တႃႇတိုၵ်းလိုပ်ႈ ၸုမ်းသိုၵ်းၵႅတ်ႇၶႄၵူၼ်းမိူင်း PDF ၼႆသေ ၶွင်ႇသီႇသိုၵ်းယိုတ်းမိူင်း ယွၼ်းႁႅင်းသိုၵ်းပျီႇတူႉၸိတ်ႉႁႂ်ႈမႃးၵမ်ႉၸွႆႈဝႃႈၼႆ။
ဝၼ်းတီႈ 7 /8/2021 တိူင်းသိုၵ်းဝၼ်းဢွၵ်ႇၵၢင် ယလၶ ဢၼ်ပၵ်းလုမ်းတီႈ ၶူဝ်လမ် ႁွင်ႉဢဝ်ၸုမ်းသိုၵ်းပျီႇတူႉၸိတ်ႉၼႂ်းပိုၼ်ႉတီႈသေ ၸီႉသင်ႇဝႃႈ ႁႂ်ႈသိုၵ်းပျီႇတူႉၸိတ်ႉ သူင်ႇႁႅင်းၵူၼ်းမႃးၸွႆႈသိုၵ်းမၢၼ်ႈ တႃႇတိုၵ်းလိုပ်ႈသိုၵ်းၵႅတ်ႇၶႄၵူၼ်းမိူင်း PDF (ဢၼ်ပႃးဢဵၼ်ႁႅင်းၵူၼ်းၼုမ်ႇသႅၼ်းႁုၼ်ႈမႂ်ႇ Gen.Z ၵမ်ႈၼမ် ၊တင်ႈၶိုၼ်ႈမႃးတႃႇတိုၵ်းၸဝ်ႈဢႃႇၼႃႇသိုၵ်းႁႂ်ႈပုတ်းပင်း)၊ ႁႂ်ႈသိုၵ်းပျီႇတူႉၸိတ်ႉၵူႈၸုမ်း သူင်ႇသဵၼ်ႈသၢႆမၢႆႁႅင်းၵူၼ်း ႁႅင်းၵွင်ႈၵၢင်ႇ ၸူး တပ်ႉတိူင်းသိုၵ်းသေဢမ်ႇၵႃး ပိူင်လူင်တိုၼ်းတေဢမ်ႇလႆႈသူင်ႇႁႅင်းၵူၼ်းႁႅင်းသိုၵ်းၸွႆႈၸူးသိုၵ်း PDF လႃးလႃး ဝႃႈၼႆ။
“ပိူင်လူင်တႄႉ ယႃႇႁႂ်ႈၽႂ် ၽူႈလႂ် ၸုမ်းဢမ်ႇၵဵဝ်ႇၶွင်ႈၸိူဝ်းၼႆႉ လႆႈယိပ်းၵွင်ႈၵၢင်ႇ ။ ၵူၼ်းႁဵတ်းၵၢၼ်ပၢႆးမၢၵ်ႈမီးၵေႃႈလီ၊ ၶႄႇၵေႃႈလီ ယႃႇပၼ်ယိပ်းၵွင်ႈ၊ ယဝ်ႉၵေႃႈ ႁႂ်ႈသူင်ႇႁႅင်းၸွႆႈတႃႇၽဵဝ်ႈလၢင်ႉ ၸုမ်း PDF ႁွင်ႉလၢတ်ႈၸိူဝ်းၼႆႉဢေႃႈ။ ၵႅမ်ၽူႈၵွၼ်းတိူင်းၵေႃႉႁွင်ႉလၢတ်ႈ” – ၽူႈမီးၸၼ်ႉၼႂ်းတပ်ႉၸုမ်းပျီႇတူႉၸိတ်ႉၵေႃႉၼိုင်ႈလၢတ်ႈ။
ၵႅမ်ၽူႈၵွၼ်းတိူင်းယင်းႁၢမ်ႈပႃးထႅင်ႈဝႃႈ ရူတ်ႉၵႃးဢမ်ႇမီးဝႂ်ၶွၼ်ႇ ဢၼ်ၸုမ်းပျီႇတူႉၸိတ်ႉ ႁေႃႈၵႂႃႇမႃးယူႇၸိူဝ်းၼၼ်ႉၵေႃႈ ယႃႇႁႂ်ႈႁေႃႈဢွၵ်ႇပူၼ်ႉၶွပ်ႇၶဵတ်ႇမိူင်းတႆးသေ ၶဝ်ႈၵႂႃႇတၢင်ႇတီႈတၢင်ႇမိူင်း ဝႃႈၼႆ။
“ဢၼ်ၼႄၵၢင်ၸႂ်တေႃႇသိုၵ်းယိုတ်းမိူင်းၼၼ်ႉတႄႉ ၼႂ်းမိူင်းတႆးဢမ်ႇမီးယဝ်ႉ။ ၵူၺ်းၵႃႈ ၸုမ်းယိပ်းၵွင်ႈၵၢင်ႇ ၼမ်ၼႃႇ။ ၼႂ်းၼမ်ႉၸၢင်ၼႆႉ လိူဝ်သိုၵ်းတႆး သိုၵ်းၵူၼ်းမိူင်းယဝ်ႉ ၸုမ်းသိုၵ်း PDF ဢေႃႈ ၸၢင်ႈမီးမႃးလႄႈ သင်ၸိူဝ်ႉဝႃႈ မီးပၢင်တိုၵ်းပိုတ်းယိုဝ်းၵၼ်မႃး ၶဝ်တေဢဝ် ပျီႇတူႉၸိတ်ႉၶိုၼ်ႈၼႃႈၼၼ်ႉၶႃႈၼႃႇ ” – ၸၢႆးၶမ်း (ၸိုဝ်ႈလဵၼ်ႈ) ၵူၼ်းၼမ်ႉၸၢင်လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈၼင်ႇၼႆ။
ၵူၺ်းၵႃႈ သိုၵ်းယိုတ်းမိူင်း ႁွင်ႉဢဝ်ႁႅင်းပျီႇတူႉၸိတ်ႉ မႃးလွၵ်ႇငိုတ်ႈၸိူင်ႉၼႆသေတႃႉ ယူႇတီႈၸုမ်း PDF သေ တိုၼ်းဢမ်ႇတူၵ်းၸႂ်ၵူဝ်ႁႄ ၊ တေဢမ်ႇထွႆထွၼ် ႁူဝ်ၼႃႈၸုမ်း PDF ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈၼင်ႇၼႆ။
“သိုၵ်းယိုတ်းမိူင်း ႁွင်ႉဢဝ်ႁႅင်းပျီႇတူႉၸိတ်ႉသေ တေတိုၵ်းလိုပ်ႈလႆႈ ၸုမ်း PDF ႁိုဝ်ဢမ်ႇတိုၵ်းႁိုဝ်ဢၼ်ဝႃႈၼၼ်ႉတႄႉ ပဵၼ်တွၼ်ႈၶဝ်။ ပေႃးပႃးပျီႇတူႉၸိတ်ႉမႃးၶဝ်ထၢင်ႇဝႃႈႁဝ်းတေတူၵ်းၸႂ်ၵူဝ်ႁႄ။ ၵူၺ်းၵႃႈ ႁဝ်းၶႃႈၵေႃႈ တိုၼ်းတေႁဵတ်းၵႂႃႇၸွမ်းၶေႃႈယိူင်းၵၢၼ်းႁဝ်းလႄႈ ၶၵ်ႉၵၢၼ်ႁဝ်းၶႃႈ ဢၼ်ႁဝ်းၶႃႈလႆႈတမ်းဝၢင်းဝႆႉၼၼ်ႉၶႃႈဢေႃႈ။ ႁဝ်းၶႃႈမႃးယိပ်းၵွင်ႈၵၢင်ႇတႃႇၽဵဝ်ႈမူၺ်ႉသိုၵ်းမၢၼ်ႈယိုတ်းမိူင်းလႄႈ တႃႇၽဵဝ်ႈမူၺ်ႉပႃးၸုမ်းဢူၺ်းလီ ဢၼ်ႁူမ်ႈမိုဝ်းၽွမ်ႉၸွမ်းၸုမ်းသိုၵ်းယိုတ်းမိူင်းၼၼ်ႉ ႁဝ်းၶႃႈတိုၼ်းဢမ်ႇမီးလွင်ႈၼၵ်းၸႂ်သင်။ ႁဝ်းၶႃႈတိုၼ်းတေတိုၵ်းတေႃးတေႃႇပေႃး ၸဝ်ႈဢႃႇၼႃႇသိုၵ်းပုတ်းပင်း ၊ တေႃႇပေႃးဢွင်ႇပေႉၸဝ်ႈဢႃႇၼႃႇ သိုၵ်းၶႃႈဢေႃႈ ”– ဝႃႈၼႆ။
လွင်ႈၼႆႉ ၸုမ်းသိုၵ်းၵႅတ်ႇၶႄၵူၼ်းမိူင်း ဢၼ်ပၵ်းၼႂ်းၸိုင်ႈတႆးပွတ်းၸၢၼ်းၸုမ်းၼိုင်ႈ SSSG-PDF ၵေႃႈႁူႉၸွမ်းလႄႈလၢတ်ႈဝႃႈ တႃႇၸွမ်းႁႃသိုၵ်း PDF လႄႈ တႃႇတိုၵ်းလိုပ်ႈ ၼၼ်ႉ သင်ႇသိုၵ်းပျီႇတူႉၸိတ်ႉဝႆႉႁႂ်ႈထႅမ်ႁႅင်း ၼိုင်ႈၸုမ်း 100 ဝႃႈၼႆ။
ၼႂ်းၸႄႈတွၼ်ႈလွႆလႅမ်ၼႆႉ မီးၸုမ်းပျီႇတူႉၸိတ်ႉ 7 ၸုမ်း။ တပ်ႉၸုမ်း 6 ပဢူဝ်း လွႆၶႄႇ ပၢင်လူင်၊ ၸုမ်းပျီႇတူႉၸိတ်ႉၼမ်ႉႁူးၽြႃးထမ်ႈ ၼမ်ႉၸၢင်-လၢႆးၶႃႈ၊ ၸုမ်းမၢၼ်ႈပၢင်ႇ၊ ၸုမ်းၵႃလိ-ၵုၼ်ႁဵင်၊ ၸုမ်းၼမ်ႉၸၢင်-မၢၵ်ႇၵႅင်း၊ ၸုမ်းပျီႇတူႉၸိတ်ႉၼႃးယႆး၊ ၸုမ်း SSS ႁူဝ်မိူင်း မႁႃႇၵျႃႇ ၸဵမ်ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ