တၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ်ၼႆႉ ၼႂ်းၸႄႈဝဵင်းသီႇပေႃႉ ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 မီး 600 ပၢႆယဝ်ႉ ဝႃႈၼႆ။
ဝၼ်းတီႈ 10/8/2021 ၼႆႉ ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ၵူတ်ႇထတ်းႁၼ် ၵူၼ်းတိတ်း ၸပ်း ၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 တင်းမူတ်း 12 ၵေႃႉ။
ၸုမ်းၸွႆႈထႅမ် ပရႁိတ ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မိူဝ်ႈဝႃးၼႆႉ ထူပ်းႁၼ်ထႅင်ႈ 12 ၵေႃႉ။ ၵူၼ်းဢၼ်ၶိုၼ်ႈႁူင်းယႃဝႆႉ မိူဝ်ႈလဵဝ်ၼႆႉ လၢမ်းတူၺ်း တေမီးမွၵ်ႈ 180 ပၢႆ။ ပေႃးပႃးၵူၼ်းဢၼ်လူင်းႁူင်းယႃ လႄႈ ၵူၼ်းဢၼ်တၢႆၵႂႃႇၸိူဝ်းၼႆႉသမ်ႉ တင်းမူတ်း တေမီးမွၵ်ႈ 600 ပၢႆယဝ်ႉ။ ၵူၼ်းတၢႆၵူၺ်း တေမီးမွၵ်ႈ 45 ၵေႃႉၼႆႉ”- ဝႃႈ ၼႆ။
ၾၢႆႇၸွႆႈထႅမ် ၸုမ်းပရႁိတ သီႇပေႃႉ တိုၵ်းသူၼ်းထိုင်ဝႃႈ မိူဝ်ႈပႆႇပဵၼ်ႁႅင်း ၽွင်းပႆႇလႆႈၸႂ်ႉၶိူင်ႈၸွႆႈထူၺ်ႈၸႂ် ဢွၵ်ႊသီႊ ၸိၼ်ႊၼၼ်ႉ ထုၵ်ႇလီဢွၼ်ၵၼ်ၵႂႃႇယူတ်းယႃ။ ပေႃးထိုင်ၶၵ်ႉ တေလႆႈၸႂ်ႉၶိူင်ႈၸွႆႈထူၺ်ႈၸႂ်သေ ၸင်ႇၵႂႃႇႁူင်းယႃတႄႉ ၵူဝ် တူၵ်းလိုၼ်း ၊ ၵူဝ်ယႃဢမ်ႇတၼ်းၶိုတ်းဝႃႈၼႆ။
“မိူဝ်ႈလဵဝ်ၼႆႉ ဢၼ်ယူတ်းယႃတီႈႁိူၼ်းႁင်းၵူၺ်းၼၼ်ႉ ဢမ်ႇလီႁဵတ်းသေဢိတ်း သင်ဝႃႈ ႁၵ်ႉတူဝ်ၸႂ်ၸဝ်ႈၵဝ်ႇၵေႃႈ ဢမ်ႇၵိုင်ႇလီယူတ်းယႃႁင်းၵူၺ်း။ တၢင်းပဵၼ်ၼႆႉ ဢမ်ႇၸႂ်ႈမဵဝ်းလီဢၢႆ ပိူၼ်ႈၵေႃႈပဵၼ်ၵၼ်တင်းၵမ်ႇၽႃႇ။ ၶတ်းၸႂ် ႁူမ်ႈ မိုဝ်းၵၼ်တင်းၾၢႆႇပၢႆး ယူႇလီၶဝ်သေ ယူတ်းယႃသေၵမ်း။ တီႈႁူင်းယႃသီႇပေႃႉၵေႃႈ ႁဝ်းၶႃႈ ၸွႆႈထႅမ် ပၼ်ပႃး ၾၢႆႇဢွၵ်ႊသီႊၸျိၼ်ႊ ယူႇ။ ၵူၼ်းပဵၼ် ၸိူဝ်းယၢပ်ႇၸႂ် လွင်ႈၶဝ်ႈၼမ်ႉ တၢင်းၵိၼ်ၵေႃႈ ႁဝ်းၶႃႈ ၸုမ်းပရႁိတ ၸွႆထႅမ်ပၼ်ယူႇၶႃႈ။ လွင်ႈယႃႈယႃ ဢၼ်တေလႆႈၵိၼ်လႆႈၸႂ်ႉ ၸိူဝ်းၼႆႉၵေႃႈ ႁဝ်းၶႃႈ ၸွႆႈထႅမ်ပၼ်ယူႇ ၵွပ်ႈၼႆလႄႈ သင်ဝႃႈ ႁၵ်ႉသၢႆၸႂ် ၸဝ်ႈၵဝ်ႇၸိုင် ၶတ်း ၸႂ်မႃးႁပ်ႉလွင်ႈယူတ်းယႃသေၵမ်း”- ၸုမ်းၸွႆႈထႅမ် ပရႁိတ တုၵ်းယွၼ်းလၢတ်ႈၼႄၼင်ႇၼႆ။
ဢိင်ၼိူဝ် တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်း ပွၵ်ႈၵမ်းသၢမ်ၼႆႉသေ ၵူၼ်းမိူင်းပိုၼ်ႉတီႈ ဢမ်ႇႁတ်းဢွၵ်ႇႁိူၼ်း ယေးၵႂႃႇတၢင်းလႂ် လွင်ႈၵိၼ်ယႅမ်ႉၵေႃႈ ၵဵပ်းၵိၼ်ၽၵ်းၶဵဝ် ဢၼ်ၽုၵ်ႇဝႆႉၼႂ်းသူၼ်ၸိူဝ်းၼၼ်ႉၵူၺ်း ဢမ်ႇႁတ်းဢွၵ်ႇ ၵႂႃႇ သိုဝ်ႉသင် တၢင်းၼွၵ်ႈ ၵူၼ်းပိုၼ်ႉတီႈ သီႇပေႃႉ လၢတ်ႈၼႄၼင်ႇၼႆ။
