တီႈဝတ်ႉ/ ၵျွင်းမူဝ်းၵူတ်ႉဝိပသၼႃႇ တီႈတိုဝ်းၵမ်တြႃး ၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ ၸိူဝ်ႉမႅင်းၶူဝ်ႊ ဝိတ်ႉ 19 ၽႄႈလၢမ်းတိတ်းၸပ်း သင်ၶၸဝ်ႈလႄႈမႄႈၶၢဝ် လႄႈယေႃးၵီႇ တင်းမူတ်း 59 တူၼ် ၼႂ်းၼၼ်ႉ လူႉတၢႆ 1 ၵေႃႉ ဝႃႈၼႆ။
မိူဝ်ႈဝႃး ဝၼ်းတီႈ 8/8/2021 တီႈဝတ်ႉ/ ၵျွင်းမူဝ်းၵူတ်ႉဝိပသၼႃႇ (ၵျွင်းၵွင်းဝႅတ်ႈ) ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၵူတ်ႇထတ်းတင်းပဵၼ်ၶူဝ်ႊဝိတ်ႉ 19 ပၼ် သင်ၶၸဝ်ႈလႄႈ ၼၢႆးၶၢဝ် ၊ ထူပ်းၺႃးၵူၼ်းမီးမႅင်းၶူဝ်ႊဝိတ်ႉ 19 တင်းမူတ်း 58 တူၼ်/ ၵေႃႉ ။
ၽူႈၸွႆႈထႅမ် ၸုမ်းတူင်ႇဝူင်းၵူၼ်း သတ်ႉထႃႇၽိဝ်ႇၸိၼ်ႇ ပရႁိတ မူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၸဵမ်မုၼ်ၸဝ်ႈ၊ ၸဝ်ႈသၢင်ႇ၊ ၼၢႆးၶၢဝ်၊ ယေႃးၵီႇၸၢႆး/ ယိင်း လႄႈ ၵပ်ႉပီႇယ ၵူတ်ႇထတ်းႁၼ် မိူဝ်ႈဝႃး ဝၼ်းတီႈ 8 ၼႆႉ တင်းမူတ်း 58 ၵေႃႉ။ ယွၼ်ႉဝႃႈ မိူဝ်ႈပူၼ်ႉမႃး ဝၼ်းသွင်ဝၼ်းၼႆႉ ၼၢႆးၶၢဝ် တီႈၵျွင်းၼႆႉၸဝ်ႈၼိုင်ႈ လူႉလွၼ်ႇၵႂႃႇလႄႈ ၸင်ႇမႃးၵူတ်ႇထတ်း ၸိူဝ်းၵိုတ်းဝႆႉၼၼ်ႉ ဢွၵ်ႇမႃးပဵၼ် Positive ၵၼ်မူတ်းၶႃႈဢေႃႈ”- ဝႃႈၼႆ။
မိူဝ်ႈဝၼ်းတီႈ 7/8/2021 ၼၼ်ႉ ၼၢႆးၶၢဝ် ၸဝ်ႈၼိုင်ႈ တီႈဝတ်ႉဝိပသၼႃႇၼႆႉ လႆႈလူႉတၢႆ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၊ လႆႈႁူႉဝႃႈပဵၼ်ၼၢႆးၶၢဝ်ဢၼ်လုၵ်ႉ ဝဵင်းလိူဝ်ႇမႃး။ ဝၢႆးၼၼ်ႉ ၽူႈမီးပုၼ်ႈၽွၼ်း၊ ၾၢႆႇပၢႆးယူႇလီ၊ ၸုမ်းၸွႆႈထႅမ်ပရႁိတ ၸင်ႇမႃးၵူတ်ႇ ထတ်း ၵူၼ်းၸိူဝ်းၵိုတ်းဝႆႉ လႄႈ ၸင်ႇ ထူပ်းႁၼ်ၵူၼ်းမီးတၢင်းပဵၼ် ပဵၼ် မုၼ်ၸဝ်ႈ 13 တူၼ်၊ ၸဝ်ႈသၢင်ႇ 24 တူၼ်၊ ၼၢႆးၶၢဝ် 9 ၸဝ်ႈ၊ ယေႃးၵီႇယိင်း 6 ၵေႃႉ၊ ယေႃးၵီႇၸၢႆး 5 ၵေႃႉလႄႈ ၵၢပ်ႉပီႇ 1 ၵေႃႉ ႁူမ်ႈၵၼ် တင်းမူတ်း 58 ၵေႃႉ ၼႆယဝ်ႉ။
“ယူႇတီႈႁဝ်းၶႃႈ ထၢင်ႇတႄႉ ၵွၼ်ႇၼႃႇ တေတိတ်းၸပ်းတၢင်းပဵၼ်ၼႆႉ မီးၸဝ်ႈၶၢဝ်/ ၼၢႆးၶၢဝ် ၵေႃႉၼိုင်ႈ လုၵ်ႉမၼ်းတလေး ဢွၵ်ႇတၢင်းသေ ပွၵ်ႈမႃး ႁဵတ်းၼၼ်ႉ လႅပ်ႈတေတိတ်းၸပ်းၵၼ်မႃး တီႈၼၼ်ႈႁိုဝ် ဢမ်ႇႁူႉ ဢၼ်ႁဝ်းၶႃႈထၢင်ႇတႄႉ”- ၽူႈ ၸွႆႈထႅမ် ၸုမ်းတူင်ႇဝူင်းၵူၼ်း ပရႁိတ မူႇၸေႊ သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် ၵူၼ်းပဵၼ် 58 တူၼ်/ ၵေႃႉၼႆႉ လႆႈသူင်ႇယူတ်းယႃတူဝ်ဝႆႉ တီႈႁူင်းယႃလူင် ၸႄႈဝဵင်းမူႇၸေႊယဝ်ႉ။ လိူဝ်ၼၼ်ႉ တီႈဝတ်ႉမူဝ်းၵူၵ်ႉဝိပသၼႃႇ ၼၼ်ႉၵေႃႈ လႆႈထုၵ်ႇ ပိၵ်ႉဢိုတ်း Lockdown ဝႆႉ ၸူဝ်ႈၶၢဝ်း။ မိူဝ်ႈဝႃး ဝၼ်းတီႈ 8 ၼႆႉ ယူႇတီႈ ၸုမ်းၸွႆႈ ထႅမ် ပရႁိတ မူႇၸေႊ ၵႂႃႇသိတ်ႇယႃၶႃႈမူင်ႈမႅင်း ၼႂ်းဝတ်ႉ/ ၵျွင်း ဝႆႉၵူႈတီႈယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ