ၶွင်ႇသီႇသိုၵ်းမၢၼ်ႈ သမ်းၶဵမ်ႁႄႉၵင်ႈတၢင်းပဵၼ်ၶူဝ်ႊဝိတ်ႉပၼ်ၵူၼ်းမိူင်းၵဵင်းတုင် ၵမ်းၼႆႉ သမ်းယဝ်ႉၵႂႃႇ 5 ႁဵင်ပၢႆ ဢၼ်တေသမ်းထႅင်ႈၼႂ်းဝၼ်း 2 ဝၼ်းၼႆႉသမ်ႉမီး ႁဵင်ပၢႆ ၊ ၵူၼ်းပဵၼ်ၶူဝ်ႊဝိတ်ႉ ပုင်ႈၶိုၼ်ႈၵူႈဝၼ်း ။
မိူဝ်ႈဝႃး ဝၼ်းတီႈ 5/8/2021 ၼႂ်းဝၼ်းလဵဝ်ၵူၺ်း ၼႂ်းၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ၵူတ်ႇထတ်းႁၼ် ၵူၼ်း တိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၼႆႉ မီးၵႂႃႇထိုင် 25 ၵေႃႉ ၊ ၼႂ်းၶၢဝ်းတၢင်း 1 လိူၼ်ၵူၼ်းၸပ်းတၢင်း ပဵၼ်ၶူဝ်ႊဝိတ်ႉ တီႈဝဵင်းၵဵင်းတုင် မီး 300 ၵေႃႉ လူႉတၢႆယွၼ်ႉတၢင်းပဵၼ်မီး 2 ၵေႃႉ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၾၢႆႇပၢႆးယူႇလီၶဝ်သမ်ႉ ၸႅတ်ႈပၼ်လႆႈ ၼိုင်ႈဝၼ်းလႂ် ၵူၼ်း 100 ပၢႆၵူၺ်း။ မိူဝ်ႈဝႃးဝၼ်းလဵဝ်ၵူၺ်း ၵူၼ်းၸပ်းတၢင်းပဵၼ် မီးထိုင် 25 ၵေႃႉ ။ ပေႃးထတ်းထႅင်ႈၵေႃႈ ယင်းတေႁၼ်ထႅင်ႈလူးၵွၼ်ႇ။ ၽတ်ႉၽဵင်ႇၼႆႉၸပ်းယူႇဝၼ်း 10 ၵေႃႉ 20 ၵေႃႉ ၶႃႈဢေႃႈၼႆႉ”- ဝႃႈၼႆ။
ၶူဝ်ႊဝိတ်ႉလၢမ်းမႃးပွၵ်ႈၼႆႉ ၵူၼ်းမိူင်းၵဵင်းတုင် ၵမ်ႈၼမ် ဢွၼ်ၵၼ် ၵၵ်းတူဝ် Stay at Home တႃႇႁႄႉၵင်ႈတၢင်းပဵၼ်။ ၵၢတ်ႇလူင်ၵဵင်းတုင် ဢမ်ႇပိၵ်ႉဝႆႉသေတႃႉ ဢမ်ႇမီးၵူၼ်းမႃးသိုဝ်ႉၶၢႆ။
တင်ႈဢဝ် ဝၼ်းတီႈ 30/7/2021 မႃးတေႃႇထိုင် ဝၼ်းတီႈ 3/8/2021 ၾၢႆႇပၢႆးယူႇလီ လႆႈသမ်းၶဵမ် ယႃႈယႃႁႄႉၵင်ႈ တၢင်းပဵၼ် ၶူဝ်ႊဝိတ်ႉပၼ်ၵူၼ်းမိူင်းၵဵင်းတုင် 5,600 ပၢႆ ။ ဢၼ်သမ်းၶဵမ်ယဝ်ႉဢၼ်ၵဝ်ႇလႄႈဢၼ်မႂ်ႇတင်းမူၼ်းမီး မိုၼ်ႇပၢႆယဝ်ႉ လႆႈႁူႉၼင်ႇၼႆ။
“ တီႈၵဵင်းတုင်ၼႆႉ သမ်းယႃႈယႃႁႄႉၵင်ႈယဝ်ႉ ပွၵ်ႈၼႆႉ 5,618 ၵေႃႉ ၊ ၶိုင်ဝႆႉတေသမ်းပၼ်ထႅင်ႈသမ်ႉ 1,460 ၵေႃႉ။ တင်းမူတ်းတေပဵၼ် 7000 ပၢႆ။ ၶဝ်ဝႃႈတေလူင်းသမ်းပၼ်ၼႂ်းပွၵ်ႉၼႂ်းၵိဝ်ႇ ယႃႇႁႂ်ႈလႆႈပဵၼ်ၵူၼ်းၶွၼ်ႈၵၼ်”- ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၵဵင်းတုင် သိုပ်ႇလၢတ်ႈၼႄၼင်ႇၼႆ။
မိူဝ်ႈသိုၵ်းမၢၼ်ႈ ပႆႇယိုတ်းဢႃႇၼႃႇ ၊ ပၢၼ်လူင်ပွင်ၸိုင်ႈၼူၵ်ႉယုင်းၼၼ်ႉ ၵူၼ်းမိူင်းလႆႈႁပ်ႉသမ်းၶဵမ်ယႃႈယႃႁႄႉၵင်ႈ ၶူဝ်ႊဝိတ်ႉယဝ်ႉပွၵ်ႈၼိုင်ႈ မိူဝ်ႈၼၼ်ႉလႆႈသမ်း 5,000 ၵေႃႉ။ ပေႃးႁူမ်ႈၵၼ်ဢၼ်သမ်းယဝ်ႉတင်းမူတ်းတိုၵ်ႉမီး 13,000 ပၢႆ ၵူၺ်း – ၽူႈတူင်ႉၼိုင်တူင်ႇဝူင်းၵူၼ်းၵဵင်းတုင်လၢတ်ႈၼင်ႇၼႆ။
