ၶူဝ်ႊဝိတ်ႉၸပ်းငၢႆႈၽႄႈဝႆးလႄႈၵူၼ်းမိူင်းၵဵင်းတုင်ၾၢင်ႉၵၼ်ယႃႇယူႇမဝ်ၵိၼ်မၢင်

ၵူၼ်းမိူင်းၵဵင်းတုင်  သမ်းယႃႁႄႉၵင်ႈၶူဝ်ႊဝိတ်ႉယဝ်ႉ ဢမ်ႇပေႃးသႂ်ႇၸႂ်လွင်ႈၵၵ်းတူဝ် ႁဵတ်းႁႂ်ႈၵူၼ်းၸိူဝ်းပႆႇလႆႈသမ်းၼၼ်ႉ ပဵၼ်လွင်ႈမႆႈၸႂ်ၵူဝ်ဢမ်ႇၸၢင်ႈႁႄႉတၢင်းပဵၼ်လႆႈ၊ ယၢမ်းလဵဝ်ၵူၼ်းတိတ်းၸပ်းတၢင်းပဵၼ်မီး 260 ယဝ်ႉ ။

တႄႇဢဝ် ႁၢင်လိူၼ်ၵျုၼ်ႊမႃး တေႃႇထိုင် ဝၼ်းတီႈ 4/8/2021 ၼႆႉ ၼႂ်းၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ၵူတ်ႇ ထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 တင်းမူတ်းမီးၵႂႃႇယဝ်ႉ 260 ပၢႆ၊ လူႉတၢႆ 2 ၵေႃႉ၊ လူင်းႁူင်းယႃ 118 ၵေႃႉလႄႈ တိုၵ်ႉယူတ်းယႃ 149 ၵေႃႉ  ။ တိုၵ်ႉၼမ်ၶိုၼ်ႈမႃးၵူႈဝၼ်း။

ၽူႈတူင်ႉၼိုင်ၼႂ်းတူင်ႇဝူင်းၵူၼ်း ၵေႃႉၼိုင်ႈ ၸႄႈဝဵင်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ တီႈၵဵင်းတုင်ၼႆႉ ၵူတ်ႇထတ်း ႁၼ် ၵူၼ်းတိတ်းၸပ်းၸိူဝ်ႉမႅင်းၼႆႉ ၽိူမ်ႉၶိုၼ်ႈမႃးၵူႈဝၼ်းၶႃႈဢေႃႈ။ မၢင်ၸိူဝ်း ဢၼ်သမ်းယႃဝႆႉၼၼ်ႉ ထၢင်ႇဝႃႈ သမ်း ယဝ်ႉ တေႁႄႉၵင်ႈလႆႈယဝ်ႉၼႆလႄႈ  ယူႇမဝ်မၢင်ၵေႃႈမီးၼမ်။ ဢၼ်ၼႆႉ ၼႄးတၢင်းၽိတ်း ၶဝ်ၵေႃႈ ဢမ်ႇလႆႈ။ ၵွပ်ႈဝႃႈ လူင်ပွင်ၸိုင်ႈၵေႃႈ ဢမ်ႇပၼ်တၢင်းႁူႉ ဝၢႆးသေသမ်းယဝ်ႉ တေလႆႈယူႇၸိူင်ႉႁိုဝ်။ သမ်းပၼ်ယဝ်ႉၵေႃႈ မိူၼ်ဝႃႈ လူင်ပွင် ၸိုင်ႈ ႁဵတ်းၸွမ်းၼင်ႇ ပုၼ်ႈၽွၼ်း/ တႃႈဝုၼ်ႇၶဝ်ၼၼ်ႉၵူၺ်း ႁဝ်းတႄႉ ႁၼ်ဝႆႉၸိူင်ႉၼင်ႇၼႆ”- ဝႃႈၼႆ။

 ၽွင်းသိုၵ်းမၢၼ်ႈယိုတ်းမိူင်းမႃးၼႆႉ ၵူႈၸႄႈဝဵင်းၼႂ်းၸိုင်ႈတႆးပႃးၸဵမ်ဝဵင်းၵဵင်းတုင်  – လွင်ႈၵႅတ်ႇၶႄႁႄႉၵင်ႈတၢင်းပဵၼ်ၶူဝ်ႊဝိတ်ႉၼႆႉ သိုၵ်းမၢၼ်ႈဢမ်ႇတူၺ်းထိုင်လႆႈတူဝ်ႈထိုင်၊ ဢမ်ႇသႂ်ႇၸႂ်ၶိုင်ပၼ်လႆႈၵုမ်ႇထူၼ်ႈ။ ယူႇတီႈၸုမ်းၸွႆႈထႅမ်တူင်ႇဝူင်းၵူၼ်း ၸုမ်းပရႁိတ ၼႂ်းပိုၼ်ႉတီႈ လႄႈ ၾၢႆႇပၢႆးယူႇလီၵူၺ်းလႆႈၶိုင်ပွင်ယူတ်းယႃလုမ်းလႃးၵၼ်ၵႂႃႇ ၼင်ႇၵႃႈပွင်ပဵၼ်လႆႈ။

ၵွပ်ႈၼႆလွင်ႈၶဵင်ႈၶႅင် လွင်ႈသေႃႇသူၼ်းႁႂ်ႈၾၢင်ႉယူႇၾၢင်ႉၵိၼ်ၵေႃႈဢမ်ႇပေႃးမီး၊ ၸဝ်ႈတႃႇၼ ဢၼ်လူင်းၵမ်ႉၸွႆႈထိုင်ပိုၼ်ႉတီႈၵေႃႈဢမ်ႇမီးမိူၼ်ပီၵၢႆ။ ၵူၼ်းမိူင်းလႆႈတေႃႇသူႈဢဝ်ႁင်းၽႂ်မၼ်းၵူၺ်း ၵူၼ်းၼုမ်ႇၸွႆႈထႅမ်ၼႂ်းတူင်ႇဝူင်းၵူၼ်းၵေႃႉၼိုင်ႈ  လၢတ်ႈတီႈၽူႈတွႆႇႁွၵ်ႈ မိူဝ်ႈၼႂ်းဝူင်ႈပူၼ်ႉမႃးၼႆႉ။

“မိူဝ်ႈသိုၵ်းပႆႇယိုတ်းမိူင်းၼၼ်ႉ ၵႆႉၵႆႉလႆႈႁၼ် ၾၢႆႇပၢႆးယူႇလီၶဝ် ပေႃးဝၢႆးဝၼ်းမႃးၼႆ ၶဝ်ဢဝ်ၵႃးသေ လေႇသေႃႇ ၸွမ်းၸွၵ်ႉ ၸွမ်းၵိဝ်ႇ သေႃႇၾၢႆႇတႆး၊ ၾၢႆႇလႃးႁူႇ၊ ၾၢႆႇဢႃးၶႃႈ၊ ၾၢႆႇမၢၼ်ႈ ၸႃႉၵႂႃႇၸိူဝ်းၼႆႉ။ ၵႆႉလႆႈႁၼ် လႆႈငိၼ်း လွင်ႈသေႃႇသူၼ်း ပၼ်ပၢႆးယူႇလီလႄႈတႃႇႁႄႉၵင်ႈယေႃးၵႃႇၼႆႉ။ ယၢမ်းလဵဝ်ၼႆႉ ဢမ်ႇလႆႈႁၼ် ပၢႆးယူႇလီၶဝ်သေႃႇၸွမ်းပွၵ်ႉၸွမ်းၵိဝ်ႇယဝ်ႉ ဝႃႈလႃးၵေႃႈ ၶဝ်ဢမ်ႇမီးငိုၼ်းပတ်ႉၸႅတ်ႉႁိုဝ်ဢမ်ႇႁူႉ”-  ၸုမ်းၸွႆႈထႅမ်တူင်ႇဝူင်းၵူၼ်းတီႈၵဵင်းတုင် ၼၼ်ႉလၢတ်ႈထႅင်ႈၼင်ႇၼႆ။

မိူဝ်ႈဝႃး ဝၼ်းတီႈ 4/8/2021 ၼႂ်းဝၼ်းလဵဝ်ၵူၺ်း ၼႂ်းၸႄႈဝဵင်းၵဵင်းတုင် ၵူတ်ႇထတ်း  ထူပ်းႁၼ်ၵူၼ်းတိတ်းၸပ်း ၸိူဝ်ႉမႅင်း ၶူဝ်ႊဝိတ်ႉ 19 –  17 ၵေႃႉ  ။

ၵူၼ်းၼုမ်ႇ ၼႂ်းပိုၼ်ႉတီႈ ၸႄႈဝဵင်းၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တၢင်းပဵၼ်ၶူဝ်ႊဝိတ်ႉ ဢၼ်ၽႄႈလၢမ်း ပွၵ်ႈထူၼ်ႈသၢမ်ၼႆႉ ၸပ်းၵၼ်ငၢႆႈ လိူဝ်ၵႃႈပူၼ်ႉမႃးၼၼ်ႉတႄႉတႄႉ ယွၼ်ႉၼၼ်  ယႃႇဝႆႉမဝ်မၢင်ၵၼ် လႃးလႃး ႁႂ်ႈမေႃယူႇသၢင်ႈၵိၼ်သဝ်းၵႂႃႇၸွမ်းၼင်ႇ လၢႆးႁႄႉၵင်ႈၽဵၼ်ႈၽဵၼ်ႈ ၾၢင်ႉသတိ ၵၼ်ႁႅင်းႁႅင်းသေၵမ်း”- ဝႃႈၼႆ။