ၼႂ်းဝၼ်းလဵဝ်ၵူၺ်း ၵူၼ်း တီႈၼမ်ႉၶမ်း လူႉတၢႆယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႆႉ တင်းမူတ်း 11 ၵေႃႉ ပဵၼ်ဝၼ်း ဢၼ်လူႉတၢႆၼမ်သုတ်း ပေႃးလႆႈၶပ်ႉထႅဝ်ၵၼ်သေၽဝ် ထိုင်ယၢမ်းၶိုၼ်း ၸင်ႇတေယဝ်ႉ ဝႃႈၼႆ။
မိူဝ်ႈဝႃး ဝၼ်းတီႈ 2/8/2021 ၵူၼ်းမိူင်းပိုၼ်ႉတီႈ ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ဢၼ်လႆႈလူႉ တၢႆယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႆႉ တင်းမူတ်းမီးၵႂႃႇ 11 ၵေႃႉ ၊ မိူဝ်ႈၵူႈပွၵ်ႈ ပႆႇယၢမ်ႈမီးမႃး ၵူၼ်းတၢႆၼမ်ၸိူင်ႉၼႆ။
ၽူႈတူင်ႉၼိုင် ၼႂ်းၸုမ်းပရႁိတ ၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃးၼႆႉ ႁဝ်းၶႃႈ လႆႈတေႃႉသူင်ႇ ၵူၼ်းတၢႆ ၼႂ်းၼမ်ႉၶမ်းၼႆႉ တင်းမူတ်း 11 ၵေႃႉ ၶႃႈဢေႃႈ။ ဢွင်ႈတီႈၽဝ်ၵူၼ်းတၢႆၼၼ်ႉ ပေႃးလႆႈၶပ်ႉၵၼ်သေ ၽဝ်ၶႃႈ ယဝ်ႉ။ ၸၢၵ်ႈဢၼ်ၽဝ်ၵူၼ်းတၢႆၼႆႉသမ်ႉ လႆႈၸႂ်ႉၶၢဝ်းယၢမ်းၽဝ် ၼိုင်ႈၵေႃႉလႂ် ႁိုင်ၸူဝ်ႈမူင်းၶိုင်ႈ မွၵ်ႈသွင်ၸူဝ်ႈမူင်းၼႆႉ ၵူၼ်းတၢႆ 11 ၵေႃႉၼၼ်ႉ လႆႈၽဝ်ထိုင်ၵၢင်ၶိုၼ်း 1 မူင်းၼၼ်ႉၶႃႈၼႃႇ ၸင်ႇတေယဝ်ႉ”- ဝႃႈၼႆ။
ဢိင်ၼိူဝ် လွင်ႈၵူၼ်းမိူင်း လူႉတၢႆယွၼ်ႉတၢင်းပဵၼ်ၶူဝ်ႊဝိတ်ႉ 19 ၼမ် ၼႂ်းၸႄႈဝဵင်းၼမ်ႉၶမ်းၼႆႉ မိူဝ်ႈဝႃးဝၼ်းတီႈ 2 တေလႆႈဝႃႈ တၢႆၼမ်လိူဝ်တီႈသုတ်း။ မၢင်ဝၼ်းၵူၼ်းတၢႆ ဢၼ်ၼမ်တီႈသုတ်းတေမီးမွၵ်ႈ 7 ၵေႃႉၼႆႉၵူၺ်း ၽူႈၸွႆႈထႅမ် ၼႂ်းၸုမ်းပရႁိတ သိုပ်ႇလၢတ်ႈၼႄၼင်ႇၼႆ။
“ၼႂ်းၸႄႈဝဵင်းၼမ်ႉၶမ်း ဢၼ်လႆႈၶပ်ႉထႅဝ်ၵၼ်သေ ၽဝ်ၵူၼ်းတၢႆၼႆႉ တေလႆႈဝႃႈ မိူဝ်ႈဝႃးၼႆႉ ပဵၼ်ပွၵ်ႈၵမ်းႁႅၵ်ႈၶႃႈယဝ်ႉ။ မိူဝ်ႈၵူႈပွၵ်ႈတႄႉ ၼိုင်ႈဝၼ်းၼႆႉ ၼမ်တီႈသုတ်းတႄႉ တေမီးမွၵ်ႈ 7 ၵေႃႉၼႆႉၵူၺ်း”- ဝႃႈၼႆ။
ဢိင်ၼိူဝ် လွင်ႈၵၢၼ်ၽဝ်ၵူၼ်းတၢႆ တီႈၸႄႈဝဵင်းၼမ်ႉၶမ်းၼႆႉ ယွၼ်ႉဝႃႈ လႆႈၸႂ်ႉၽိုၼ်းသေ ၽဝ်ဢဝ်ၵူၺ်းလႄႈ လႆႈၸႂ်ႉၶၢဝ်းယၢမ်းႁိုင်မွၵ်ႈ 2 ၸူဝ်ႈမူင်း ၊ ယၢမ်းလဵဝ် ၵူၼ်းမိူင်းတိုၵ်ႉဢွၼ်ၵၼ် ၶိုင်တႃႇၵေႃႇသၢင်ႈတီႈၽဝ်ၵူၼ်းတၢႆ ထႅင်ႈယူႇ လႆႈႁူႉၼင်ႇၼႆ။
တေႃႇထိုင် မိူဝ်ႈဝႃး ဝၼ်းတီႈ 2/8/2021 ၼႆႉ ၼႂ်းၸႄႈဝဵင်းၼမ်ႉၶမ်း မီးၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 တင်းမူတ်း 711 ၵေႃႉ၊ လူႉတၢႆ 46 ၵေႃႉ လႆႈႁူႉမႃးတီႈ ၸုမ်းပရႁိတ ၸႄႈဝဵင်းၼမ်ႉၶမ်း လၢတ်ႈၼႄ ၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ