ၸုမ်းႁူမ်ႈသၢင်ႈၸွႆႈထႅမ် ၵူၼ်းပၢႆႈၽေး ၼႂ်းမိူင်းတႆး လႆႈတုင်းႁပ်ႉလူႇၶၢမ်ႇ တီႈပေႃႈမႄႈပီႈၼွင်ႉ တႆးႁွတ်ႈမိူင်းထႆးလႄႈ ႁႅင်း ၵၢၼ်သေ ႁူမ်ႈၵၼ် ၵမ်ႉၸွႆႈထႅမ် ၵူၼ်းထူပ်းၽေးၼႂ်းမိူင်းတႆး တႃႇငိုၼ်း 1,200,000 ပျႃး ဝႃႈၼႆ။

ဝၼ်းတီႈ 24/8/2021 ယူႇတီႈ ၸုမ်းႁူမ်ႈသၢင်ႈၸွႆႈထႅမ် ၵူၼ်းပၢႆႈၽေး ၼႂ်းမိူင်းတႆး လႆႈၸွႆႈၵမ်ႉထႅမ်ပၼ် ၵူၼ်းပၢႆႈၽေးသိုၵ်း တၢင်းပွတ်းမိူင်းငေႃႉ၊ ၵုၼ်ၵွၵ်ႇ၊ ႁူးသူၼ်၊ ပၢင်သၵ်း ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ဢိၵ်ႇၵူၼ်းပၢႆႈၽေးဢၼ်ႁွတ်ႈၼႂ်းၸႄႈဝဵင်း မိူင်းၵိုင် ၸိုင်ႈတႆးပွတ်းၸၢၼ်း   ႁူမ်ႈၵၼ် တင်းမူတ်း 5 တီႈ  ။

ၼၢင်းထူၺ်းဢိင်ႇ လွႆဢုင်း(ႁွင်ႉ) ၼၢင်းမႂ်ႇ ၵႅမ်ႁူဝ်ပဝ်ႈ 2 မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ လၢတ်ႈၽူႈတွႆႇႁွၵ်ႈဝႃႈ – “ပၼ်ႁႃယႂ်ႇ ဢၼ်ၵိူတ်ႇၶိုၼ်ႈယူႇၼႂ်းမိူင်းတႆး ႁဝ်းၶႃႈတႄႉ တေပဵၼ်ပၼ်ႁႃၵၢၼ်မိူင်း ၵၢၼ်သိုၵ်း ၸိူဝ်းၼႆႉ ၵူၺ်းၵႃႈ လွင်ႈ ယၢပ်ႇၽိုတ်ႇၵိၼ်းၸႂ်သမ်ႉ ပဵၼ်ၵူၼ်းမိူင်း လႆႈပၢႆႈယၢၼ်ႁိူၼ်းယေးသေ ဢမ်ႇၵႃး လႆႈၶၢတ်ႇၵၢၼ်ငၢၼ်း ၽုၵ်ႈသွမ်ႈ ၵၢၼ်ႁႃၵိၼ်လဵင်ႉတွင်ႉ။ ၵွပ်ႈၼႆလႄႈ ႁဝ်းၶႃႈ တုင်းႁပ်ႉတၢင်းလူႇသေ ႁူမ်ႈၵၼ် ၵမ်ႉထႅမ်ၸွႆႈမိူဝ်းပၼ်ၵူၼ်းမိူင်းႁဝ်းၶႃႈဢေႃႈ”-  ဝႃႈၼႆ။

ၼႂ်းမိူင်းတႆးယၢမ်းလဵဝ် ၼွၵ်ႈလိူဝ် ပၼ်ႁႃၵၢၼ်မိူင်းၵၢၼ်သိုၵ်း ယဝ်ႉ  လွင်ႈၽေးတၢင်းပဵၼ်ၶူဝ်ႊဝိတ်ႉ 19 ၵေႃႈ ပဵၼ်ႁၢဝ်ႈႁႅင်းလႄႈ ၵူၼ်းမိူင်း  တုၵ်ႉၶ ယၢပ်ႇၽိုတ်ႇၵိၼ်းၸႂ် တင်းၼမ်  ။

“မိူဝ်ႈလဵဝ်ၼႆႉ ၽေးၵူႈလွင်ႈၼႆႉ တူၵ်းယူႇၼႂ်းမိူင်းတႆးႁဝ်းၶႃႈ ။  ဢမ်ႇဝႃႈ ၽေးပၢင်တိုၵ်း ၵၢၼ်မိူင်းလႄႈ ၽေး ၶူဝ်ႊဝိတ်ႉ ၸိူဝ်းၼႆႉ။ ၵွပ်ႈၼႆ ႁဝ်းၶႃႈ မီးပႃးၶူင်းၵၢၼ်တႃႇၸွႆႈထႅမ် ၶိူင်ႈၸႂ်ႉတိုဝ်းႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ”- ၼၢင်း ထူၺ်းဢိင်ႇ လွႆဢုင်း သိုပ်ႇလၢတ်ႈၼႄၼင်ႇၼႆ။

ယူႇတီႈၸုမ်းႁူမ်ႈသၢင်ႈၸွႆႈထႅမ် ၵူၼ်းပၢႆႈၽေး ၼႂ်းမိူင်းတႆး လႆႈၵမ်ႉၸွႆႈမိူဝ်းတႃႇၵႅတ်ႈၵင်ႈတၢင်းပဵၼ်ၶူဝ်ႊဝိတ်ႉ 19  မိူၼ် ၼင်ႇ PPE 300 ၸုမ်ႇ၊ Paracetamol 100 ၸုမ်ႇ၊ C-Vitt 20 ၸုမ်ႇ၊  Acmezith   (35) ၵွင်ႇ၊ Mask   (1000) ၵွင်ႇ၊ Hand Gel  (120) တဝ်ႈလႄႈ Hand wash  (120) တဝ်ႈ ႁူမ်ႈၵၼ် တင်းမူတ်းတႃႇငိုၼ်း 1,200,000 ပျႃး ၼႆႉ ယဝ်ႉ။

ၵွပ်ႈၼႆလႄႈ ယူႇတီႈ ၸုမ်းႁူမ်ႈသၢင်ႈၸွႆႈထႅမ် ၵူၼ်းပၢႆႈၽေး ၼႂ်းမိူင်းတႆး တိုၵ်းသူၼ်းထိုင် ၸွမ်းလူၺ်ႈငဝ်းလၢႆး ဝၢၼ်ႈမိူင်း ဢမ်ႇၼိမ်သဝ်း ယွၼ်ႉၽေးသိုၵ်းသေ ပီႈၼွင်ႉၼႂ်းမိူင်းတႆး လႆႈပွႆႇၽႃႈၵၢၼ်ငၢၼ်း လႆႈၽၢတ်ႇယၢၼ်ပႅတ်ႈ ႁိူၼ်းယေး ၸိူဝ်း ၼႆႉ မီးဝႆႉယူႇတင်းၼမ်လႄႈ လႆႈထူပ်းၺႃးလွင်ႈယၢပ်ႇၽိုတ်ႇတႃႇၵိၼ်ယႅမ်ႉ တႃႇယူႇသဝ်းၼၼ်ႉ လူဝ်ႇဝႆႉၶိူင်ႈၵမ်ႉထႅမ် ၶဝ် ၼမ်ႉတၢင်းၵိၼ် ယႃႈယႃ ၽႃႈႁူမ်ႈၶူဝ်းၼွၼ်း ငိုၼ်းတွင်း ဢဝ်ၸဵမ်ၸိူဝ်းၼႆႉ။

ယွၼ်ႉၼၼ်လႄႈ ၸင်ႇလႆႈယွၼ်းတၢင်းၸွႆႈထႅမ်တိုၵ်းသူၼ်းထိုင် ၸဝ်ႈတႃႇၼ ၼႂ်းမိူင်း/ ၼွၵ်ႈမိူင်း တင်းသဵင်ႈၶႅၼ်းတေႃႈ ဝႆႉၸႂ် မဵတ်ႉတႃႇ၊ ၵရုၼႃႇ ၼိူဝ်ပီႈၼွင်းပၢႆႈၽေးၶဝ်သေ ၼမ်ဢေႇဢမ်ႇဝႃႈ ၵႃႈၼင်ႇပွင်ပဵၼ်လႆႈၼၼ်ႉ ၵပ်းသိုပ်ႇၸွႆႈထႅမ် လႆႈတီႈ မၢႆၽူၼ်း +66946170834, +95 257257015, +95 9788984810, +66 853776769 ၼႆယဝ်ႉ။

ၸုမ်းႁူမ်ႈသၢင်ႈၸွႆႈထႅမ် ၵူၼ်းပၢႆႈၽေး ၼႂ်းမိူင်းတႆး လၢႆမူႇၸုမ်းႁူမ်ႈၵၼ် ၶွတ်ႇၽွတ်ႈတင်ႈဝႆႉ မိူၼ်ၼင်ႇ သင်ႇၶႃႇၼုမ်ႇ၊ ၸုမ်းၵေႃၵမ်ၵၢၼ်ပွင်သၢင်ႈလွင်ႈငမ်းယဵၼ် PMC ၊ ၸုမ်းၵူၼ်းၼုမ်ႇတႆး TYO ၊ မုၵ်ႉၸုမ်းၸၢဝ်းၶိူဝ်းတႆး TNC-T လႄႈ ႁူမ်ႈ ၸဝ်ႈတႃႇၼထႅင်ႈတင်းၼမ် ။