ဝၼ်းတီႈ 5/3/2026 သိုၵ်းမၢၼ်ႈဢဝ်ဢဵၼ်ႁႅင်း ၶဝ်ႈၼႂ်းဝဵင်းၺွင်ႇလေးပိၼ်ႇ တိူင်းပႃႇၵိူဝ်သေ ပိုတ်းယိုဝ်းၽဝ်ႁိူၼ်းယေးယဝ်ႉတီႉဢဝ်ၵူၼ်းဝၢၼ်ႈၵႂႃႇပဵၼ်ႁူဝ်ႉႁႄႉသၢႆသိုၵ်းၶဝ် 300 ၵေႃႉ ၊ သိုၵ်းၵႅတ်ႇၶႄၵူၼ်းမိူင်း ၶိုၼ်းလိုပ်ႈလမ်းပိုတ်းယိုဝ်းသိုၵ်းမၢၼ်ႈသေ ၵႅတ်ႇၶႄ ၸွႆႈဢဝ်ၵူၼ်းမိူင်းၸိူဝ်းၼၼ်ႉပွၵ်ႈၶိုၼ်းဝၢၼ်ႈသူၼ်ႁိူၼ်းယေးလႆႈတင်းမူတ်း ၊ သိုၵ်းတင်း 2 ၾၢႆႇတႄႉ မီးလွင်ႈမၢတ်ႇၸဵပ်းလူႉတၢႆၼမ် ဝႃႈၼႆ။
သိုင်းမၢၼ်ႈ တပ်ႉမ 77 ဢဵၼ်ႁႅင်း 100 ပၢႆ ၸႅၵ်ႇႁဵတ်းသၢႆသိုၵ်း 4 သၢႆသေၶဝ်ႈၼႂ်းဝၢၼ်ႈၵျွင်းၵုင်း – ၶယုၵုင်း လႄႈ ယေႇတုၼ်းၵုင်း ၸႄႈဝဵင်းၺွင်ႇလေးပိၼ်ႇ၊ ပိုတ်းယိုဝ်းၵွင်ႈလူင်သေ ၽဝ်ဝၢၼ်ႈသူၼ်ႁိူၼ်းယေးၵူၼ်းမိူင်း၊ ႁဵတ်းႁႂ်ႈၵူၼ်းမိူင်းတၢႆ 40 ပၢႆ ၼႂ်းၼၼ်ႉပႃး လုၵ်ႈဢွၼ်ႇလဵၵ်ႉ 3 ၵေႃႉလႄႈ မႄႈမၢၼ်းၵေႃႉၼိုင်ႈ ဢိၵ်ႇပႃးၵူၼ်းထဝ်ႈ (ၵူၼ်းဢႃယုယႂ်ႇ) ထႅင်ႈတင်းၼမ်။ ၵူၼ်းဝၢၼ်ႈဢၼ်လိူဝ် 300 ပၢႆၼၼ်ႉသမ်ႉ ႁွင်ႉၵႂႃႇၸွမ်းသၢႆသိုၵ်းၶဝ် – ဢဝ်ႁဵတ်းႁူဝ်ႉႁႄႉတၢႆတၢင်သၢႆသိုၵ်းၶဝ်ၼႆ သိုၵ်း PDF တေႃႇဝိၼ်ႇၻွင်းတၢတ်ႉယိၼ်း ပိုၼ်ၽၢဝ်ႇၼင်ႇၼႆ။
ၼႂ်းၶေႃႈပိုၼ်ၽၢဝ်ႇၼၼ်ႉပႃးဝႆႉဝႃႈ ၽွင်းသိုၵ်းမၢၼ်ႈတီႉၵူၼ်းဝၢၼ်ႈၵႂႃႇၼၼ်ႉ သိုၵ်းၵႅတ်ႇၶႄၵူၼ်းမိူင်း တပ်ႉၵွင်တပ်ႉၸုမ်းတႂ်ႈတိူင်းသိုၵ်းပႃႇၵိူဝ်၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈယၢင်းၽိူၵ်ႇ KNLA ၶဝ်ႁူမ်ႈဢဵၼ်ႁႅင်းၵၼ် တင်ႈၸိုဝ်ႈဝႃႈ “ ပၢင်တိုၵ်းၽႅၼ်ယၼ်ႇသိုၵ်းၸွႆႈၵူၼ်းမိူင်း” ၼႆသေ ပႂ်ႉမုတ်းယိုဝ်းသိုၵ်းမၢၼ်ႈ ၸွႆႈဢဝ်ၵူၼ်းဝၢၼ်ႈၸိူဝ်းၼၼ်ႉၶိုၼ်းပွၵ်ႈမႃးလႆႈၶိုၼ်းမူတ်း ။ ၵူၺ်းၵႃႈ ၾၢႆႇတပ်ႉသိုၵ်းၵႅတ်ႇၶႄၵူၼ်းမိူင်း တူၵ်းသုမ်း 11 ၵေႃႉ ၊ ၾၢႆႇသိုၵ်းမၢၼ်ႈတၢႆ 10 ပၢႆ မၢတ်ႇၸဵပ်း 20 ပၢႆ ဝႃႈၼႆ။
ယၢမ်းလဵဝ် တႃႇလွင်ႈလွတ်ႈၽေးၵူၼ်းမိူင်းၼၼ်ႉ သိုၵ်းၵႅတ်ႇၶႄၵူၼ်းမိူင်း လႆႈႁူမ်ႈၵၼ်တင်း ၵၢင်ႉၵႄႇဝၢၼ်ႈဢိူင်ႇသေ ၽႅၼ်ၵၢၼ်ဝႆႉယူႇ ၼႆ ၾၢႆႇတၢင်း NUG ၵေႃႈပိုၼ်ၽၢဝ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ