ဝဵင်းၵဵင်းတွင်း ၸိုင်ႈတႆးပွတ်းၸၢၼ်း မီးၵူၼ်းလူႉတၢႆ ယွၼ်ႉတၢင်းပဵၼ်ၶူဝ်ႊဝိတ်ႉ 19 တင်းမူတ်းမီး 3 ၵေႃႉယဝ်ႉ ဝႃႈၼႆ။

မိူဝ်ႈဝႃး ဝၼ်းတီႈ 5/8/2021 ၵူၼ်းမိူင်းၼႂ်းဝဵင်းၵဵင်းတွင်း ၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း လူႉတၢႆလူၺ်ႈယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႆႉ ထႅင်ႈ 2 ၵေႃႉ ယၢမ်းလဵဝ် ႁူမ်ႈၵၼ် တင်းမူတ်းမီးၵႂႃႇ 3 ၵေႃႉ ၼႆယဝ်ႉ။

ၼၢင်းသီၼူၼ်း မေႃယႃလုမ်းလႃး ၵူၼ်းပဵၼ် တီႈႁူင်းယႃလူင် ၸႄႈဝဵင်းမိူင်ပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ တီႈၵဵင်းတွင်း မိူဝ်ႈဝႃး လူႉတၢႆထႅင်ႈ 2 ၵေႃႉ၊ မိူဝ်ႈပူၼ်ႉ မႃးၼၼ်ႉလူႉတၢႆ ၵေႃႉၼိုင်ႈသေ ယၢမ်းလဵဝ် ႁူမ်ႈၵၼ် တင်းမူတ်းမီး 3 ၵေႃႉ ယဝ်ႉ။ ၵူၼ်းပဵၼ် တင်းမူတ်းတေမီးယူႇ 59 ၵေႃႉၶႃႈ တီႈၵဵင်းတွင်း”- ဝႃႈၼႆ။

ဝဵင်းၵဵင်းတွင်းၼႆႉမီးၾၢႆႇႁွင်ႇဝဵင်းလၢင်းၶိူဝ်း ၊မီးၸဵင်ႇႁွင်ႇဝၼ်းဢွၵ်ႇဝဵင်းမိူင်းၼၢႆး၊  ယူႇသဝ်းၸွမ်းသိင်ႇဝႅတ်ႉလွမ်ႉ ၼမ်ႉလိၼ်ႁိၼ်ၽႃလိုၵ်ႉ၊ ၵူၺ်းၵႃႈ မီးၼမ်ႉတူၵ်းတၢတ်ႇယႂ်ႇၵိုၵ်းပိုၼ်း၊ သိုၵ်းမၢၼ်ႈဢဝ်ၸႂ်ႉႁဵတ်းႁူင်းၸၢၵ်ႈၾႆးၾႃႉသေ ၶိုင်ႈပၢႆပၢႆ သူင်ႇၸူး တိူင်းသိုၵ်း ယလၶ ၶူဝ်လမ်လႄႈ တိူင်းသိုၵ်း ယပၶ တူၼ်ႈတီး။ ဢၼ်ၵိုတ်းလိူဝ်သမ်ႉ ၸၢႆႇၾႆးၾႃႉပၼ်ၼႂ်းၸိုင်ႈတႆးပွတ်းၸၢၼ်းလၢႆလၢႆဝဵင်း။   

ၼႂ်းၸႄႈဝဵင်းမိူင်းၼၢႆးၵေႃႈ မီးၵူၼ်းလူႉတၢႆ ယွၼ်ႉတၢင်းပဵၼ် ၶူဝ်ႊဝိတ်ႉ 19 ၼႆႉ ၵေႃႉၼိုင်ႈၼင်ႇၵဝ်ႇ ။

“တီႈမိူင်းၼၢႆးတႄႉ မီးၵူၼ်းလူႉတၢႆ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႆႉ ၵေႃႉၼိုင်ႈ တီႈမွၵ်ႇမႆႇၵေႃႈမီးၶႃႈဢေႃႈ ၵူၺ်းၵႃႈ မီး လၢႆၵေႃႉတႄႉ ပႆႇလႆႈႁူႉ၊ မိူင်းပၼ်ႇ တင်း လၢင်းၶိူဝ်းတႄႉ ဢမ်ႇမီးၵူၼ်းတၢႆၶႃႈ၊ တီႈမိူင်းပၼ်ႇတႄႉ ၵူၼ်းပဵၼ်လႆႈ ၶႂၢင်ႉလူင်း ႁူင်းယႃၵၼ် မူတ်းယဝ်ႉ”- ၼၢင်းသီၼူၼ်း မေႃလုမ်းလႃး ၵူၼ်းပဵၼ် သိုပ်ႇလၢတ်ႈ ၼင်ႇ ၼႆ။

တေႃႇထိုင် မိူဝ်ႈဝႃး ဝၼ်းတီႈ 5/8/2021 ၼႆႉ ၼႂ်းၸႄႈတွၼ်ႈလၢင်းၶိူဝ်း မီးၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 တင်းမူတ်းမီး 310 ၵေႃႉ ယဝ်ႉ ။

ၼႂ်းၼၼ်ႉ ၼႂ်းဝဵင်းလၢင်းၶိူဝ်းမီး 140 ၵေႃႉ၊ ၵဵင်းတွင်း 59 ၵေႃႉ၊ မိူင်းၼၢႆး 61 ၵေႃႉ၊ မိူင်းပၼ်ႇ 16 ၵေႃႉလႄႈ မွၵ်ႇမႆႇ 43 ၵေႃႉ  ။