ၵၢတ်ႇလူင်ၵေးသီး ဢၼ်ပိၵ်ႉႁပ်ႉ ဝႆႉ ၶၢဝ်းၶူဝ်ႊဝိတ်ႉၽႄႈ ၼႂ်းလိူၼ်႞ သွင်လိူၼ်ၼႆႉ မီးၽူႈလၵ်ႉ လၵ်ႉယႃႉၶဝ်ႈၵၢတ်ႇသေ လၵ်ႉဢဝ်ၶူဝ်းၶွင်ဢၼ်မီးၵႃႈၶၼ် ၼႂ်းၵၢတ်ႇၵႂႃႇ တင်းၼမ်။

တၢင်းပဵၼ် ၶူဝ်ႊဝိတ်ႉ 19 ၽႄႈ လႄႈ ၵၢတ်ႇလူင် ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်း ၸၢၼ်းၼႆႉ လႆႈပိၵ်ႉဢိုတ်းမႃး ၶၢဝ်းတၢင်း 2 လိူၼ် ပၢႆ  ယင်း ပႆႇပိုတ်ႇ။  ၼႂ်းၶၢဝ်းတၢင်း 2 လိူၼ်ၼႆႉ မီးၵူၼ်းႁၢႆႉ လၵ်ႉယႃႉၵၢတ်ႇ တဝ်ဢဝ်ၶူဝ်းၶွင် 3 ပွၵ်ႈ။ မိူဝ်ႈဝႃး ဝၼ်းတီႈ 24/8/2021 ၼႆႉ ၵေႃႈ မီးၵူၼ်းလၵ်ႉၶဝ်ႈၵၢတ်ႇ ယႃႉဢဝ်ၶူဝ်းၶွင် ၼႂ်းၵၢတ်ႇထႅင်ႈ။

“ၵူၼ်းၵိၼ်ယႃႈၵေႃႈလိူင်ႇဢေႃႈ၊ ဢၼ်ၶဝ်လၵ်ႉၵမ်ႈၼမ် ပဵၼ်ႁၢၼ်ႉၶၢႆၾူၼ်း ဢဝ်ၾူၼ်း၊ ဢဝ်ၵၢတ်ႉငိုၼ်းၾူၼ်းၸိူဝ်းၼႆႉၶႃႈ။ ၵမ်ႈ ၼမ် ဢဝ်ဢၼ်မီးၵႃႈၶၼ်ၼၼ်ႉၶႃႈယဝ်ႉ။ ၶူဝ်းၵုၼ်ႇၶူဝ်းၶွင်ၸိူဝ်းၼႆႉ ဢမ်ႇပေႃးဢဝ်ၶႃႈ သင်ၶဝ်လၵ်ႉၼႆႉ ဢမ်ႇႁူႉ တေၵႂႃႇဝႆႉတီႈလႂ် ယဝ်ႉၵေႃႈ သင်ၶဝ်ၵႂႃႇဝႆႉသေတီႈတီႈၼႆ ပိူၼ်ႈတေႁူႉလႄႈ ဢမ်ႇလၵ်ႉၵေႃႈ ပဵၼ်လႆႈ”-  ၵူၼ်းၼုမ်ႇ ၵေးသီးၵေႃႉၼိုင်ႈ လၢတ်ႈၼႄၼင်ႇၼႆ။

 မိူဝ်ႈလိူၼ် ၵျူႊလၢႆႊၼၼ်ႉ တီႈဝဵင်းၵေးသီး မီးၵူၼ်းၸပ်းတၢင်းပဵၼ်ၶူဝ်ႊဝိတ်ႉၼမ်၊ ၵၢတ်ႇၵေႃႈ တႄႇပိၵ်ႉမႃး ၸဵမ်မိူဝ်ႈၼၼ်ႉ၊ ၽူႈမီးပုၼ်ႈၽွၼ်း ၶဝ်တႄႉဝႃႈ တေတူၺ်းငဝ်းလၢႆး ၶူဝ်ႊဝိတ်ႉ သေ ၸင်ႇၵွႆႈပိုတ်ႇ၊ တေၸၢင်ႈပိုတ်ႇၶိုၼ်းမိူဝ်ႈလႂ် တႄႉယင်းပႆႇႁူႉ တေလႆႈဢုပ်ႇၵၼ် ၵွၼ်ႇဝႃႈၼႆ။

“ၶၢဝ်းၶူဝ်ႊဝိတ်ႉၼႆႉ ၽူႈလၵ်ႉယႃႉၵၢတ်ႇ မီး 3 ပွၵ်ႈယဝ်ႉ။ ပလိၵ်ႈ ဢမ်ႇတီႉလႆႈတူဝ်ၵူၼ်းႁႆႉသေပွၵ်ႈၶႃႈ။ မိူင်းႁဝ်းၵေႃႈ ဢမ်ႇမီးလွင်ႈႁူမ်ႇလူမ်ႈယဝ်ႉ” – ၼႆ ၵူၼ်းယူႇ ႁိမ်းၵၢတ်ႇၵေႃႉၼိုင်ႈလၢတ်ႈ။

ဢိင်ၼိူဝ် ၶီႈလၵ်ႉ လိူင်ႇ ၵႆႉယႃႉ ၵႆႉၵဝ်း ၵၢတ်ႇသေ ၸဝ်ႈႁၢၼ်ႉတၢင်းၶၢႆ ၶူဝ်းၶွင် ဢၼ်မီးၵႃႈၶၼ် ၵမ်ႈၼမ် ၵႂႃႇတေႃႉဢဝ်ၶူဝ်းၼႂ်းၵၢတ်ႇမႃးဝႆႉတီႈႁိူၼ်း၊ ၸိူဝ်းဢမ်ႇၵႂႃႇၶၢႆႉမႃးတႄႉ ပဵၼ်ၶူဝ်းၼၵ်း ဢၼ်ဢမ်ႇလၵ်ႉငၢႆႈ  ၊ ၶူဝ်းၵုၼ်ႇဢၼ်ၵႃႈၶၼ်ထုၵ်ႇ ၵမ်ႈၽွင်ႈၵူၺ်းယဝ်ႉၼႆ ၵူၼ်းၵေးသီး လၢတ်ႈၼႄ ၼင်ႇၼႆ။