Friday, March 29, 2024

ၸႄႈဝဵင်းလႃႈသဵဝ်ႈ တၢင်းထုင်ႉမိူင်းယေႃ ၼၼ်ႉ ၵူၼ်းမိူင်းပၢႆႈ ၵူဝ်လႆႈသမ်းယႃႁႄႉၶူဝ်ႊဝိတ်ႉ

Must read

မိူင်းတႆးပွတ်းႁွင်ႇ ၼႂ်းၸႄႈဝဵင်းလႃႈသဵဝ်ႈ တၢင်းထုင်ႉမိူင်းယေႃၼၼ်ႉ ၵူၼ်းမိူင်းဢွၼ်ၵၼ်ႁႅၼ်းၶူဝ်းပၢႆႈ ၵူဝ်လႆႈသမ်း ယႃႈယႃ ႁႄႈၵင်ႈတၢင်းပဵၼ်ၶူဝ်ႊဝိတ်ႉ 19 ။

Photo Mongyaw- ၼႂ်းဝၢၼ်ႈတီႈၼိုင်ႈ တီႈမိူင်းယေႃ

မိူဝ်ႈႁၢင်လိူၼ်ၵျုၼ်ႊလၢႆႊ 2021 ပူၼ်ႉမႃးၼႆႉ ၵူၼ်းမိူင်း ထုင်ႉမိူင်းယေႃ ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ ဢွၼ်ၵၼ် တိုၼ်ႇသၢၼ်ႈမႆႈၸႂ် ၵူဝ်လႆႈသမ်းယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၵွပ်ႈလႆႈငိၼ်းၶၢဝ်ႇပွမ်/ ၶၢဝ်ႇၽၢင်း လိုဝ်းၵၼ် ဢွၵ်ႇမႃးဝႃႈ “ပေႃးသမ်းယႃႈယႃႁႄႉၵင်ႈၶူဝ်းဝိတ်ႉယဝ်ႉတၢႆ” ၼႆလႄႈ ဢွၼ်ၵၼ်ႁႅၼ်းၶူဝ်းပၢႆႈ မူၵ်းၸွမ်းၼႂ်းႁႆႈ ၼႂ်းၼႃး။

- Subscription -

ၽူႈတူင်ႉၼိုင်တူင်ႇဝူင်းၵူၼ်း ထုင်းမိူင်းယေႃ လၢတ်ႈတီႈၽူႈတွႆႇႁွၵ်ႈဝႃႈ – “မီးၶၢဝ်ႇဝႃႈ ဢမ်ႇသမ်းဢမ်ႇလႆႈ ၶဝ်ဢဝ်ၵွင်ႈ ၸမ်ႈသေ တဵၵ်းၸႂ်ႉသမ်း။ ပေႃးသမ်းၵေႃႈတၢႆၼႆႉဝႃႇ ၶၢဝ်ႇ ပွမ်/ ၽၢင်း လိုဝ်းၵၼ်ပေႃၸွတ်ႇ။ လီၶႂ်ႈၶူဝ်ႁႃႉ လီၸႂ်လမ်ႁႃႉ ပေႃးဢမ်ႇၸၢင်ႈဝႃႈၸိူင်ႉ ႁိုဝ်ယဝ်ႉ။ ၼႆႉ ၵူဝ်သေ ဢွၼ်ၵၼ်တိုၼ်ႇသၢၼ်ႈ  ႁႅၼ်းၶူဝ်းပၢႆႈယူႇၸွမ်း ႁႆႈၸွမ်းၼႃး။ ဢမ်ႇ ႁတ်းမႃးႁိူၼ်း ”– ဝႃႈၼႆ။

ဝၼ်းတီႈ 29/7/2021 ၼႆႉ ၸုမ်းသိုၵ်းမၢၼ်ႈ ဢဝ်ႁိူဝ်းမိၼ်သိုၵ်းသေ တၢင်ႇယႃႈယႃႁႄႉၵင်ႈၶူဝ်းဝိတ်ႉ 19 ဢၼ် မိူင်းၶႄႇ ၸွႆႈထႅမ်မႃး ၼၼ်ႉ ဢဝ်မႃးထိုင်လႃႈသဵဝ်ႈသေ ၸႅၵ်ႇပၼ်မိူင်းတႆး ပွတ်းႁွင်ႇၵူႈဝဵင်းဝဵင်း။ တီႈဝဵင်းၼမ်ႉၶမ်း လႆႈ 900 မူၵ်ႇ တႃႇၵူၼ်း 900 ၵေႃႉ။

ၸၢႆးယီႈလူင်ၶမ်း ဝဵင်းၼမ်ႉၶမ်းလၢတ်ႈ လၢတ်ႈတီႈၽူႈတွႆႇႁွၵ်ႈ – “တီႈၼမ်ႉၶမ်းႁဝ်းၶႃႈၼႆႉ ၵူၼ်းပဵၼ် ၵူၼ်းၸပ်းၼႆႉ ၼမ်ၼႃႇ၊ ၵူၼ်းတၢႆၵေႃႈမိူဝ်ႈဝၼ်းတီႈ 2 ၼၼ်ႉၵူၺ်း တၢႆ 11 ၵေႃႉ။ ၵူၼ်းမိူင်းၼႆႉ ၽႂ်ၵေႃႈၶႂ်ႈသမ်းဢေႃႈ။ ၶႃႈၵေႃႈ ႁၼ်ထိုင်ဝႃႈ လီသမ်းယူႇ။ မၼ်းပဵၼ်တိုဝ်ႉတၢင်း ဢမ်ႇလီပၼ်လုတ်ႇ။ ပေႃးပဵၼ်မႃး မၼ်းယႃယၢပ်ႇ” – ဝႃႈၼႆ။

လူင်ပွင်ၸိုင်ႈမိူင်းၶႄႇ သူင်ႇယႃႈယႃႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ပၼ်ၸုမ်းသိုၵ်းမၢၼ်ႈ ၵူၺ်းဢမ်ႇၵႃး သူင်ႇ ၸွႆႈထႅမ်ပၼ်ပႃး ၸုမ်းဢူၺ်းလီသိုၵ်းပွတ်းႁွင်ႇ။ ၼႂ်းၼၼ်ႉ တပ်ႉသိုၵ်းၸိုင်ႈတႆး SSPP/SSA ၵေႃႈလႆႈႁပ်ႉ။

“မၼ်းပဵၼ်ယႃႈယႃမိူင်းၶႄႇ ပေႃးသမ်းဝႃႈတၢႆၼႆလႄႈ ႁဝ်းၶႃႈၵူဝ်ၶႃႈဢေႃႈ။ တီႈၵဵင်းလိူၼ်ႁဝ်းၶႃႈၼႆႉ မီးၵူၼ်း ၵႂႃႇ သမ်း 6 ၵေႃႉၵူၺ်းၶႃႈယိုင်” – ၼႆ ၵူၼ်းၵဵင်းလိူၼ် ၸႄႈဝဵင်းၵေးသီး ၵေႃႉၼိုင်ႈလၢတ်ႈၼႄ ၼင်ႇၼႆ။

ၵဵဝ်ႇၵပ်းလွင်ႈၼႆႉ ၼၢင်းမေႃယႃ ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈဝႃႈ သမ်းၶႅၼ်းလိူဝ်ဢမ်ႇသမ်း၊ ပေႃးဢမ်ႇသမ်းသေ ၸပ်းမႃး ၵူဝ်ယႃယၢပ်ႇ၊ ယၢမ်းလဵဝ်ၵူၼ်းပဵၼ်ၼမ် ဝဵင်းလႆၵေႃႈ လူဝ်ႇလူမ်းဢွၵ်ႇသီႊၵျိၼ်ႊ ၸွႆႈၵူၼ်းပဵၼ်ထူၺ်ႈၸႂ် ၵူႈဝဵင်းဝဵင်း ဝႃႈၼႆ။

တၢင်းပဵၼ်ၶူဝ်းဝိတ်ႉ 19 ၽႄႈလၢမ်းၵမ်းၼႆႉ ၼႂ်းမိူင်းတႆး မီးၵူၼ်းၸပ်း မိုၼ်ႇပၢႆ တၢႆ ၼပ်ႉႁူဝ်ပၢၵ်ႇ ၊ ဢၼ်ပဵၼ်ၵေႃႈ ၼမ်လိူဝ်မႃးၵူႈဝၼ်းၵေႃႈ မီးၵႂႃႇၵူႈဝဵင်းဝဵင်း။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း