မီးၵူၼ်းသွင်ၵေႃႉ ၶီႇရူတ်ႉၶိူင်ႈ မႃးပွႆႇမၢၵ်ႇတႅၵ်ႇ သႂ်ႇတီႈလုမ်းပလိၵ်ႈၸယၽ (စရဖ) ၾၢႆၸွပ်ႇၶၢဝ်ႇ ၸႄႈဝဵင်းၼမ်ႉၶမ်း လုၵ်ႈၼိုင်ႈ ႁဵတ်းႁႂ်ႈၵူၼ်းမိူင်းတူၵ်းၸႂ် ဝႃႈၼႆ။

မိူဝ်ႈၼႆႉ ဝၼ်းတီႈ 9/8/2021 ယၢမ်းၵၢင်ၼႂ် မွၵ်ႈ 10 မူင်း မီးၵူၼ်းသွင်ၵေႃႉ မႃးပွႆႇမၢၵ်ႇတႅၵ်ႇ သႂ်ႇတီႈလုမ်းပလိၵ်ႈ ၸယၽ ဢၼ်မီးဝႆႉၼႂ်းပွၵ်ႉၵွင်းၼွင်မူဝ် ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ လွင်ႈတုမ်ႉတိူဝ်ႉၵူၼ်းမၢတ်ႇ ၸဵပ်းလူႉတၢႆတႄႉ ဢမ်ႇမီး ၼႆယဝ်ႉ။

ၵူၼ်းၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မီးၵူၼ်းသွင်ၵေႃႉ ၶီႇရူတ်ႉၶိူင်ႈမႃးၸွမ်းၵၼ်   မႃးပွႆႇမၢၵ်ႇ  သႂ်ႇတီႈလုမ်းၸယၽၼႆႉ လုၵ်ႈၼိုင်ႈ ။ လွင်ႈတုမ်ႉတိူဝ်ႉ ၵူၼ်းမၢတ်ႇၸဵပ်းလူႉတၢႆ တႄႉ ဢမ်ႇမီး”- ဝႃႈၼႆ။

 ဢွင်ႈတီႈ ဢၼ်မၢၵ်ႇတႅၵ်ႇ တီႈလုမ်းၸယၽ လႄႈတင်း ဢွင်ႈတီႈသမ်းၶဵမ် ယႃႈယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ပၼ်ၵူၼ်းမိူင်း  ၼၼ်ႉသမ်ႉ မီးႁိမ်းၵၼ်  ၵူၺ်းလႄႈ ၵူၼ်းမိူင်းတူၵ်းၸႂ်လိူဝ်ႁႅင်း လႆႈႁူႉၼင်ႇၼႆ။

“ဢွင်ႈတီႈမၢၵ်ႇတႅၵ်ႇၼၼ်ႉသေ တင်းဢွင်ႈတီႈၵူၼ်းမိူင်းႁဝ်းၶႃႈ မႃးသမ်းယႃႁႄႉၵင်ႈၵၼ်ၼႆႉ တေယၢၼ်ၵၼ်ႁိူၼ်း မွၵ်ႈ 10 လင်ပၢႆၼႆႉၵူၺ်း။ ဢွင်ႈတီႈ သမ်းယႃၼၼ်ႉသမ်ႉ ပဵၼ်တီႈႁူင်းႁေႃးသိူဝ်ၽိူၵ်ႇၶႃႈ”- ၵူၼ်းပိုၼ်ႉတီႈ ၼမ်ႉၶမ်း သိုပ်ႇ လၢတ်ႈ ၼႄၼင်ႇၼႆ။

 ၼႂ်းၸႄႈဝဵင်းၼမ်ႉၶမ်းၼႆႉ ၵႆႉမီးလွင်ႈမၢၵ်ႇတႅၵ်ႇယူႇတႃႇသေႇလႄႈ ႁဵတ်းႁႂ်ႈၵူၼ်းၼႂ်းပိုၼ်ႉတီႈၵမ်ႈၼမ် ဢဝ်ပဵၼ်ဢၼ်လိုၼ်ႈႁူ သေ မိူၼ်ပဵၼ်ပိူင်သၽႃႇဝ ၸိူင်ႉၼၼ်ၵႂႃႇၵူၺ်း ၵူၼ်းၼုမ်ႇ ပိုၼ်ႉတီႈ ၼမ်ႉၶမ်း ၵေႃႉၼိုင်ႈ လၢတ်ႈတီႈ ၽူႈတွႆႇႁွၵ်ႈ ၼင်ႇၼႆ။

“လွင်ႈမၢၵ်ႇတႅၵ်ႇၼႂ်းၼမ်ႉၶမ်းၼႆႉ မၼ်းၶႂ်ႈလိုၼ်ႈႁူၵႂႃႇၵၼ်မူတ်းယဝ်ႉ လွင်ႈတူၵ်းၸႂ် ၵူဝ်သၼ်ႇ တိုၼ်ႇသၢၼ်ႈၵၼ် ၸိူင်ႉ ၼၼ်တႄႉ ဢမ်ႇပေႃးမီးယဝ်ႉၶႃႈ။ ယွၼ်ႉဝႃႈ ၼႂ်းၼမ်ႉၶမ်းၼႆႉ မၼ်းၵႆႉမီးလွင်ႈမၢၵ်ႇတႅၵ်ႇ ၵူၼ်းမိူင်းၵႆႉလႆႈငိၼ်းၵၼ်ယူႇ တႃႇသေႇလႄႈ”- ဝႃႈၼႆ။

မိူဝ်ႈဝၼ်းတီႈ 26/6/2021 ၼၼ်ႉၵေႃႈ ၵူၼ်းမိူင်းၼမ်ႉၶမ်း ႁူဝ်ၵူၼ်း ႁဵင်ပၢႆ ဢွၼ်ၵၼ်ဢွၵ်ႇၼႄၵၢင်ၸႂ်သေ မၢၵ်ႇတႅၵ်ႇ တိူဝ်ႉသႂ်ႇ ၵူၼ်းမိူင်းမီးလွင်ႈလူႉတၢႆလႄႈ မၢတ်ႇၸဵပ်း ၼႆယဝ်ႉ။

မိူဝ်ႈဝၼ်းတီႈ 8/8/2021 ၼႆႉၵေႃႈ ၶွင်ႇသီႇသိုၵ်းမၢၼ်ႈတင်း သိုၵ်း TNLA ပဵၼ်ပၢင်တိုၵ်း ၼႂ်းၵႄႈဝၢၼ်ႈၼမ်ႉမ – ႁူဝ်ပုင်ႇ လႄႈ ဝဵင်းၵၢင်း ၼႂ်းၸႄႈဝဵင်ၼမ်ႉၶမ်း ၼၼ်ႉၵေႃႉ ၵူၼ်းမိူင်း ၺႃးၸၢၵ်ႇ မၢတ်ႇၸဵပ်းၸွမ်းၵေႃႉၼိုင်ႈ ၾၢႆႇၶွင်ႇသီႇသိုၵ်း မၢၼ်ႈ လူႉတၢႆ ၵေႃႉၼိုင်ႈ  ။