ယၢမ်းလဵဝ် ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ၼႂ်းၸႄႈဝဵင်းၵဵင်းတုင် မီးၵႂႃႇ 370 ပၢႆ လူႉတၢႆယဝ်ႉ 2 ၵေႃႉ ဝႃႈၼႆ။
တႄႇဢဝ် ႁၢင်လိူၼ်ၵျုၼ်ႊမႃး တေႃႇထိုင် ဝၼ်းတီႈ 8/8/2021 တၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ် ၼႂ်းၸႄႈဝဵင်းၵဵင်း တုင် ၸိုင်ႈတႆးပွတ်းဢွၵ်ႇၶူင်း ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 တင်းမူတ်းမီးၵႂႃႇ 377 ၵေႃႉ လူႉတၢႆ 2 ၵေႃႉ ၼႆယဝ်ႉ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၸႄႈဝဵင်းၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇ ႁွၵ်ႈဝႃႈ – “ၼႂ်းဝၼ်းသဝ်တင်း ဝၼ်း တိတ်ႉ ဝၼ်းတီႈ 7 လႄႈ8/8/2021 ၼႆႉ ၵူၼ်းပဵၼ် ၽိူမ်ႉၶိုၼ်ႈ 70 ပၢႆ။ ၼႂ်းဝၼ်းသဝ်ၵူၺ်း ၵူတ်ႇထတ်းႁၼ် 40 ၵေႃႉ၊ ဝၼ်းတိတ်ႉၼႆႉသမ်ႉ ၵူတ်ႇထတ်း ႁၼ်ထႅင်ႈ 35 ၵေႃႉ။ ၵူၼ်းပဵၼ်ၼႆႉ ၽိူမ်ႉၶိုၼ်ႈၵူႈဝၼ်းၶႃႈဢေႃႈ။ သင်ပဵၼ်လႆႈတႄႉ ၼင်ႇႁိုဝ် တၢင်းပဵၼ် ပေႃးတေဢမ်ႇ ၽိူမ်ႉၶိုၼ်ႈထႅင်ႈၼႆႉ ၽႂ်ၵေႃႈယဝ်ႉ လူဝ်ႇၵၵ်းတူဝ်ယူႇၼႂ်းႁိူၼ်းယေးၽႂ်မၼ်း မွၵ်ႈသွင်ဝူင်ႈၼႆႉ လီတီႈသုတ်းၶႃႈ”- ဝႃႈၼႆ။
ၼႂ်းၸႄႈဝဵင်းၵဵင်းတုင် ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 ၼႆႉ တင်းမူတ်းမီးၵႂႃႇ 377 ၵေႃႉ၊ လူႉတၢႆ 2 ၵေႃႉ၊ လူင်းႁူင်းယႃ 149 ၵေႃႉလႄႈ တိုၵ်းယူတ်းယႃ 226 ၵေႃႉ။ မိူင်းၶၢၵ်ႇသမ်ႉ မီးၵူၼ်းတိတ်းၸပ်း 1 ၵေႃႉ လႆႈလူင်းႁူင်းယႃယဝ်ႉ။ မိူင်းယၢင်း မီးၵူၼ်းတိတ်းၸပ်း 10 ၵေႃႉ ၼႆႉတႄႉ တိုၵ်ႉယူတ်းယႃတူဝ်ဝႆႉယူႇ။ မိူင်းပဵင်း ၵူၼ်းပဵၼ် 153 ၵေႃႉ လူင်းႁူင်းယႃ 132 ၵေႃႉလႄႈ တိုၵ်ႉယူတ်းယႃ 21 ၵေႃႉ ဝႃႈၼႆ။
လိူဝ်ၼၼ်ႉ ၸႄႈဝဵင်းတႃႈၶီႈလဵၵ်းသမ်ႉ ၵူၼ်းပဵၼ် 1565 ၵေႃႉ၊ လူင်းႁူင်းယႃ 1128 ၵေႃႉလႄႈ လူႉတၢႆ 13 ၵေႃႉ တိုၵ်ႉယူတ်း ယႃ 423 ၵေႃႉ၊ မိူင်းၽျၢၵ်ႈ ၵူၼ်းပဵၼ် 19 ၵေႃႉ လူင်းႁူင်းယႃ 7 ၵေႃႉ လႄႈ တိုၵ်ႉယူတ်းယႃ 12 ၵေႃႉ။ မိူင်းယွင်း ၵူၼ်းပဵၼ် 48 ၵေႃႉ လူင်းႁူင်းယႃယဝ်ႉ 30 ၵေႃႉ တိုၵ်ႉယူတ်းယႃ 18 ၵေႃႉ။
ၸႄႈဝဵင်းမိူင်းသၢတ်ႇသမ်ႉ ၵူၼ်းပဵၼ်ၶူဝ်ႊဝိတ်ႉ မီး 46 ၵေႃႉ၊ လူင်းႁူင်းယႃယဝ်ႉ 11 ၵေႃႉ တိုၵ်ႉယူတ်းယႃ 35 ၵေႃႉ၊ မိူင်းတူၼ် ၵူၼ်းပဵၼ် 50 ၵေႃႉ လူင်းႁူင်းယႃ 39 ၵေႃႉလႄႈ တိုၵ်ႉယူတ်းယႃ 11 ၵေႃႉ ၼႂ်းၾဵတ်းပုၵ်ႉ မွင်ႇမွင်ႇၼၢႆႇ ၵဵင်းတုင် တႅမ်ႈတၢင်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ