ဢိင်ၼိူဝ် တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းၼႆႉသေ ၼႂ်းဝဵင်းၶူဝ်လမ် ၸိုင်ႈတႆးပွတ်းၸၢၼ်း ပိၵ်ႉဢိုတ်း တၢင်းၶဝ်ႈဝဵင်း ဢမ်ႇပၼ်ရူတ်ႉၵႃးၵႂႃႇမႃး ၶဝ်ႈၼႂ်းဝဵင်း ဝႃႈၼႆ။ 

တႄႇဢဝ်ႁူဝ်လိူၼ်ဢေႃႊၵတ်ႉသ်ၼႆႉမႃး ၾၢႆႇၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ 19 တီႈၵိင်ႇၸႄႈဝဵင်း ၶူဝ်လမ် ၸႄႈဝဵင်းၼမ်ႉ ၸၢင် ၸိုင်ႈတႆးပွတ်းၸၢၼ်း ၸင်ႇပိၵ်ႉဢိုတ်း တၢင်းၶဝ်ႈဝဵင်း ဢမ်ႇပၼ် ရူတ်ႉၵႃးၵႂႃႇမႃး ၼႂ်းဝဵင်း ယွၼ်ႉ ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်း တိတ်းၸပ်းၵၼ်ၼမ်။

ၵူၼ်းႁေႃႈၵႃးလႅင်း ဝဵင်းၶူဝ်လမ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ရူတ်ႉၵႃး ၸိူဝ်းၼႆႉ ဢမ်ႇလႆႈၶဝ်ႈ တေလႆႈလဵပ်ႈဝဵင်း ၵႂႃႇမႃးဢဝ်။ ၸဝ်ႈၵႃး ၸိူဝ်းမီးဝႂ်ႁပ်ႉႁွင်း/ ထောက်ခံစာ၊  ၸိူဝ်းသမ်းယႃႁႄႉၵင်ႈယဝ်ႉ ၸိူဝ်းၼႆႉတႄႉ ၶဝ်ႈဝဵင်းၵႂႃႇမႃးလႆႈယူႇၶႃႈ ”- ဝႃႈၼႆ။

ၸဝ်ႈၵႃးၸိူဝ်းၵိၼ်ၸၢင်ႈတေႃႉၶူဝ်း ဢမ်ႇမီးဝႂ်ႁပ်ႉႁွင်း သမ်းယႃႁႄႈၵင်ႈတၢင်းပဵၼ်ၶူဝ်ႊဝိတ်ႉ တႄႉ တိုၼ်းဢမ်ႇလႆႈၶဝ်ႈဝဵင်းလႄႈ ၵူၼ်းၼႂ်းဝဵင်းလႆႈၵႂႃႇႁပ်ႉဢဝ်ၶူဝ်းၸဝ်ႈၵဝ်ႇတၢင်းႁူဝ်ဝဵင်း။

တေႃႇထိုင်မႃး ဝၼ်းတီႈ 5/8/2021 ၼႆႉ ႁွင်ႈၵၢၼ်ၾၢႆႇပၢႆးယူႇလီလႄႈၾၢႆႇလဵင်ႈႁႅင်း ၶွင်ၸုမ်း သိုၵ်းမၢၼ်ႈ(ယိုတ်းဢႃႇၼႃႇ) ပိုၼ်ၽၢဝ်ႇဢွၵ်ႇဝႆႉ ၵူၼ်း တိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၼႂ်းမိူင်းႁူမ်ႈတုမ်ၼႆႉ မီးသၢမ် သႅၼ်ပၢႆ။ လူင်းႁူင်းယႃယဝ်ႉ သွင်သႅၼ်ပၢႆ  လူႉတၢႆ မိုၼ်ႇပၢႆ လႄႈ တိုၵ်ႉ ယူတ်းယႃတူဝ်ဝႆႉ 7 မိုၼ်ႇပၢႆ ။