ဢိင်ၼိူဝ် တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်း ပွၵ်ႈၵမ်းသၢမ်ၼႆႉသေ ၼႂ်းၸႄႈဝဵင်းလၢင်းၶိူဝ်း မၢင်ပွၵ်ႉ မၢင်ယွမ်ႇ တေပိၵ်ႉဢိုတ်း Lockdown ဝႆႉ ၸူဝ်ႈၶၢဝ်း တႃႇၵႅတ်ႈၵင်ႈၸိူဝ်ႉမႅင်း ၼင်ႇႁိုဝ်ပေႃးတေဢမ်ႇၽႄႈလၢမ်းၸပ်းတူဝ်ႈၵၼ်တင်းမိူင်း ဝႃႈၼႆ။

တႄႇဢဝ် မိူဝ်ႈၽုၵ်ႈ ဝၼ်းတီႈ 13/8/2021 ယၢမ်းၵၢင်ၼႂ် 9 မူင်းၵႂႃႇတေႃႇပေႃးထိုင်ဝၼ်းတီႈ 27/8/2021  တီႈပွၵ်ႉဝၢၼ်ႈတႂ်ႈ ၸႄႈဝဵင်းလၢင်းၶိူဝ်း  မၢင်ယွမ်ႇ မၢင်ၵိဝ်ႇ ဢွင်ႈတီႈ ၵူၼ်းတိတ်းၸပ်းၸိူဝ်ႉမႅင်းၼမ်ၼၼ်ႉ တေပိၵ်ႉဢိုတ်းဝႆႉ Lockdown  ၸူဝ်ႈ ၶၢဝ်း ၼင်ႇႁိုဝ် တၢင်းပဵၼ်ၶူဝ်ႊဝိတ်ႉ 19 ပေႃးတေဢမ်ႇတိတ်းၸပ်း ၽႄႈလၢမ်း ၵူၼ်းဝၢၼ်ႈ ၼႂ်းပွၵ်ႉလႄႈ တၢင်ႇပွၵ်ႉယွမ်ႇ  ထႅင်ႈ  ၼႆယဝ်ႉ။

ၸၢႆးႁၢၼ်ႇထုၼ်း ၽူႈၵွၼ်းပွၵ်ႉဝၢၼ်ႈတႂ်ႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈပွၵ်ႉဝၢၼ်ႈတႂ်ႈႁဝ်းၶႃႈတႄႉ တေဢမ်ႇပိၵ်ႉ ဢိုတ်းတၢင်းပွၵ်ႉၶႃႈ။ တေပိၵ်ႉဢိုတ်း တီႈယွမ်ႇၸိူဝ်းဢၼ် ႁၼ်ၵူၼ်းတိတ်းၸပ်းၸိူဝ်ႉမႅင်းၼမ်ၼၼ်ႉၵူၺ်း။ တေမီးမွၵ်ႈလင်ႁိူၼ်း လၢႆ လင် ယၢမ်းလဵဝ် တိုၵ်ႉၵဵပ်းသဵၼ်ႈမၢႆမၼ်းယူႇၶႃႈ။ တေပိၵ်ႉဢိုတ်း ပဵၼ်ယွမ်ႇ ပဵၼ်ၵိဝ်ႇ ၸိူဝ်းၼၼ်ႉၵူၺ်းၶႃႈ။ တႄႇဢဝ် မိူဝ်ႈ ၽုၵ်ႈၵႂႃႇ ယၢမ်းၵၢင်ၼႂ် 9 မူင်းၶႃႈဢေႃႈ”- ဝႃႈၼႆ။

ပွၵ်ႉဝၢၼ်ႈတႂ်ႈ ၸိူဝ်းမီးၾၢႆႇတူၵ်းတၢင်း ၾၢႆႇတၢၵ်းၸလွပ်ႈၵၢင်ဝၢၼ်ႈ ၶိုၼ်ႈၵႂႃႇထိုင်ႁူင်းႁဵၼ်း ၸၼ်ႉသုင်လႄႈယွမ်ႇဢၼ်တိတ်းၸပ်းၵၼ်တင်းပွၵ်ႉဝၢၼ်ႈလွႆ ၸိူဝ်းၼႆႉ တေပိၵ်ႉဢိုတ်းလွၵ်ႉတၢဝ်းမူတ်း။ လင်ႁိူၼ်းတေမီးမွၵ်ႈ  ဢမ်ႇယွမ်း 30 လင်  တီႈဢၼ်မီးၵူၼ်းတိတ်းၸပ်းတၢင်းပဵၼ်ၼမ်၊ ၵူၺ်းၵႃႈပႆႇႁူႉႁူဝ်ၼပ်ႉတႅတ်ႈတေႃး ၵူၼ်းပွၵ်ႉဝၢၼ်ႈတႂ်ႈၵေႃႉၼိုင်ႈၵေႃႈလၢတ်ႈၼင်ႇၼႆ။

ၼႂ်းၸႄႈဝဵင်းလၢင်းၶိူဝ်းၼႆႉ တေႃႇထိုင်ဝၼ်းတီႈ 11/8/2021 ၼႆႉ ၵူၼ်းတိတ်းၸပ်း ၸိူဝ်ႉမႅင်းတင်းမူတ်းမီး  170 ပၢႆ ၼႂ်း ၼၼ်ႉ ပွၵ်ႉဝၢၼ်ႈတႂ်ႈ ၵူၼ်းတိတ်းၸပ်း ၸိူဝ်ႉမႅင်း မီးၼမ်သုတ်း မီး 40 ပၢႆ  ။