ၼၢင်းယိင်း ဢႃယု 30 ပၢႆ ၵူၼ်းမိူင်းပၼ်ႇၵေႃ့ၼိုင်ႈ ထုၵ်ႇၸူၼ် မိူဝ်ႈၽွင်းၵႂႃႇႁႃၼေႃႇ ၼႂ်းထိူၼ်ႇ ၊ ၺႃးၸူၼ်ၽၼ်းတီႈၵွၵ်းႁူဝ်လႄႈ ၵွင်းလင် ယၢမ်း လဵဝ် ယူတ်းယႃတူဝ်ဝႆ့တီႈႁူင်းယႃလူင် ၵူၼ်းမိူင်း ၸႄႈဝဵင်းမိူင်းပၼ်ႇ ဝႃႈၼႆ။
မိူဝ်ႈဝၼ်းတီႈ 18/9/2021 ယၢမ်းၵၢင်ၼႂ်ၸဝ့် ၼၢင်းဝႅင်း ဢႃယု 30 ပၢႆ ၵႂႃႇႁႃၼေႃႇ ထုၵ်ႇၵူၼ်းၸူၼ်/ ၵူၼ်းႁၢႆ့ ၽူႈၸၢႆးသွင်ၵေႃ့ ဢဝ်ရူတ့်ၶိူင်ႈမၼ်းၼၢင်း ဢၼ်ၵိုတ်းဝႆ့ ၼိူဝ်သဵၼ်ႈတၢင်း တီႈၵုင်းပိၼ်း ႁိမ်းၶူဝ်လဵၵ်း ၸႄႈဝဵင်းမိူင်းပၼ်ႇ ။ မၼ်းၼၢင်း ထုၵ်ႇၵူၼ်းၸူၼ် ဢဝ်ၽႃ့ၽၼ်းသႂ်ႇ တီႈၵွၵ်းႁူဝ်လႄႈ ၵွင်းလင် မၢတ်ႇၸဵပ်း ႁၢဝ်ႈႁႅင်း ၼႆယဝ့်။
ၵူၼ်းမိူင်းပၼ်ႇ ၵေႃ့ၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ရူတ့်မၼ်းဢၼ်ၸူၼ်ဢဝ်ၵႂႃႇၼၼ်ႉ မၢၵ်ႇမၼ်းၵႂႃႇပွင်ႇပႅတ်ႈသေ ၵူၼ်းၸူၼ်ၼၼ့် ဢဝ်ၵႂႃႇမူၵ်းယုမ်းဝႆ့တီႈ ႁိမ်းဝၢၼ်ႈသူပ်းႁူၺ်ႈ။ ယဝ်ႉၵေႃႈ ၵူၼ်းႁၢႆ့ ၵူၼ်းၸူၼ်သွင်ၵေႃ့ၼၼ့် သိုပ်ႇလူင်းၵႂႃႇလၢင်းၶိူဝ်းၵေႃႈ ထုၵ်ႇပ လိၵ်ႈတီ့ၺွပ်းတူဝ်လႆႈၶႃႈဢေႃႈ”- ဝႃႈၼႆ။
ၵူၼ်းၸူၼ် 2 ၵေႃ့ၼၼ့် ယူႇတီႈပလိၵ်ႈၸႄႈဝဵင်းလၢင်းၶိူဝ်းတီ့လႆႈသေ သူင်ႇမွပ်ႈပၼ်တၢင်းပလိၵ်ႈၸႄႈဝဵင်းမိူင်းပၼ်ႇ ႁႂ်ႈသိုပ်ႇပိုတ်ႇ လိူင်ႈၸွႆးတြႃး ၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီးၼၼ့် ဝႃႈၼႆ။
“ယၢမ်းလဵဝ် ၵူၼ်းႁၢႆ့ၼၼ့် လႆႈသူင်ႇၵုမ်းတူဝ်ဝႆ့တီႈမိူင်းပၼ်ႇယဝ့် တႃႇပိုတ်ႇလိူင်ႈၸွႆးတြႃးၶဝ်၊ ၵူၼ်းၸူၼ်ၼၼ့် ပဵၼ်ၸၢဝ်းမၢၼ်ႈ လုၵ့် တၢင်းမိူင်းတူၼ်မႃး၊ ၼႂ်းမၢႆၾၢင်ၶဝ်ၼၼ့် ၵေႃ့ၼိုင်ႈယူႇ မိူင်းတူၼ် ၵေႃ့ၼိုင်ႈသမ့် ယူႇတီႈတူၼ်းတီး။ ၵူၼ်းၸူၼ်သွင်ၵေႃ့ၼၼ့် ၸိုဝ်ႈ ႁွင့် ၼၢႆႇဝိၼ်းလႄႈ ၽူဝ်းသေႃႇ”- ၵူၼ်း မိူင်းပၼ်ႇသိုပ်ႇလၢတ်ႈၼင်ႇၼႆ။
ၼၢင်းဝႅင်း ဢၼ် ၸူၼ်ၽၼ်းၼၼ်ႉ မၢတ်ႇၸဵပ်းႁၢဝ်ႈႁႅင်းသေ ယူတ်းယႃတူဝ်ဝႆႉတီႈႁူင်းယႃမိူင်းပၼ်ႇ။ မိူဝ်ႈၼႆႉတႄႉ ၶႅၼ်းၸိုၼ်ႈမီးႁႅင်းမႃးယဝ်ႉ ဝႃႈၼႆ။
ၼၢင်းသီၼူၼ်း မေႃယႃလုမ်းလႃး ၵူၼ်းပဵၼ် ႁူင်းယႃလူင် ၸႄႈဝဵင်းမိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၼၢင်း လႆႈမၢတ်ႇၸဵပ်းႁၢဝ်ႈ ႁႅင်းၶႃႈဢေႃႈ ။ ၵူၺ်းၵႃႈ မၼ်းၼၢင်း ၸႂ်ၵႅၼ်ႇၶႅင်တႄ့ၶႃႈ လုၵ့်ၼင်ႈလုၵ့်ၵိၼ်လုၵ့်ပႆ ၵႂႃႇမႃးႁင်းၵူၺ်းလႆႈယဝ်ႉၶႃႈမိူဝ်ႈၼႆႉ ”- ဝႃႈၼႆ။
ၼၢင်းဝႅင်းၼႆ့ ပဵၼ်ၵူၼ်းၸႃတိဝၢၼ်ႈမိူင်းပၢႆး ဢိူင်ႇၼမ့်တိုင်း ၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။ ဝၢႆးလင်ၺႃးၽၼ်းပေႃႉထုပ်ႉယဝ်ႉ ၸူၼ်လၢၵ်ႈမၼ်းၼၢင်းၵႂႃႇပႅတ်ႈတီႈၵွင်ယုၵ်းယၢၵ်း ဢၼ်ႁိမ်းဢွင်ႈတီႈ ပဵၼ်ၼၼ့် ။ ၽိူဝ်ၵူၼ်းၸူၼ်သွင်ၵေႃ့ၼၼ့် ဢဝ်ရူတ့်ၶိူင်ႈမၼ်းသေလႅၼ်ႈပၢႆႈၵႂႃႇယဝ့် မၼ်း ၼၢင်းၼႅတ်ႈၶိုၼ်ႈမႃးၼိူဝ်တၢင်း သေ ယွၼ်းတၢင်းၸွႆႈထႅမ် ၵူၼ်းၵႂႃႇမႃး လႄႈ ၸင်ႇထိုင်မႃးတီႈႁူင်းယႃ။
ၶၢဝ်းတၢင်းသိုၵ်းယိုတ်းမိူင်းမႃး 6-7 လိူၼ်ပၢႆၼႆႉ ဝၢၼ်ႈမိူင်းသုၵ်ႉယုင်ႈ ၵၢၼ်ၵႃႉၶၢႆ ဢမ်ႇဢွင်ႇ ၊ ႁႃၵိၼ်လဵင်ႉတွင်ႉယၢပ်ႇၽိုတ်ႇလႄႈ ၽူႈလၵ်ႉၵူၼ်းၸူၼ်ၵေႃႈ လိူင်ႇမႃး ၵူႈဝဵင်း လႄႈၵူႈဝၼ်း။
