ၶၢဝ်းတၢင်း 2 ဝၼ်းမႃးၼႆႉ (ၵျွင်းတႆး) ဝတ်ႉပုပ်ႉပႃႇရူင်ႇ ဝဵင်းလွႆၶေႃ(လွႆၵေႃႇ) မိူင်းယၢင်းလႅင်ၼၼ်ႉ ၵူတ်ႇ ထတ်း တၢင်းပဵၼ်ၶူဝ်ႊဝိတ်ႉ 19 သင်ၶလုၵ်ႈႁဵၼ်းတႆး ၸိူဝ်းၵႂႃႇယူႇၼၼ်ႈသေ ႁဵတ်းလိၵ်ႈ  ၸပ်း တၢင်းပဵၼ် ႁိမ်းပၢၵ်ႇတူၼ်  ။

ဝၼ်းတီႈ 23-24/8/2021 ၼႆႉ တိူၵ်ႈသွၼ်လိၵ်ႈလူင်သင်ၶၸဝ်ႈ တီႈဝတ်ႉပုပ်ႉပႃႇရူင်ႇ ဝဵင်းလွႆၶေႃ ၸႄႈမိူင်း ယၢင်းလႅင် ဢၼ်တင်ႈယူႇ ႁိမ်း ဝတ်ႉၽြႃး လွႆၽႃတႅၵ်ႇ ၼၼ်ႉ ၾၢႆႇယူႇလီ လူင်းၵူတ်ႇထတ်း တၢင်းပဵၼ် ၶူဝ်ႊဝိတ်ႉ 19၊ သင်ၶၸဝ်ႈ ႁဵၼ်းလိၵ်ႈတီႈၼၼ်ႉ ၼပ်ႉႁူဝ်ပၢၵ်ႇ၊ ၼႂ်းၼၼ်ႉ ၸပ်းတၢင်းပဵၼ် ၶူဝ်ႊဝိတ်ႉ 19 တင်းမူတ်းမီး 92 တူၼ် ။

ၸဝ်ႈၶူးဢႃႇတိတ်ႉၸ ၶူးသွၼ် ဝတ်ႉပုပ်ႉပႃႇရူင်ႇ ဝဵင်းလွႆၶေႃ လၢတ်ႈၼႄၽူႈတွႆႇႁွၵ်ႈဝႃႈ – “ဢၼ်ထတ်း ႁၼ် ၸိူဝ်ႉမႅင်း မီး 92 တူၼ်။ တေႃႈလဵဝ်တႄႉ ႁဝ်းၸဝ်ႈၶဝ် ယႅၵ်ႇၵၼ်ဝႆႉ ၸိူဝ်းတိတ်းၸပ်း ၼၼ်ႉ ၶဝ်ၸဝ်ႈၵၵ်းတူဝ်ယူႇဝႆႉတီႈၼႂ်းဝၢင်းၵျွင်းၼႆႉ ၶေႃၶေႃ တီႈၼိုင်ႈ။ ၸိူဝ်းဢမ်ႇ တိတ်းၸပ်းၼၼ်ႉသမ်ႉ ယႅၵ်ႈယူႇဝႆႉ ထႅင်ႈၶေႃၶေႃတီႈၼိုင်ႈႁဵတ်းၼႆ။ ၵူၼ်းပဵၼ်တႄႉ ၵူႈၸဝ်ႈၵူႈတူၼ် ဢမ်ႇထိုင်တီႈလႆႈမႆႈၸႂ်သင်။ လွင်ႈယႃႈယႃ လွင်ႈဢွၵ်ႊ သီႊၵျိၼ်ႊ ၸိူဝ်းၼႆၵေႃႈ ႁၢင်ႈႁႅၼ်းဝႆႉပၼ်ယူႇ”–  ဝႃႈၼႆ။

ယၢမ်းလဵဝ် တီႈတိူၵ်ႈသွၼ်လိၵ်ႈ ဝတ်ႉပုပ်ႉပႃႇရူင်ႇၼႆႉ ႁၢမ်ႈၵူၼ်းၶဝ်ႈဢွၵ်ႇၵႂႃႇမႃး Lockdown ဝႆႉ ၸူဝ်ႈၶၢဝ်း ။   

ဝတ်ႉပုပ်ႉပႃႇရူင်ႇ ဝဵင်းလွႆၶေႃၼႆႉ ပဵၼ်တိူၵ်ႈသွၼ်လိၵ်ႈယႂ်ႇလူင် တႃႇသင်ၶၸဝ်ႈ ၼႂ်းၸႄႈမိူင်းယၢင်း တိူၵ်ႈၼိုင်ႈ ။ ၵူႈပီပူၼ်ႉမႃး သင်ၶၸဝ်ႈ မႃးၶိုၼ်ႈႁဵၼ်းသွၼ် ဢမ်ႇယွမ်း 300 တူၼ် တေႃႇပီ။ ပီၼႆႉ ယွၼ်ႉတၢင်းပဵၼ်ၶူဝ်ႊ ဝိတ်ႉ 19 ၵေႃႈပိူင်ၼိုင်ႈ ၵၢၼ်မိူင်းဢမ်ႇလီၵေႃႈပိူင်ၼိုင်ႈသေ သင်ၶၸဝ်ႈမႃးၶိုၼ်ႈႁဵၼ်း မီး 147 တူၼ် ၵူၺ်းလႆႈႁူႉၼင်ႇၼႆ။

ၼႂ်းသင်ၶၸဝ်ႈ 147 တူၼ်ၼၼ်ႉ တႃႇ 92 တူၼ် တိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19  တႃႇ 55 တူၼ်တႄႉ ဢမ်ႇတိတ်းၸပ်း ၵမ်ႈၼမ် ပဵၼ်ၸဝ်ႈသၢင်ႇဢွၼ်ႇ။ ၵူၺ်းၵႃႈ ၵၢၼ်သွၼ်ၵၢၼ်ႁဵၼ်းတႄႉ လႆႈၵိုတ်း ယင်ႉဝႆႉ ၸူဝ်ႈၶၢဝ်း ဝႃႈၼႆ။

“တၢင်းပဵၼ်ၼႆႉ မဵဝ်းဢမ်ႇၸၢင်ႈႁၼ်တူဝ်မၼ်းလႆႈလႄႈ ၽႂ်ပဵၼ်ႁႃႉ ဢမ်ႇပဵၼ်ႁႃႉ ဢၼ်ဝႃႈၼၼ်ႉ မၼ်းၵေႃႈဢမ်ႇၼႄ ႁၢင်ႈၾၢင်လႆႈၵမ်းလဵဝ်လႄႈ ယွၼ်ႉၼၼ် သင်ပဵၼ်လႆႈ ႁဝ်းၶႃႈ ၵူႈတူၼ်ၵူႈၵေႃႉ ဢွၼ်ၵၼ်ယူႇဝႆႉတီႈၽႂ်မၼ်း Lockdown ဝႆႉၼႆ တေၸၢင်ႈၸွႆႈလႆႈ ႁႂ်ႈတၢင်းပဵၼ်ၼႆႉ လူတ်းယွမ်းလူင်းၵႂႃႇယဝ်ႉ”-  ၸဝ်ႈၶူးဢႃႇတိတ်ႉၸ သိုပ်ႇတုၵ်းသူၼ်းလၢတ်ႈ ၼႄၼင်ႇၼႆ။

တိူၵ်ႈသွၼ်လိၵ်ႈ ဝတ်ႉပုပ်ႉပႃႇရူင်ႇၼႆႉ မိူဝ်ႈဝၼ်းတီႈ 1/8/2021 ၼၼ်ႉ ထတ်းႁၼ်ၺႃး ၸဝ်ႈၶူးတူၼ်ၼိုင်ႈ တိတ်းၸပ်း ၶူဝ်ႊဝိတ်ႉသေ လႆႈၵၵ်းတူဝ်ယူတ်းယႃ တီႈႁူင်းယႃ၊ လူင်းႁူင်းယႃမႃးၵေႃႈ ၵၵ်းတူဝ်  တီႈၵျွင်းတႃႇၶၢဝ်းတၢင်း 2 ဝူင်ႈ၊ ယၢမ်းလဵဝ်တႄႉ ၸိုၼ်ႈၶႅၼ်းမႃးၶိုၼ်းလီငၢမ်းယဝ်ႉဝႃႈၼႆ။

ပိူင်ပဵၼ်တႄႉ – မိူဝ်ႈဝၼ်းတီႈ 19/8/2021 ၸဝ်ႈသၢင်ႇတူၼ်ၼိုင်ႈ  ဢမ်ႇလႆႈ  သႅဝ်ဢၢႆ ၊  ဝၼ်းတီႈ 23/8/2021 ထတ်းႁၼ်ၶူဝ်ႊဝိတ်ႉ  25 တူၼ်။ ဝၼ်းတီႈ 24 သမ်ႉ  ထတ်း ႁၼ်ထႅင်ႈ 66 တူၼ်။

မိူၼ်ၼႆၼင်ႇၵဝ်ႇ မိူဝ်ႈဝၼ်းတီႈ 23/8/2021 ၼႆႉၵေႃႈ တီႈဝတ်ႉႁူဝ်ၶူင်ႇ ဝဵင်းၵဵင်းတုင် မိူင်းတႆးပွတ်းဢွၵ်ႇ ၼၼ်ႉ ၵေႃႈ ၵူတ်ႇထတ်းႁၼ် ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တီႈသင်ၶၸဝ်ႈ 25 တူၼ် ၼႆယဝ်ႉ။