ၵူၼ်းမိူင်းႁူမ်ႈတုမ်မၢၼ်ႈ ၸိူဝ်းၵႂႃႇႁဵတ်းၵၢၼ် တၢင်းမိူင်းၶႄႇ ၸိူဝ်းၼၼ်ႉ ၶူဝ်ႊဝိတ်ႉၽႄႈ လႄႈ ဢမ်ႇမီးၵၢၼ်ႁဵတ်း၊ ယၢပ်ႇၽိုတ်ႇငိုၼ်းတွင်းလႄႈ ဢွၼ်ၵၼ် ပွၵ်ႈၶဝ်ႈမႃး တၢင်းဝဵင်းမူႇၸေႊ ၶိုၼ်း ႁူဝ်ၵူၼ်း ဢမ်ႇယွမ်း 2,500 ၵေႃႉ  ။

တႄႇဢဝ် ဝၼ်းတီႈ 26/7/2021 မႃးတေႃႇထိုင် ဝၼ်းတီႈ 5/8/2021 ၼႆႉ ႁႅင်းၵၢၼ် မိူင်းႁူမ်ႈတုမ် ၸိူဝ်းၵႂႃႇႁဵတ်းၵၢၼ် တၢင်းမိူင်းမၢဝ်း၊ ၸေႊၵဝ်ႇ ၊ မိူင်းၶွၼ်၊ ဝၼ်းတဵင်ႈ ၸိူဝ်းၼႆႉ ဢမ်ႇမီးငၢၼ်ႁဵတ်း ယၢပ်ႇၽိုတ်ႇတႃႇငိုၼ်းတွင်း လႄႈ ၶၢႆၶူဝ်းၶၢႆလဵင်း ဢၼ်မီးဝႆႉသေ ဢွၼ်ႇၵၼ်ပွၵ်ႈမိူင်းၶိုၼ်း။ ၶၢဝ်းတၢင်း 9 မိုဝ်ႉ 10 ဝၼ်းၼႆႉၵူၺ်း ပွၵ်ႈမႃးၶိုၼ်း ဢမ်ႇယွမ်း 2,500 ၵေႃႉ ။

ၸဝ်ႈၵႃး မူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ႁႅင်းၵၢၼ် ပွၵ်ႈၶဝ်ႈမႃးၼႆႉ တီႈၽၵ်းတူလူင် (ရွှေ နန်းတော်) ၼိုင်ႈဝၼ်း တေပွၵ်ႈၶဝ်ႈမႃး 300 – 400 ၵေႃႉၼႆႉ။ ဢၼ်ၶဝ်ႈပဵၼ်တၢင်းၵၢၼ်။ ႁႅင်းၵၢၼ် မၢင်ၵေႃႉ ဢၼ်ပွၵ်ႈ ၶဝ်ႈမႃးၼႆႉ ယွၼ်ႉတၢင်းပဵၼ်ၶူဝ်ႊဝိတ်ႉ 19 သေ ၵၢၼ်ငၢၼ်းလႆႈၵိုတ်းယၢင်ႉပိၵ်ႉဢိုတ်းဝႆႉလႄႈ လႆႈပွၵ်ႈၶဝ်ႈမႃး”-  ဝႃႈၼႆ။

ၶူဝ်ႊဝိတ်ႉၽႄႈၶိုၼ်းၵမ်းၼႆႉ ၸိူင်ႉၼင်ႇ ၵူၼ်းမိူင်းမၢၼ်ႈၸပ်းၽႄႈ လူႉယႂ်ႇတၢႆၼမ်ၼၼ်ႉ တၢင်းမိူင်းၶႄႇ ၵေႃႈမီးၵူၼ်း ၽႄႈၸပ်း ၼႂ်းမိူင်းၶႄႇ လၢႆလၢႆဝဵင်းၵေႃႈ ပိၵ်ႉႁပ်းမိူင်းသေ ၵၵ်းတူဝ်ယူႇႁိူၼ်း ဢမ်ႇပၼ်ၵူၼ်းၼႂ်းဢွၵ်ႇ ဢမ်ႇပၼ် ၵူၼ်းၼွၵ်ႈၶဝ်ႈ ၸိူဝ်းၼႆႉ လႄႈ ႁဵတ်းႁႂ်ႈႁႅင်းၵၢၼ် ဢမ်ႇမီးၵၢၼ်ႁဵတ်း။

ႁႅင်းၵၢၼ် ဢၼ်လုၵ်ႉတၢင်းမိူင်းၶႄႇ ပွၵ်ႈၶဝ်ႈမႃးၼၼ်ႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ႁႅင်းၵၢၼ် ဢၼ်ပွၵ်ႈ ၶဝ်ႈမႃး ၵမ်ႈၼမ် ဢမ်ႇမီးငိုၼ်းၵၼ်ၶႃႈ။ ဢၼ်မီးဝႆႉ ၶူဝ်းၶွင်တၢင်းမိူင်းၶႄႇၼၼ်ႉၵေႃႈ ၶၢႆသေ ဢွၼ်ၵၼ်ဢွၵ်ႇမႃး ၶႃႈဢေႃႈ။ ၽိူဝ်ႇ ဝႃႈ ႁွတ်ႈၽႅဝ်တီႈၼႆႈၵေႃႈ လႆႈပၼ်ထႅင်ႈတီႈၽူႈမီးပုၼ်ႈၽွၼ်း ၵႃႈၸရိတ်ႈၵႃး တေပွၵ်ႈမိူဝ်ႈႁိူၼ်း ၸိူဝ်းၼႆႉထႅင်ႈ၊ ယၢပ်ႇယူႇလၢႆလွင်ႈၶႃႈ”-  ဝႃႈ ၼႆ။

ၵူၼ်းၸပ်းၶူဝ်းဝိတ်ႉ ၼႂ်းမိူင်းမၢၼ်ႈ ယၢမ်းလဵဝ် (ဢိင်ၶေႃႈမုလ်းၶူဝ်ႊဝိတ်ႉလုမ်ႈၾႃႉ) မီး 315118 ၵေႃႉ တၢႆ 10695 ၵေႃႉ၊ မိူင်းထႆး ၸပ်း 672385 ၵေႃႉ၊ မိူင်းၶႄႇ ၸပ်း 93289 ၵေႃႉ၊ မိူင်းဢမေႊရီၵၼ် ၸပ်း 36 လၢၼ်ႉပၢႆ – ဢၼ်တၢႆ ၼမ်လိူဝ်ပိူၼ်ႈတေႉ ပဵၼ်မိူင်းၵြႃးဢိၼ်းတီးယႃး။