၼ်လုၵ်ႈမေး ၵေႃႉသိုၵ်းၵေႃႉႁၢၼ် ၸဵမ်ၸိူဝ်းၼႆႉ။