ၼႂ်းဝၼ်းလဵဝ်ၵူၺ်း ၵူတ်ႇထတ်းႁၼ် ၵူၼ်းႁိူၼ်းလဵဝ်ၵၼ် တိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 တင်းမူတ်း 15 ၵေႃႉ ၼႂ်းၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ။
မိူဝ်ႈဝႃး ဝၼ်းတီႈ 9/8/2021 ၼႆႉ ၼႂ်းၸႄႈဝဵင်းသႅၼ်ဝီ ထတ်းႁၼ် ၵူၼ်း ၸပ်းၸိူ ၶူဝ်ႊဝိတ်ႉ 19 တင်းမူတ်း 18 ၵေႃႉ။ ၼႂ်းၼၼ်ႉ တႃႇ 15 ၵေႃႉ ပဵၼ် ၵူၼ်းႁိူၼ်းလဵဝ်ၵၼ် ။
ၽူႈၸွႆႈထႅမ် ၸုမ်းပရႁိတ ၸႄႈဝဵင်းသႅၼ်ဝီ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈဝႃးၸပ်း 18 ၵေႃႉ။ မိူဝ်ႈၼႆႉ ထူပ်းႁၼ်ထႅင်ႈ 8 ၵေႃႉ ၼႂ်းၸႄႈဝဵင်းသႅၼ်ဝီၼႆႉ ၵူၼ်း ၸပ်း ၶူဝ်ႊဝိတ်ႉ 19 တင်းမူတ်း မီးၵႂႃႇ 76 ၵေႃႉယဝ်ႉ လူႉတၢႆ ယွၼ်ႉၶူဝ်ႊဝိတ်ႉ သမ်ႉ မီး 2 ၵေႃႉ”- ဝႃႈၼႆ။
ၸွမ်းၼင်ႇ သဵၼ်ႈသၢႆမၢႆ ဢၼ်ၶဝ်ႈပဵၼ်တၢင်းၵၢၼ်တႄႉ ၵူၼ်းလူႉတၢႆ မီး 2 ၵေႃႉ။ ၵူၺ်းၵႃႈ ၸိူဝ်းၵူၼ်းပဵၼ်ၶူဝ်ႊဝိတ်ႉသေ လူင်းႁူင်းယႃၵႂႃႇ သမ်ႉမိူဝ်းတၢႆတီႈႁိူၼ်း ၵေႃႈမီး။ မၢင်ၸိူဝ်း ဢမ်ႇတၼ်းလႆႈၸႅတ်ႈတၢင်းပဵၼ် လႆႈလူႉတၢႆ ၵေႃႈမီးလႄႈ ပေႃးႁူမ်ႈပႃးၸိူဝ်းၼၼ်ႉ တေမီး 6 ၵေႃႉ – ၽူႈၸွႆႈထႅမ်ၸုမ်းပရႁိတ သိုပ်ႇလၢတ်ႈၼင်ႇၼႆ။
ယၢမ်းလဵဝ် ၼႂ်းၸႄႈဝဵင်းသႅၼ်ဝီ ၵူၼ်းပဵၼ် တိုၵ်ႉသိုပ်ႇယူတ်းယႃတူဝ်ဝႆႉ တင်းမူတ်းမီး 26 ၵေႃႉ ၼႆယဝ်ႉ။
တႄႇဢဝ်ၼႂ်းလိူၼ်ၵျုႊလၢႆႊမႃးၼႆႉ ၼႂ်းၸႄႈဝဵင်းသႅၼ်ဝီ ၵူၼ်းမိူင်း သမ်းယႃႁႄႉၵင်ႈၶူဝ်ႊဝိတ်ႉယဝ်ႉ 400 ပၢႆ။ ၼႂ်းၼၼ်ႉ ၵူၼ်းထဝ်ႈ ဢႃယု 65 ပီ မႃးသမ်း ဢေႇ ၸုမ်းပရႁိတ သႅၼ်ဝီ လၢတ်ႈ။
